ຫ້ອງວ່າການແຂວງສະຫວັນນະເຂດ ອອກແຈ້ງການເລກທີ 861/ຫວກ ລົງວັນທີ 2 ເມສາ 2026 ວາງມາດຕະການຈັດງານບຸນປີໃໝ່ລາວ ປະຈຳປີ ຈສ 2569 (ຄສ 2026) ເພື່ອຮັບປະກັນຄວາມສາມັກຄີ, ການອະນຸລັກຮີດຄອງປະເພນີ ແລະ ຄວາມເປັນລະບຽບຮຽບຮ້ອຍໃນທົ່ວແຂວງ.
ທາງການແຂວງເນັ້ນຢ້ຳໃຫ້ທຸກພາກສ່ວນຈັດງານລະຫວ່າງວັນທີ 14-16 ເມສາ 2026 ໂດຍເນັ້ນໃສ່ການບາສີສູ່ຂວັນ ແລະ ກິດຈະກຳຢູ່ວັດວາອາຮາມ ຫຼື ພາຍໃນຄອບຄົວ. ສຳລັບພາກລັດ ແມ່ນໃຫ້ຫຼີກລ່ຽງການຈັດງານລ້ຽງທີ່ສິ້ນເປືອງງົບປະມານ ຕາມນະໂຍບາຍປະຢັດມັດທະຍັດຂອງພັກ-ລັດ.
5 ຂໍ້ກຳນົດຈັດໜັກ ເພື່ອຄວາມສະຫງົບສຸກ:
1. ການຄຸ້ມຄອງລາຄາສິນຄ້າ ແລະ ປາກທ້ອງ:
ມອບໃຫ້ພະແນກອຸດສາຫະກຳ ແລະ ການຄ້າ, ພະແນກກະສິກຳ ແລະ ສິ່ງແວດລ້ອມ ພ້ອມກັບຄະນະປົກຄອງ 14 ເມືອງ ລົງຕິດຕາມລາຄາສິນຄ້າຢ່າງໃກ້ຊິດ. ຫ້າມສວຍໂອກາດຂຶ້ນລາຄາ ອາຫານ, ເຄື່ອງອຸປະໂພກ, ຄ່າລົດໂດຍສານ ແລະ ຄ່າບໍລິການທ່ອງທ່ຽວໂດຍບໍ່ມີເຫດຜົນ ພ້ອມທັງຊຸກຍູ້ການນຳໃຊ້ຜະລິດຕະພັນພາຍໃນ.
2. ການຮັກສາຄວາມສະອາດ ແລະ ເວນຍາມ:
ໃຫ້ທຸກພະແນກການ ແລະ ກົມກອງອ້ອມຂ້າງແຂວງ ສ້າງຂະບວນການອອກແຮງງານອະນາໄມສຳນັກງານ ແລະ ບ້ານເຮືອນ. ພ້ອມນັ້ນຕ້ອງມີການ ແບ່ງຄວາມຮັບຜິດຊອບເວນຍາມ ຢູ່ຕຶກອາຄານຕະຫຼອດໄລຍະບຸນ ເພື່ອໃຫ້ສາມາດປະສານງານໄດ້ປົກກະຕິ.
3. ການຮັກສາຄວາມສະຫງົບ ແລະ ຈາລະຈອນ:
ກຳລັງ ປກສ ຈະຈັດຕັ້ງເວນຍາມ 24 ຊົ່ວໂມງ ເພື່ອປ້ອງກັນອັກຄີໄພ ແລະ ອຸບັດຕິເຫດ. ມີການຈັດສັນເສັ້ນທາງບໍ່ໃຫ້ແອອັດ ແລະ ເພີ່ມການໂຄສະນາລະບຽບຈາລະຈອນຜ່ານທຸກສື່. ສ່ວນກຳລັງ ປກຊ ແມ່ນໃຫ້ຕິດຕາມກວດກາຊາຍແດນທັງທິດຕາເວັນອອກ ແລະ ຕາເວັນຕົກ ເພື່ອສະກັດກັ້ນປະກົດການຫຍໍ້ທໍ້.
4. ກົດລະບຽບການຫຼິ້ນນ້ຳ ແລະ ເວລາບັນເທີງ:
• ເວລາຫຼິ້ນນ້ຳ: ໃຫ້ຢຸດເຊົາການຫົດນ້ຳຕາມເສັ້ນທາງໃນເວລາ 18:00 ນາທີ (ຍົກເວັ້ນຈຸດທີ່ທາງການກຳນົດ).
• ຂໍ້ຫ້າມ: ຫ້າມເອົາຖັງນ້ຳຂຶ້ນລົດເລາະຫົດ, ຫ້າມຕັ້ງແທ່ນຫົດນ້ຳແຄມທາງໃຫຍ່, ຫ້າມໃຊ້ນ້ຳສີ ຫຼື ນ້ຳກ້ອນສາດໃສ່ກັນ.
• ສະຖານບັນເທີງ: (ຮ້ານຄາລາໂອເກະ, ຮ້ານອາຫານ, ງານບຸນ) ຕ້ອງເປີດ-ປິດ ຕາມໂມງກຳນົດ.
• ພື້ນທີ່ສ່ວນບຸກຄົນ: ຫ້າມເປີດສຽງດັງເກີນຂອບເຂດ ແລະ ຕ້ອງຢຸດຕິໃນເວລາ 23:00 ນາທີ.
5. ຄວາມປອດໄພທາງບົກ:
ຫ້າມຂັບຂີ່ພາຫະນະໄວເກີນກຳນົດ ແລະ ຫ້າມຂັບຂີ່ໃນຂະນະມຶນເມົາເດັດຂາດ ເພື່ອຄວາມປອດໄພຂອງຜູ້ໃຊ້ລົດໃຊ້ຖະໜົນ.
ຫ້ອງວ່າການແຂວງສະຫວັນນະເຂດ ໂດຍທ່ານ ອ່ອນລຳພັນ ບົວສີແກ້ວ ຫົວໜ້າຫ້ອງວ່າການແຂວງ ໄດ້ເນັ້ນຢ້ຳໃຫ້ທຸກພາກສ່ວນຮັບຊາບ ແລະ ຈັດຕັ້ງປະຕິບັດແຈ້ງການສະບັບນີ້ຢ່າງເຂັ້ມງວດ ເພື່ອໃຫ້ການສະຫຼອງປີໃໝ່ລາວປີນີ້ ເຕັມໄປດ້ວຍຄວາມສິລິມຸງຄຸນ ແລະ ມີຄວາມປອດໄພສູງສຸດ.
