ໃຜຈະໄປຄິດວ່າ “ໜູສອງໂຕ” ທີ່ກຳລັງເປີດເສິກແຍ່ງອາຫານກັນ ຈະກາຍມາເປັນພາບຖ່າຍສັດປ່າທີ່ໂດ່ງດັງທີ່ສຸດໃນໂລກ ນີ້ຄືຜົນງານທີ່ມີຊື່ວ່າ “Station Squabble” ໂດຍຝີມືຂອງ ແຊມ ໂຣວ໌ລີ (Sam Rowley) ຊ່າງພາບໜຸ່ມຊາວອັງກິດ ທີ່ສາມາດຄວ້າລາງວັນຂວັນໃຈມະຫາຊົນ Wildlife Photographer of the Year LUMIX People’s Choice Award 2020 ມາຄອງໄດ້ຢ່າງສົດງົດງາມ ໂດຍເອົາຊະນະພາບຖ່າຍທີ່ສົ່ງເຂົ້າປະກວດຈາກທົ່ວໂລກກວ່າ 48,000 ພາບ
ຄວາມພະຍາຍາມ 5 ຄືນເຕັມ ເທິງພື້ນທີ່ເຕັມໄປດ້ວຍຝຸ່ນ
ແຮງບັນດານໃຈຂອງພາບນີ້ ເລີ່ມຕົ້ນຈາກການທີ່ ແຊມ ໄດ້ເບິ່ງຄລິບວິດີໂອສັ້ນກ່ຽວກັບໜູໃນສະຖານີລົດໄຟໃຕ້ດິນ ທີ່ໝູ່ສົ່ງໃຫ້. ເຂົາຈຶ່ງຕັດສິນໃຈແບກກ້ອງລົງໄປປັກຫຼັກຢູ່ທີ່ສະຖານີລົດໄຟໃຕ້ດິນ ໃຈກາງກຳແພງນະຄອນລອນດອນ
“ຄວາມສຳເລັດນີ້ບໍ່ໄດ້ມາເພາະໂຊກຊ່ວຍ” ເພາະ ແຊມ ຕ້ອງໃຊ້ຄວາມອົດທົນຢ່າງສູງ ດ້ວຍການລົງໄປນອນຂວ້ຳໜ້າກັບພື້ນຊານຊາລາ ທີ່ທັງເປິເປື້ອນ ແລະ ເຕັມໄປດ້ວຍຝຸ່ນ ໃນຊ່ວງເດິກທີ່ຜູ້ໂດຍສານເລີ່ມບາງຕາ ເພື່ອໃຫ້ມຸມກ້ອງຢູ່ໃນລະດັບສາຍຕາດຽວກັນກັບພວກມັນ ໂດຍເຂົາຕ້ອງເຮັດແບບນີ້ຕິດຕໍ່ກັນດົນເຖິງ 5 ຄືນເຕັມໆ.
ຈັງຫວະຊີວິດພຽງ “ເສດສ່ຽວວິນາທີ”
ແຊມ ໄດ້ເລົ່າເຖິງນາທີທອງນັ້ນວ່າ: ປົກກະຕິແລ້ວ ພວກໜູມັກຈະແລ່ນວົນຊອກຫາເສດອາຫານທີ່ຄົນເຮັດຕົກໄວ້, ແຕ່ໂອກາດທີ່ຈະເຫັນພວກມັນເປີດເສິກແຍ່ງຊິງອາຫານກັນນັ້ນ ເກີດຂຶ້ນໄດ້ຍາກຫຼາຍ. ໃນຄືນນັ້ນ ພວກມັນບັງເອີນໄປເຈິເສດເຂົ້າຈີ່ຊິ້ນນ້ອຍໆຊິ້ນດຽວກັນ ການຕໍ່ສູ້ຈຶ່ງເກີດຂຶ້ນ ແລະ ຈົບລົງພາຍໃນເວລາພຽງເສດສ້ຽວວິນາທີເທົ່ານັ້ນ ກ່ອນທີ່ໂຕທີ່ຊະນະຈະຄາບເສດເຂົ້າຈີ່ແລ່ນໜີໄປຢ່າງວ່ອງໄວ.
ສິ່ງເຕືອນໃຈເຖິງ “ສັດປ່າໃນເມືອງໃຫຍ່”
ທາງດ້ານ ເຊີຣ໌ ໄມເຄີລ ດິກສັນ ຜູ້ອຳນວຍການພິພິທະພັນປະຫວັດສາດທຳມະຊາດລອນດອນ (Natural History Museum) ໄດ້ກ່າວຊົມເຊີຍວ່າ: ພຶດຕິກຳຂອງໜູເຫຼົ່ານີ້ ຖືກຫຼໍ່ຫຼອມຂຶ້ນມາຈາກວິຖີຊີວິດປະຈຳວັນຂອງມະນຸດ ທັງລະບົບຄົມມະນາຄົມທີ່ພວກເຮົາໃຊ້ ແລະ ເສດອາຫານພວກເຮົາຖິ້ມຂ້ວາງ.
ພາບນີ້ຈຶ່ງເປັນສິ່ງເຕືອນໃຈຊັ້ນດີວ່າ ເຖິງແມ່ນພວກເຮົາຈະຍ່າງຜ່ານໄປຜ່ານມາຢູ່ທຸກໆວັນ ແຕ່ແທ້ຈິງແລ້ວ ມະນຸດພວກເຮົາມີຄວາມຜູກພັນ ແລະ ເຊື່ອມໂຍງຢ່າງໃກ້ຊິດກັບທຳມະຊາດ ທີ່ຢູ່ໃກ້ຕົວພວກເຮົາພຽງແຕ່ເອື້ອມມື.
ແຫຼ່ງອ້າງອີງ: Natural History Museum, London
