ໃນວັນທີ 23 ມິຖຸນາ 2026 ທີ່ຜ່ານມານີ້ ແມ່ຄ້າຂາຍເລກອອກມາໂພສເຕືອນໄພ ຜ່ານເຟສບຸກສ່ວນຕົວ ຊື່: Noumnim Phommachit ຫລັງຈາກທີ່ໄດ້ຮັບໂທລະສັບຈາກທະນາຄານວ່າ: ເງິນທີ່ຕົນນຳໄປຝາກ ພົບວ່າມີເງິນປອມ ຈໍານວນ 1 ໃບ ມູນຄ່າ 100,000 ກີບ.
ຜູ້ເສຍຫາຍເລົ່າວ່າ: ມື້ວັນທີ 22 ມິຖຸນາ 2026 ຕົນໄດ້ນັ່ງຂາຍເລກຕາມປົກກະຕິ ຢູ່ບ້ານໂພນສະຫວາດເໜືອ ເມືອງສີໂຄດຕະບອງ ນະຄອນຫລວງວຽງຈັນ ໂດຍບໍ່ໄດ້ສັງເກດເງິນທີ່ໄດ້ຮັບມາ, ພໍມາມື້ວັນທີ 23 ມິຖຸນາ ຕົນກໍ່ໄດ້ນໍາເງິນໄປຝາກກັບທະນາຄານອິນໂດຊາຍນ່າ ຕາມປົກກະຕິ ຫລັງຈາກນັ້ນບໍ່ດົນ ມີສາຍຈາກທະນາຄານໂທມາແຈ້ງວ່າ: ເງິນທີ່ຜູ້ເສຍຫາຍນໍາໄປຝາກນັ້ນ ເປັນເງິນປອມ ຈໍານວນ 1 ໃບ ມູນຄ່າ 100,000 ກີບ ທາງທະນາຄານຈຶ່ງຈະຂໍຢຶດໄວ້ເລີຍ.
ຜູ້ເສຍຫາຍເລົ່າຕື່ມວ່າ: ເນື່ອງຈາກເງິນທີ່ຕົນໄດ້ນໍາໄປຝາກນັ້ນ ແມ່ນມາຈາກການຂາຍເລກທັງໝົດ ຈຶ່ງໝັ້ນໃຈວ່າ ເປັນເງິນລູກຄ້າທີ່ນໍາມາຊື້ເລກ ແຕ່ບໍ່ຮູ້ວ່າເປັນຂອງລູກຄ້າຄົນໃດ.
ແນວໃດກໍຕາມ, ຂໍຝາກເລື່ອງນີ້ ເປັນອຸທາຫອນ ແລະ ແຈ້ງເຕືອນໄພໄປຍັງພໍ່ແມ່ປະຊາຊົນ ໂດຍສະເພາະຊາວຄ້າຂາຍທຸກຄົນ ໃຫ້ເພີ່ມຄວາມລະມັດລະວັງໃນການຮັບເງິນນຳລູກຄ້າ. ຄວນມີສະຕິ ແລະ ກວດກາເບິ່ງໃຫ້ລະອຽດ, ສັງເກດຈຸດປ້ອງກັນການປອມແປງຕ່າງໆ ເຊັ່ນ:
ທະນະບັດປະເພດໃບ 100,000 ກີບ ຈະໃຊ້ວິທີສຳຜັດດ້ວຍມືກໍ່ໄດ້: ທະນະບັດແທ້ຕົວເລກມູນຄ່າ 100,000 ເມື່ອເອົາມືໄປສຳຜັດຈະຮູ້ສຶກສະດຸດມື. ສ່ວນທະນະບັດປອມ ຕົວເລກມູນຄ່າ 100,000 ເມື່ອເອົາມືສຳຜັດຈະບໍ່ຮູ້ສຶກສະດຸດມື.
ໃຊ້ວິທີຍົກສ່ອງ: ທະນະບັດແທ້ ຮູບລາຍນໍ້າ ປະທານ ໄກສອນ ພົມວິຫານ ແລະ ຕົວເລກ 100,000 ຝັງຢູ່ໃນເນື້ອເຈ້ຍ ເມື່ອຍົກສ່ອງໃສ່ແສງສະຫວ່າງຈະເຫັນໄດ້ຢ່າງຊັດເຈນທັງດ້ານໜ້າ ແລະ ດ້ານຫຼັງ. ສ່ວນທະນະບັດປອມ ຮູບລາຍນໍ້າ ປະທານ ໄກສອນ ພົມວິຫານ ແລະ ຕົວເລກ 100,000 ພິມດ້ວຍມຶກສີດຽວ ຈະບໍ່ຝັງຢູ່ໃນເນື້ອເຈ້ຍ ເມື່ອຍົກສ່ອງໃສ່ແສງສະຫວ່າງຈະເຫັນເປັນລັກສະນະ.
