ໃນເດືອນ ພຶດສະພາ ລະຫວ່າງວັນທີ 05-11, 2026 ນີ້ ສອງສະຖານທີ່ ນະຄອນຫຼວງວຽງຈັນ ແລະ ວັງວຽງ ຈະກາຍເປັນເວທີພົບປະ ສາກົນ ທີ່ ອາດີດຊາວໜຸ່ມເດີນທະເລ 11 ປະເທດ ອາຊຽນ-ຍີ່ປຸ່ນ ຈະມາເຕົ້າໂຮມ ຮ່ວມສົນທະນາ ເຮັດກິດຈະກໍາຊ່ວຍເຫຼືອສັງຄົມ ແລະ ທ່ອງທ່ຽວ ຮຽນຮູ້ ກ່ຽວກັບ ວັດທະນາທໍາ ທໍາມະຊາດ ທີ່ສວຍງາມ ຢູ່ ສປປ ລາວ.
ງານນີ້ແມ່ນງານຫຍັງ?
ສູນກາງຊາວໜຸ່ມປະຊາຊົນປະຕິວັດລາວ (ສຊປລ) ໄດ້ຮັບໜ້າທີ່ສຳຄັນ ໃນການເປັນເຈົ້າພາບຈັດ ງານພົບປະອາດີດຊາວໜຸ່ມເດີນທະເລອາຊຽນ-ຍີ່ປຸ່ນ ຄັ້ງທີ 34 ຫຼືທີ່ຮູ້ຈັກໃນຊື່ 34th SIGA ໃນລະຫວ່າງວັນທີ 5-11 ພຶດສະພາ 2026 ທີນະຄອນຫຼວງວຽງຈັນ ແລະ ແຂວງວຽງຈັນ.
ຄິດງ່າຍໆວ່ານີ້ຄືງານພົບປະຊາວໜຸ່ມຈາກທົ່ວປະເທດອາຊຽນ + ຍີ່ປຸ່ນ ທີ່ເຄີຍໄດ້ເຂົ້າຮ່ວມໂຄງການເດີນທະເລນຳກັນ ຈະໄດ້ ກັບມາພົບກັນອີກຄັ້ງ ແລະ ແລກປ່ຽນ ສ້າງການເຊື່ອມຕໍ່ໃໝ່ ໂດຍເລືອກ ລາວ ເປັນປະເທດເຈົ້າພາບ.
7 ວັນ ມີຫຼາຍກິດຈະກຳ ທີ່ໜ້າຕິດຕາມ:
5-6 ພຶດສະພາ — ຊາວໜຸ່ມຈາກທົ່ວພາກພື້ນຈະລົງມື ເຮັດກິດຈະກໍາຊ່ວຍເຫຼືອສັງຄົມຢູ່ ໂຮງຮຽນເດັກພິການ ປາກກືກ ແລະ ຫູໜວກ ຢູ່ ນະຄອນຫຼວງວຽງຈັນ.
7 ພຶດສະພາ — ເປີດໂຕງານ ຢ່າງເປັນທາງການດ້ວຍ ກອງປະຊຸມຄະນະປະທານສະໂມສອນ ຊາວໜຸ່ມເດີນທະເລ ອາຊຽນ-ຍີ່ປຸ່ນ ຄັ້ງທີ 85 ແລະ ພິທີຕ້ອນຮັບ ຢ່າງເປັນທາງການ.
8 ພຶດສະພາ — ພິທີເປີດງານຢ່າງເປັນທາງການ, ຕິດຕາມດ້ວຍ ການທ່ຽວຊົມ ພຣະທາດຫຼວງ, ປະຕູໄຊ ແລະ ພິພິທະພັນສິລະປະລາວ.
9-10 ພຶດສະພາ — ເດີນທາງໄປວັງວຽງ ຮ່ວມເຮັດຫຼາຍກິດຈະກຳປິ່ນອ້ອມ: ລ່ອງເຮືອຄາຢັກ ·
ຂີ່ລົດບັກກີ້ ·
Zip-lining ·
ບລູລາກູນ ເປັນຕົ້ນ.
ຄ່ຳວັນທີ 10 — ປິດງານດ້ວຍພິທີບາສີສູ່ຂວັນ ຕາມປະເພນີລາວ ແລ້ວຈະມີການສົ່ງຕໍ່ທຸງ ໃຫ້ ປະເທດກຳປູເຈຍ ຮັບໜ້າທີ່ໃນການເປັນເຈົ້າພາບ SIGA 2027 ຕໍ່ໄປ.
ເປັນຫຍັງຕ້ອງສົນໃຈງານນີ້?
ນີ້ບໍ່ແມ່ນເປັນພຽງແຕ່ ງານກອງປະຊຸມທຳມະດາ. ງານ SIGA ຄັ້ງນີ້ ຖືເປັນວາລະສະເຫຼິມສະຫຼອງ:
49 ປີ ຂອງໂຄງການເດີນທະເລອາຊຽນ-ຍີ່ປຸ່ນ
28 ປີ ທີ່ຊາວໜຸ່ມລາວໄດ້ເຂົ້າຮ່ວມໂຄງການ
34 ປີ ຂອງງານພົບປະ SIGA
ນອກຈາກນີ້ ຍັງເປັນການດຶງດູດການຮ່ວມມື, ການເຜີຍແຜ່ ວັດທະນາທໍາລາວ ທັງຍັງເປັນການສົ່ງເສີມ ການທ່ອງທ່ຽວລາວ ອີກດ້ວຍ.
