ໃນວັນທີ 17 ມີນາ 2026 ນີ້, ທີ່ກະຊວງປ້ອງກັນປະເທດ, ສະຫາຍ ພົນຕີ ກົງທອງ ສຸຂະວົງ ຮອງລັດຖະມົນຕີກະຊວງປ້ອງກັນປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ສະຫາຍ ພັນເອກ ດີມີຕຼີ ຢາຊິນ ຕາງໜ້າກົມໃຫຍ່ຮ່ວມມືສາກົນດ້ານການທະຫານ ກະຊວງປ້ອງກັນປະເທດ ເເຫ່ງ ສ.ຣັດເຊຍ, ພ້ອມດ້ວຍຄະນະ ໃນໂອກາດທີ່ມາຢ້ຽມຍາມ ແລະ ເຮັດວຽກຢູ່ ສປປ ລາວ.
ໂອກາດນີ້, ສະຫາຍ ພັນເອກ ດີມີຕຼີ ຢາຊິນ ໄດ້ກ່າວຈຸດປະສົງ ແລະ ສະແດງຄວາມຂອບໃຈ ທີ່ທາງກະຊວງປ້ອງກັນປະເທດ ສປປ ລາວ ໄດ້ຕ້ອນຮັບຢ່າງອົບອຸ່ນ ພ້ອມກ່າວຈຸດປະສົງທີ່ມາໃນຄັ້ງນີ້ ເພື່ອກວດກາອາວຸດຍຸດໂທປະກອນ, ພາຫະນະເຕັກນິກການທະຫານທີ່ຜະລິດໂດຍ ສ.ຣັດເຊຍ (ອະດີດສະຫະພາບໂຊວຽດ) ທີ່ມີຢູ່ໃນກອງທັບປະຊາຊົນລາວ ໃນຂອບເຂດທົ່ວປະເທດ ໃນລະຫວ່າງວັນທີ 10-15 ມີນາ 2026 ການກວດກາຄັ້ງນີ້ ກໍເພື່ອຈະໄດ້ມີການສ້ອມແປງອາວຸດໃຫ້ມີປະສິດທິພາບ, ໃຫ້ໃຊ້ງານໄດ້ຍາວນານ, ແມ່ນໄດ້ກວດພາຫະສະເຕັກນິກ, ອາວຸດ, ຍຸດໂທ, ປືນ, ລົດຫຸ້ມເກາະ, ລົດຕັງ ເພື່ອໃຫ້ມີປະສິດທິຜົນໃຫ້ໄດ້ຮັບໃຊ້ຍາວນານ ແລະ ຍັງສະເໜີທາງຝ່າຍລາວ ເພື່ອສຸມໃສ່ໃນການເຮັດວຽກໃນຕໍ່ໜ້າເພື່ອໃຫ້ການເຮັດງານມີປະສິດທິຜົນສູງ.
ໃນໂອກາດນີ້, ສະຫາຍ ພົນຕີ ກົງທອງ ສຸຂະວົງ ກໍໄດ້ກ່າວສະແດງຄວາມຂອບໃຈ ທາງຝ່າຍ ສ.ຣັດເຊຍ ທີ່ໄດ້ມາຊ່ວຍເຫຼືອໃນຄັ້ງນີ້, ເພື່ອຮັດແໜ້ນສາຍພົວພັນມິດຕະພາບ ແລະ ການຮ່ວມມື 2 ກອງທັບ ລະຫວ່າງ ກະຊວງປ້ອງກັນປະເທດລາວ ແລະ ກະຊວງປ້ອງກັນປະເທດຣັດເຊຍ ໃຫ້ມີຄວາມແໜ້ນແຟ້ນຍິ່ງຂຶ້ນ, ທັງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍ ສາຍພົວພັນການຮ່ວມມືໃຫ້ເກີດດອກອອກຜົນຍິ່ງໆຂຶ້ນ. ພ້ອມທັງອວຍພອນໃຫ້ຄະນະເດີນທາງກັບປະເທດດ້ວຍສະຫວັດດີພາບ.
ທີ່ມາ: ໜັງສືພິມກອງທັບ
