(4 ພຶດສະພາ 2026, ແຂວງອັດຕະປື) – ອີງຕາມແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X (2026-2030), ແຂວງອັດຕະປື ໄດ້ກຳນົດເປົ້າໝາຍສູ້ຊົນພັດທະນາສີມືແຮງງານໃຫ້ໄດ້ທັງໝົດ 22.500 ຄົນ ເພື່ອຕອບສະໜອງຄວາມຕ້ອງການຂອງຕະຫຼາດແຮງງານ ແລະ ຍົກລະດັບຄຸນນະພາບຊີວິດຂອງປະຊາຊົນ.
ແຜນການພັດທະນາ ແລະ ຕົວເລກຄາດໝາຍ:
ພາກລັດ: ຈະດຳເນີນການຝຶກອົບຮົມ ແລະ ທົດສອບສີມືແຮງງານໃຫ້ໄດ້ 17.500 ຄົນ. ໃນນີ້ປະກອບມີການຝຶກໃນສູນ 1.000 ຄົນ, ນອກສູນ 500 ຄົນ ແລະ ທົດສອບມາດຕະຖານສີມືແຮງງານແຫ່ງຊາດໃຫ້ໄດ້ 16.000 ຄົນ.
ພາກເອກະຊົນ: ຊຸກຍູ້ຫົວໜ່ວຍທຸລະກິດພາຍໃນແຂວງ ໃຫ້ມີສ່ວນຮ່ວມພັດທະນາສີມືແຮງງານໃຫ້ໄດ້ 5.000 ຄົນ.
ການສ້າງຫຼັກສູດ ແລະ ບຸກຄະລາກອນ: ເລັ່ງສ້າງຫຼັກສູດໃໝ່ໃນຫົວໜ່ວຍແຮງງານ 10 ແຫ່ງ, ປັບປຸງຫຼັກສູດເດີມ 30 ແຫ່ງ ແລະ ສ້າງຄວາມເຂັ້ມແຂງໃຫ້ຄູຝຶກສີມືແຮງງານ 15 ຄົນ.
ການຈັດຫາງານ: ສົ່ງເສີມການຈັດຫາວຽກເຮັດງານທຳເຂົ້າສູ່ຕະຫຼາດແຮງງານທັງພາຍໃນ ແລະ ຕ່າງປະເທດ ໃຫ້ໄດ້ 4.000 ຄົນ.
ວຽກງານຈຸດສຸມໃນໄລຍະ 5 ປີ ແຂວງອັດຕະປື ຈະເລັ່ງໃສ່ການຍົກລະດັບສີມືແຮງງານໃຫ້ມີຄວາມຫຼາກຫຼາຍສາຂາອາຊີບ ແລະ ມີລະບຽບວິໄນ ພ້ອມດຽວກັນນັ້ນ ຍັງຈະໄດ້ສຸມໃສ່:
1) ສ້າງມາດຕະຖານ ແລະ ປະກັນຄຸນນະພາບ: ສ້າງລະບົບຢັ້ງຢືນສີມືແຮງງານໃຫ້ກຸ່ມເປົ້າໝາຍຕ່າງໆ ຕາມຄວາມຕ້ອງການຕົວຈິງຂອງຫົວໜ່ວຍແຮງງານ.
2) ແນະນຳອາຊີບໃຫ້ຊາວໜຸ່ມ: ໃຫ້ຄຳປຶກສາການຊອກວຽກເຮັດງານທຳດ້ວຍຕົນເອງ ແລະ ການຂຶ້ນທະບຽນຜູ້ວ່າງງານ.
3) ຫັນການຈ້າງງານນອກລະບົບ ເຂົ້າສູ່ໃນລະບົບ: ສ້າງກົນໄກປະສານງານກັບຄູ່ຮ່ວມງານທັງພາກລັດ ແລະ ເອກະຊົນ ເພື່ອຄວາມໝັ້ນຄົງ ແລະ ເປັນທຳ.
4) ຂະຫຍາຍຕາໜ່າງບໍລິການ: ປັບປຸງກົນໄກການບໍລິການຈັດຫາງານໃຫ້ຖືກຕ້ອງ ແລະ ປອດໄພ ໂດຍຈະຂະຫຍາຍຈຸດບໍລິການລົງສູ່ບັນດາເມືອງໃຫ້ໄດ້ 4 ເມືອງ.
ທີ່ມາ: ຂ່າວແຂວງອັດຕະປື
