ລັດວິສາຫະກິດສະບຽງອາຫານ ນະຄອນຫຼວງວຽງຈັນ (ນວ) ຢືນຢັນຄວາມພ້ອມ 100% ໃນການສະໜອງຊີ້ນສັດໃຫ້ພຽງພໍກັບຄວາມຕ້ອງການຂອງສັງຄົມ ໃນໄລຍະສະເຫຼີມສະຫຼອງບຸນປີໃໝ່ລາວ ພສ 2569 ທີ່ກຳລັງຈະມາເຖິງ.
ທ່ານ ຄຳຫຼ້າ ແສງດາວົງ ຜູ້ອຳນວຍການໃຫຍ່ລັດວິສາຫະກິດສະບຽງອາຫານ ນວ ເປີດເຜີຍວ່າ: ເພື່ອບໍ່ໃຫ້ເກີດບັນຫາຂາດແຄນ, ໂຮງງານຂ້າສັດຂອງລັດວິສາຫະກິດຈະ ເປີດບໍລິການທຸກມື້ ໂດຍບໍ່ມີວັນພັກ ແນໃສ່ສະໜອງຊີ້ນໝູ, ຊີ້ນງົວ ແລະ ຊີ້ນໄກ່ ໃຫ້ເຕັມອີ່ມທົ່ວທ້ອງຕະຫຼາດ.
ເປີດຕົວເລກລາຄາ ແລະ ປະລິມານການສະໜອງ
• ຊີ້ນໝູ: ລາຄາປັບຫຼຸດລົງ 10,000-20,000 ກີບ/ກິໂລ ເມື່ອທຽບໃສ່ປີຜ່ານມາ (ເນື່ອງຈາກການລ້ຽງພາຍໃນຂະຫຍາຍຕົວສູງ).
• ປະລິມານ: ສະໜອງໝູອອກສູ່ຕະຫຼາດ 800-1,000 ໂຕ/ມື້ ແລະ ໄກ່ປະມານ 4,000 ໂຕ/ມື້.
• ຊີ້ນງົວ ແລະ ຊີ້ນໄກ່: ລາຄາຍັງຮັກສາລະດັບປົກກະຕິ, ອາດມີການເໜັງຕີງຕາມກົນໄກເງິນເຟີ້ແຕ່ບໍ່ເກີນ 10%.
ເຖິງວ່າຕົ້ນທຶນການຂົນສົ່ງ ແລະ ລາຄານໍ້າມັນຈະສູງຂຶ້ນ, ແຕ່ລັດວິສາຫະກິດໄດ້ສົມທົບກັບບັນດາຟາມລ້ຽງສັດຢ່າງໃກ້ຊິດ. ທ່ານຜູ້ອຳນວຍການໃຫຍ່ ຍັງໄດ້ຮຽກຮ້ອງໃຫ້ພໍ່ແມ່ປະຊາຊົນ ຊ່ວຍກັນສະໜັບສະໜູນຊີ້ນສັດທີ່ຜະລິດພາຍໃນ ແລະ ຂໍຄວາມເຫັນໃຈຈາກຜູ້ນຳເຂົ້າ ໃຫ້ຊ່ວຍປົກປ້ອງຜູ້ຜະລິດລາວ ເພື່ອຄວາມໝັ້ນຄົງດ້ານສະບຽງອາຫານຂອງຊາດໃນໄລຍະຍາວ.
ໃນຕໍ່ໜ້າ, ພາກສ່ວນກ່ຽວຂ້ອງຈະຮ່ວມກັນວາງກົນໄກຄຸ້ມຄອງການລ້ຽງ ແລະ ການນຳເຂົ້າໃຫ້ສົມດຸນ ເພື່ອໃຫ້ຜູ້ຜະລິດພາຍໃນສາມາດດຳເນີນທຸລະກິດໄດ້ຢ່າງຍືນຍົງ.
ທີ່ມາ: KPL
