ອັດຕາເງິນເຟີ້ ປະຈຳເດືອນກໍລະກົດ 2026 ປັບໂຕສູງຂຶ້ນເລັກໜ້ອຍມາຢູ່ທີ່ 7.6% (ຂະນະທີ່ເດືອນມິຖຸນາ ຢູ່ທີ່ 7.4%). ເມື່ອທຽບໃສ່ເດືອນຜ່ານມາ ລາຄາສິນຄ້າໂດຍລວມ ເພີ່ມຂຶ້ນ 0.7% ເຊິ່ງສາເຫດຕົ້ນຕໍ ແມ່ນມາຈາກການປັບໂຕສູງຂຶ້ນຂອງຄ່າໄຟຟ້າ, ຄ່າເດີນທາງ-ຂົນສົ່ງ ແລະ ສິນຄ້າກະສິກຳຕາມລະດູການ.
ອີງຕາມບົດລາຍງານ ຈາກສູນສະຖິຕິແຫ່ງຊາດ, ການເພີ່ມຂຶ້ນຂອງອັດຕາເງິນເຟີ້ ເມື່ອທຽບໃສ່ໄລຍະດຽວກັນຂອງປີຜ່ານມາແມ່ນມີປັດໄຈຈາກຫຼາຍໝວດສິນຄ້າ ເຊັ່ນ: ໝວດພະລັງງານ ແລະ ທີ່ພັກອາໄສ, ໝວດການຮັກສາສຸຂະພາບ ແລະ ຢາ, ໝວດການສຶກສາ, ໝວດຄົມມະນາຄົມ, ໝວດຮ້ານອາຫານ-ໂຮງແຮມ, ເຄື່ອງນຸ່ງຫົ່ມ ແລະ ສິນຄ້າບໍລິໂພກອື່ນໆ.
ດັດສະນີລາຄາສິນຄ້າ ແລະ ບໍລິການ ທີ່ປັບໂຕສູງຂຶ້ນມີຄື:
ຄ່າໄຟຟ້າ: ເພີ່ມຂຶ້ນສູງເຖິງ 91.5%.
ຄ່າໂດຍສານລົດເມ: ເພີ່ມຂຶ້ນ 41.5%.
ນ້ຳມັນເຊື້ອໄຟ: ເຖິງວ່າຈະປັບຫຼຸດລົງເລັກໜ້ອຍເມື່ອທຽບໃສ່ເດືອນຜ່ານມາ, ແຕ່ຍັງສູງກວ່າໄລຍະດຽວກັນຂອງປີຜ່ານມາເຖິງ 30%.
ເຂົ້າສານໜຽວ: ເພີ່ມຂຶ້ນ 3% (ພ້ອມດ້ວຍສິນຄ້າກະສິກຳອື່ນໆ ທີ່ປັບລາຄາຕາມລະດູການ).
ເຖິງແມ່ນວ່າຕົວເລກອັດຕາເງິນເຟີ້ລວມ ເດືອນກໍລະກົດ 2026 ຈະຫຍັບຂຶ້ນພຽງ 0.2% ຈາກເດືອນມິຖຸນາ, ແຕ່ເມື່ອພິຈາລະນາຄ່າໃຊ້ຈ່າຍທີ່ຈຳເປັນໃນຊີວິດປະຈຳວັນ ເປັນຕົ້ນແມ່ນ ຄ່າໄຟຟ້າ, ຄ່າເດີນທາງ, ຄ່າຢາປົວພະຍາດ ແລະ ຄ່າເລົ່າຮຽນ ລ້ວນແຕ່ປັບໂຕສູງຂຶ້ນຢ່າງຮອບດ້ານ.
ສະພາບການດັ່ງກ່າວ ຍັງເປັນສິ່ງທ້າທາຍໃຫຍ່ຕໍ່ຄ່າຄອງຊີບ ເຊິ່ງບັງຄັບໃຫ້ທຸກຄົວເຮືອນຕ້ອງໄດ້ບໍລິຫານຈັດການ ແລະ ວາງແຜນການໃຊ້ຈ່າຍຢ່າງຮັດກຸມ ແລະ ປະຢັດມັດທະຍັດກວ່າເກົ່າ.
ທີ່ມາ: ກະຊວງການເງິນ
Lao Youth Radio FM90MHz
