ກົມອຸຕຸນິຍົມ ແລະ ອຸທົກກະສາດ, ກະຊວງກະສິກຳ ແລະ ສິ່ງແວດລ້ອມ ໄດ້ອອກແຈ້ງເຕືອນ ສະບັບເລກທີ 0762/ກອທ (ລົງວັນທີ 21 ສິງຫາ 2026) ໃຫ້ປະຊາຊົນ ແລະ ພາກສ່ວນທີ່ກ່ຽວຂ້ອງ ເຝົ້າລະວັງສະພາບຝົນຕົກໜັກ ເຊິ່ງອາດກໍ່ໃຫ້ເກີດນ້ຳຖ້ວນຊຸ ແລະ ດິນເຈື່ອນ ໃນລະຫວ່າງວັນທີ 21 – 22 ສິງຫາ 2026 ນີ້.
ເນື່ອງຈາກຮ່ອງຄວາມກົດດັນອາກາດຕ່ຳ ເຂດພາກເໜືອ ແລະ ພາກກາງ ເຊິ່ງສົມທົບກັບລົມມໍລະສຸມຕາເວັນຕົກສະສ່ຽງໃຕ້ ມີກຳລັງປານກາງຫາແຮງ ປົກຄຸມຢູ່ທົ່ວໄປ, ສົ່ງຜົນໃຫ້ມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍຫາປານກາງຢູ່ເກືອບທົ່ວໄປ ແລະ ມີຝົນຕົກໜັກຫາຕົກໜັກຫຼາຍ ພ້ອມລົມພັດແຮງຢູ່ບາງທ້ອງຖິ່ນ.
ເຂດຄວາມສ່ຽງສູງ (ສີແດງ):
- ແຂວງ ຫົວພັນ: ເມືອງ ຫົວເມືອງ, ເມືອງ ກວັນ, ເມືອງ ຊຽງຄໍ້ ເເລະ ເມືອງ ຊົບເບົາ
- ແຂວງ ບໍລິຄຳໄຊ: ເມືອງ ບໍລິຄັນ, ເມືອງ ປາກກະດິງ ແລະ ເມືອງ ວຽງທອງ
ເຂດຄວາມສ່ຽງປານກາງ (ສີສົ້ມ):
- ແຂວງ ຫຼວງພະບາງ: ເມືອງ ນານ ແລະ ເມືອງ ຊຽງເງີນ
- ແຂວງ ວຽງຈັນ: ເມືອງ ກາສີ
- ແຂວງ ຄຳມ່ວນ: ເມືອງ ບົວລະພາ, ເມືອງ ນາກາຍ ແລະ ເມືອງ ຍົມມະລາດ
- ແຂວງ ເຊກອງ: ເມືອງ ດາກຈຶງ ແລະ ເມືອງ ກະລຶມ
- ແຂວງ ຈຳປາສັກ: ເມືອງ ບາຈຽງຈະເລີນສຸກ, ເມືອງ ຈໍາປາສັກ, ເມືອງ ປາກ ຊ່ອງ, ເມືອງ ໂພນທອງ ແລະ ເມືອງ ຊະນະສົມບູນ
ກົມອຸຕຸນິຍົມ ແລະ ອຸທົກກະສາດ ຈຶ່ງແຈ້ງເຕືອນເຖິງ ອົງການປົກຄອງທ້ອງຖິ່ນ, ພາກສ່ວນທີ່ກ່ຽວຂ້ອງ ແລະ ປະຊາຊົນບັນດາເຜົ່າ ໂດຍສະເພາະຜູ້ທີ່ອາໄສຢູ່ເຂດຮ່ອມພູ ແລະ ເຂດແຄມນ້ຳ ຈົ່ງເພີ່ມຄວາມລະມັດລະວັງ ແລະ ກຽມພ້ອມຮັບມືກັບສະພາບນ້ຳຖ້ວນຊຸ ແລະ ດິນເຈື່ອນທີ່ອາດເກີດຂຶ້ນ. ພ້ອມທັງໃຫ້ຕິດຕາມຂ່າວພະຍາກອນອາກາດ ແລະ ລະດັບນ້ຳຢ່າງໃກ້ຊິດ ແລະ ຕໍ່ເນື່ອງ
