ສູນຂ່າວສານການແພດສຸຂະສຶກສາ, ກະຊວງສາທາລະນະສຸກ ໄດ້ເຜີຍແຜ່ຂໍ້ມູນເຕືອນໄພກ່ຽວກັບ “ໄວຣັສຮັນຕາ” (Hantavirus) ເຊິ່ງເປັນເຊື້ອໄວຣັສອັນຕະລາຍທີ່ຕິດຕໍ່ມາຈາກສັດຈຳພວກໜູ ພ້ອມທັງເນັ້ນຢ້ຳໃຫ້ປະຊາຊົນຮັບຮູ້ຂໍ້ມູນຢ່າງທັນເວລາ ເພື່ອເຝົ້າລະວັງ ແລະ ປົກປ້ອງຕົນເອງຢ່າງຖືກວິທີ.
ໄວຣັສຮັນຕາ ແມ່ນຫຍັງ?
ໄວຣັສຮັນຕາ ແມ່ນເຊື້ອໄວຣັສທີ່ພົບໄດ້ໃນສັດຈຳພວກໜູ ແລະ ສາມາດແຜ່ເຊື້ອມາສູ່ຄົນໄດ້ ເຖິງແມ່ນວ່າໃນປັດຈຸບັນຈະມີໂອກາດພົບເຫັນໄດ້ໜ້ອຍກໍຕາມ.
ຊ່ອງທາງການຕິດຕໍ່ສູ່ຄົນ
ຄົນເຮົາສາມາດຕິດເຊື້ອໄວຣັສນີ້ໄດ້ໂດຍກົງ ຜ່ານຮູບແບບຕ່າງໆ ດັ່ງນີ້:
• ການສຳຜັດໂດຍກົງ ກັບພວກໜູທີ່ຕິດເຊື້ອ.
• ການສຳຜັດສິ່ງຂັບຖ່າຍ ເປັນຕົ້ນແມ່ນ ປັດສະວະ (ຢ່ຽວ), ອາຈົມ ຫຼື ນ້ຳລາຍ ຂອງໜູທີ່ມີເຊື້ອ.
• ປະຫວັດການລະບາດທີ່ຜ່ານມາ ເຄີຍມີລາຍງານການຕິດເຊື້ອຈາກ ຄົນສູ່ຄົນ ເຊັ່ນດຽວກັນ ແຕ່ຖືວ່າເກີດຂຶ້ນໄດ້ໜ້ອຍທີ່ສຸດ.
ສະຖິຕິການຕິດເຊື້ອ ແລະ ອັດຕາການເສຍຊີວິດທົ່ວໂລກ
ໃນແຕ່ລະປີ, ຄາດວ່າມີຜູ້ຕິດເຊື້ອໄວຣັສຮັນຕາທົ່ວໂລກ ລະຫວ່າງ 10,000 ຫາ ຫຼາຍກວ່າ 100,000 ຄົນ. ເຖິງວ່າຈະເປັນໂລກທີ່ເກີດຂຶ້ນໄດ້ໜ້ອຍ, ແຕ່ອັດຕາການເສຍຊີວິດແມ່ນໜ້າເປັນຫ່ວງ:
• ທະວີບອາຊີ ແລະ ເອີຣົບ: ມີອັດຕາການເສຍຊີວິດ ຢູ່ປະມານ ໜ້ອຍກວ່າ 1% ຫາ 15%.
• ທະວີບອາເມລິກາ: ມີຄວາມຮຸນແຮງສູງກວ່າ ເຊິ່ງອັດຕາການເສຍຊີວິດອາດສູງໄດ້ເຖິງ 50%.
ວິທີການປ້ອງກັນ ແລະ ເຝົ້າລະວັງ
“ການຮັບຮູ້ຂໍ້ມູນທັນເວລາ ຄືຫົວໃຈສຳຄັນໃນການປົກປ້ອງຕົນເອງ” ກະຊວງສາທາລະນະສຸກ ໄດ້ແນະນຳໃຫ້ປະຊາຊົນເອົາໃຈໃສ່ຮັກສາອະນາໄມທີ່ຢູ່ວ່ານອາໄສ ດັ່ງນີ້:
1. ອະນາໄມເຮືອນຊານໃຫ້ສະອາດຈົບງາມ, ບໍ່ໃຫ້ເປັນບ່ອນຮົກຮຸງຮັງ.
2. ຈັດເກັບອາຫານ ແລະ ນ້ຳດື່ມໃຫ້ມິດຊິດ ເພື່ອບໍ່ໃຫ້ເປັນແຫຼ່ງອາຫານຂອງໜູ.
3. ຫຼີກເວັ້ນການສຳຜັດກັບໜູ ຫຼື ສິ່ງຂັບຖ່າຍຂອງໜູໂດຍກົງ.
ປະຊາຊົນສາມາດຕິດຕາມຂໍ້ມູນຂ່າວສານດ້ານສຸຂະພາບ ແລະ ວິທີການປ້ອງກັນໂລກພະຍາດຕ່າງໆ ຢ່າງຖືກຕ້ອງໄດ້ທີ່ ເຟສບຸກເພຈ໌ (Facebook Page): ສູນຂ່າວສານການແພດສຸຂະສຶກສາ ກະຊວງສາທາລະນະສຸກ.
ທີ່ມາ: ສູນຂ່າວສານການແພດສຸຂະສຶກສາ
ຮຽບຮຽງໂດຍ: Lao Youth Radio