ໃຊ້ວິທີສ່ອງໃສ່ແສງໄຟສີມ່ວງ (uv Light) ທະນະບັດແທ້ ເມື່ອສ່ອງໃສ່ແສງໄຟສີມ່ວງ (uv Light) ຕົວເລກມູນຄ່າ 100,000 ເຄື່ອງໝາຍຊາດ, ເສັ້ນນິລະໄພ, ຮູບລາຍລາວ, ເສັ້ນໄຍສັງເຄາະສີຟ້າ ແລະ ສີແດງ ຈະເຮືອງແສງ. ສ່ວນ ທະນະບັດປອມ ເມື່ອສ່ອງໃສ່ແສງໄຟສີມ້ວງ (uv Light) ຕົວເລກມູນຄ່າ 100,000 ເຄື່ອງໝາຍຊາດ, ເສັ້ນນິລະໄພ, ຮູບລາຍລາວ, ເສັ້ນໄຍສັງເຄາະສີຟ້າ ແລະ ສີແດງ ຈະບໍ່ເຮືອງແສງ.
ຜູ້ໃດປອມແປງເງິນ ຫຼື ການໃຊ້ເງິນປອມ ແມ່ນຜິດຕໍ່ມາດຕາ 129 ປະມວນກົດໝາຍອາຍາ ສະບັບເລກທີ 26/ສພຊ ວັນທີ 17 ພຶດສະພາ 2017 ທີ່ໄດ້ລະບຸໄວ້ວ່າ:
ບຸກຄົນໃດ ຫາກໄດ້ໃຊ້ເຄື່ອງພິມ ຫຼື ໃຊ້ວິທີການອື່ນ ປອມແປງເງິນກີບ, ເງິນຕາຕ່າງປະເທດ ຫຼື ນຳເອົາເງິນປອມຈາກຕ່າງປະເທດ ເຂົ້າມາ, ຈຳໜ່າຍ ຫຼື ຈໍລະຈອນ ຢູ່ ສາທາລະນະລັດ ປະຊາທິປະໄຕ ປະຊາຊົນລາວ ຈະຖືກລົງໂທດຕັດອິດສະລະພາບ ແຕ່ ຫ້າປີ ຫາ ສິບຫ້າປີ ແລະ ຈະຖືກປັບໃໝ ແຕ່ 50,000,000 ກີບ ຫາ 500,000,000 ກີບ.
ໃນກໍລະນີທີ່ຜູ້ກະທຳຜິດ ຫາກໄດ້ປອມແປງເງິນ ຫຼື ໄດ້ນຳເອົາເງິນປອມເຂົ້າມາ ຢ່າງຫຼວງຫຼາຍ ຫຼື ໂດຍມີການຈັດຕັ້ງ ຈະຖືກລົງໂທດຕັດອິດສະລະພາບ ແຕ່ ສິບປີ ຫາ ຊາວປີ ແລະ ຈະຖືກປັບໃໝ ແຕ່ 200,000,000 ກີບ ຫາ 700,000,000 ກີບ.
ການກະກຽມໃຫ້ແກ່ການກະທຳຜິດ, ຄວາມພະຍາຍາມກໍ່ການກະທຳຜິດ ກໍຈະຖືກລົງໂທດເຊັ່ນກັນ.
ບຸກຄົນໃດ ຫາກຮູ້ວ່າແມ່ນເງິນປອມ ແຕ່ຍັງນຳອອກມາໃຊ້ ກໍຈະຖືກລົງໂທດຕັດອິດສະລະພາບ ແຕ່ ສາມເດືອນ ຫາ ຫ້າປີ ແລະ ຈະຖືກປັບໃໝ ແຕ່ 2,000,000 ກີບ ຫາ 5,000,000 ກີບ.
ບຸກຄົນໃດ ຫາກຮູ້ວ່າຕົນມີເງິນປອມຢູ່ໃນຄອບຄອງ ແຕ່ບໍ່ໄດ້ແຈ້ງຕໍ່ເຈົ້າໜ້າທີ່ ຈະຖືກລົງໂທດຕັດອິດສະລະພາບ ແຕ່ສາມເດືອນ ຫາ ສອງປີ ແລະ ຈະຖືກປັບໃໝ ແຕ່ 1,000,000 ກີບ ຫາ 5,000,000 ກີບ.
Lao Youth Radio FM90MHz
