ເມື່ອຫວນຄືນໜ້າປະຫວັດສາດແຫ່ງການຕໍ່ສູ້ກູ້ຊາດ, ວັນທີ 14 ເມສາ 1955 ໄດ້ຖືກຈາລຶກໄວ້ເປັນວັນແຫ່ງການກໍາເນີດຂອງ “ຄະນະຊາວໜຸ່ມຕະລຸມບອນ” 
– ຕົ້ນກໍາເນີດຂອງ ຄະນະຊາວໜຸ່ມປະຊາຊົນປະຕິວັດລາວ ໃນປັດຈຸບັນ. ໃນໂອກາດຄົບຮອບ 71 ປີນີ້, ພວກເຮົາຮ່ວມກັນສະເຫຼີມສະຫຼອງດ້ວຍຄວາມພາກພູມໃຈ ໃນຖານະທີ່ຊາວໜຸ່ມຄື “ແຂນຂວາ” ຂອງພັກ ແລະ ເປັນ “ກະດູກສັນຫຼັງ” ທີ່ແຂງແກ່ນຂອງປະເທດຊາດ.
ຕະຫຼອດໄລຍະ 7 ທົດສະວັດທີ່ຜ່ານມາ, ຊາວໜຸ່ມລາວແຕ່ລະຮຸ່ນໄດ້ພິສູດໃຫ້ເຫັນເຖິງນໍ້າໃຈເສຍສະຫຼະອັນສູງສົ່ງ. ທ່າມກາງແປວໄຟແຫ່ງສົງຄາມກູ້ຊາດ, ຊາວໜຸ່ມໄດ້ກາຍເປັນກໍາລັງປະຈັນບານທີ່ບຸກທະລຸໃນທຸກສະໜາມຮົບ, ບໍ່ຫວັ່ນໄຫວຕໍ່ອຸປະສັກ ແລະ ຄວາມຕາຍ ເພື່ອແລກເອົາເອກະລາດ ແລະ ອິດສະຫຼະພາບມາໃຫ້ປວງຊົນ. ຄໍາຂວັນທີ່ວ່າ “ຍອມຕາຍດີກວ່າເສຍເອກະລາດ” ບໍ່ແມ່ນພຽງແຕ່ຕົວອັກສອນ, ແຕ່ມັນຄືເລືອດເນື້ອ ແລະ ຈິດວິນຍານທີ່ຊາວໜຸ່ມລາວໄດ້ອຸທິດໄວ້ໃຫ້ແກ່ຜືນແຜ່ນດິນແມ່.
ພາຍຫຼັງການສະຖາປະນາ ສປປ ລາວ, ບົດບາດຂອງຊາວໜຸ່ມບໍ່ໄດ້ຫຼຸດນ້ອຍຖອຍລົງ, ແຕ່ໄດ້ຫັນປ່ຽນສູ່ການເປັນຜູ້ນໍາໜ້າໃນການສ້າງສາພັດທະນາ. ໂດຍຜ່ານຂໍ້ແຂ່ງຂັນ “4 ບຸກ” ທີ່ຕິດພັນກັບມະຕິ 3 ສ້າງ, ຊາວໜຸ່ມໄດ້ກາຍເປັນກໍາລັງຕົ້ນຕໍໃນການຫັນປ່ຽນແນວທາງຂອງພັກໃຫ້ກາຍເປັນພຶດຕິກໍາຕົວຈິງ, ເປັນຜູ້ທີ່ນໍາເອົາຄວາມຮູ້, ຄວາມສາມາດ ແລະ ເຕັກໂນໂລຊີໃໝ່ໆ ມາຮັບໃຊ້ຊາດຢ່າງມີຫົວຄິດປະດິດສ້າງ.
ໃນໂອກາດອັນສະຫງ່າລາສີນີ້ນີ້, ມັນຄືສຽງກອງໄຊທີ່ປຸກລະດົມໃຫ້ຊາວໜຸ່ມຮຸ່ນສືບທອດ ຕ້ອງໄດ້ເພີ່ມທະວີຄວາມຮັບຜິດຊອບຂອງຕົນໃຫ້ສູງຂຶ້ນ:
ດ້ານການເມືອງ-ແນວຄິດ: ຕ້ອງມີຄຸນສົມບັດສິນທໍາປະຕິວັດ, ຮັກຊາດ, ຮັກບ້ານເກີດເມືອງນອນ ແລະ ມີຄວາມຈົງຮັກພັກດີຕໍ່ພັກ-ລັດ ຢ່າງສະເໝີຕົ້ນສະເໝີປາຍ.
ດ້ານການພັດທະນາ: ຕ້ອງໝັ່ນຮໍ່າຮຽນ, ຝຶກຝົນຫຼໍ່ຫຼອມຕົນເອງໃຫ້ມີທັງ “ຄຸນ” ແລະ “ຊ່ວຍ”, ເພື່ອເປັນຜູ້ສືບທອດທີ່ສົມບູນແບບ.
ດ້ານຄວາມສາມັກຄີ: ຕ້ອງເຕົ້າໂຮມກໍາລັງແຮງຂອງຊາວໜຸ່ມ-ໄວໜຸ່ມທົ່ວປະເທດ ໃຫ້ເປັນປຶກແຜ່ນແໜ້ນໜາ ເພື່ອເປັນກໍາລັງແຮງທີ່ບໍ່ມີມື້ບົກແຫ້ງຂອງປະເທດຊາດ.
“71 ປີ ແຫ່ງການເຕີບໃຫຍ່, 71 ປີ ແຫ່ງການເສຍສະຫຼະ” ຄະນະຊາວໜຸ່ມປະຊາຊົນປະຕິວັດລາວ ຈະຍັງຄືນົກອິນຊີທີ່ກາງປີກປົກປ້ອງຟ້າ, ເປັນກໍາລັງປະຈັນບານທີ່ບໍ່ເຄີຍຖອຍຫຼັງ ແລະ ຈະສືບຕໍ່ຂຽນໜ້າປະຫວັດສາດໃໝ່ທີ່ຮຸ່ງເຮືອງສີວິໄລໃຫ້ແກ່ ສປປ ລາວ ຕະຫຼອດໄປ.
ຊົມເຊີຍ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 71 ປີ ຢ່າງສຸດໃຈ!
Lao Youth Radio FM90MHz
