ສະຖາບັນເລືອດແຫ່ງຊາດ ອົງການກາແດງແຫ່ງຊາດລາວ ອອກແຈ້ງການດ່ວນທີ່ສຸດ ເຖິງພໍ່ແມ່ປະຊາຊົນ ແລະ ຊັ້ນຄົນຕ່າງໆ ໃນທົ່ວສັງຄົມ ກ່ຽວກັບສະພາບຄັງສະສົມເລືອດທີ່ພວມຢູ່ໃນພາວະ “ຂາດແຄນຢ່າງໜັກ” ເຊິ່ງອາດສົ່ງຜົນກະທົບຕໍ່ການຊ່ວຍເຫຼືອຊີວິດຄົນເຈັບໃນໄລຍະວັນພັກບຸນປີໃໝ່ລາວ ທີ່ກຳລັງຈະມາເຖິງ.
ວິກິດການເລືອດໃນຊ່ວງເທສະການ ເນື່ອງຈາກໃນໄລຍະບຸນປີໃໝ່ລາວ ເປັນຊ່ວງທີ່ມີຄວາມສ່ຽງສູງໃນການເກີດອຸບັດຕິເຫດຕາມທ້ອງຖະໜົນ ແລະ ມີຄວາມຕ້ອງການນຳໃຊ້ເລືອດເພື່ອຊ່ວຍເຫຼືອຊີວິດຄົນເຈັບສຸກເສີນຫຼາຍກວ່າປົກກະຕິ. ໃນຂະນະດຽວກັນ, ປະລິມານເລືອດສຳຮອງທີ່ມີຢູ່ໃນປັດຈຸບັນແມ່ນບໍ່ພຽງພໍທີ່ຈະຕອບສະໜອງຕໍ່ຄວາມຕ້ອງການທີ່ເພີ່ມຂຶ້ນນີ້.
ຂໍເຊີນຊວນຮ່ວມບໍລິຈາກເລືອດ ໜຶ່ງຢົດຊ່ວຍຊີວິດ ສະຖາບັນເລືອດແຫ່ງຊາດ ຈຶ່ງໄດ້ອອກປາກເຊີນຊວນມາຍັງທຸກທ່ານທີ່ມີສຸຂະພາບແຂງແຮງ, ທັງພາກລັດ, ເອກະຊົນ ແລະ ບຸກຄົນທົ່ວໄປ ຮ່ວມເປັນສ່ວນໜຶ່ງໃນການແບ່ງປັນນ້ຳໃຈ ດ້ວຍການບໍລິຈາກເລືອດ ເພື່ອຕໍ່ລົມຫາຍໃຈໃຫ້ກັບຄົນເຈັບທົ່ວປະເທດ.
ທ່ານສາມາດເດີນທາງໄປບໍລິຈາກໄດ້ຕາມຈຸດສະດວກ ດັ່ງນີ້:
• ນະຄອນຫຼວງວຽງຈັນ: ສະຖາບັນເລືອດແຫ່ງຊາດ ທີ່ບ້ານ ຊຽງຢຶນ ເມືອງ ຈັນທະບູລີ (ເຂດທາດດຳ-ສະຖານີວິທະຍຸກະຈາຍສຽງແຫ່ງຊາດ)
• ຕ່າງແຂວງ: ສູນເລືອດແຂວງໃນທົ່ວປະເທດ.
• ເວລາໃຫ້ບໍລິການ: ເປີດຮັບບໍລິຈາກທຸກມື້ ຕັ້ງແຕ່ເວລາ 08:00 ໂມງ ຫາ 18:00 ໂມງ, ເບີໂທ: 021214763
ການບໍລິຈາກເລືອດຂອງທ່ານໃນມື້ນີ້ ຄືຂອງຂວັນອັນລ້ຳຄ່າທີ່ສຸດສຳລັບຜູ້ທີ່ພວມລໍຖ້າຄວາມຫວັງ.
Lao Youth Radio
