ອີງຕາມແຈ້ງການເລກທີ 0520/ກສ ລົງວັນທີ 6 ກຸມພາ 2026, ຂອງກະຊວງ ກະສິກໍາ ແລະ ສິ່ງແວດລ້ອມ ເລື່ອງ: ການຈັດຕັ້ງປະຕິບັດໂຄງການຄວບຄຸມ ແລະ ຕ້ານການລະບາດສັດໃຫຍ່ ຢູ່ ສປປ ລາວ.
ເຊິ່ງເນື້ອໃນຂອງແຈ້ງການສະບັບນີ້ໄດ້ລະບຸວ່າ:
1. ໃຫ້ກົມລ້ຽງສັດ ແລະ ການປະມົງ ເປັນເຈົ້າການປະສານສົມທົບກັບຫ້ອງການ, ບັນດາກົມ, ສະຖາບັນ, ຫົວໜ່ວຍວິຊາການ, ບໍລິສັດ ລັດລວມສູນຜະລິດຕະພັນສິນຄ້າກະສິກຳລາວ ແລະ ການຂົນສົ່ງສາກົນຈຳກັດ ຈັດຕັ້ງໂຄສະນາເຜີຍແຜ່ ແຈ້ງການສະບັບນີ້ ແລະ ບັນດານິຕິກຳທີ່ກ່ຽວຂ້ອງກັບໂຄງການຄວບຄຸມ ແລະ ຕ້ານການລະບາດ ພະຍາດສັດໃຫຍ່ ຢູ່ ສປປ ລາວ ໃຫ້ແກ່ຊາວກະສິກອນ, ບັນດາຟາມລ້ຽງສັດ ແລະ ຜູ້ປະກອບການ ໃຫ້ເຂົ້າໃຈ ແລະ ເຫັນໄດ້ຄວາມສໍາຄັນຂອງການສັກຢາປ້ອງກັນພະຍາດສັດ ແລະ ການດູແລຮັກສາສຸຂະພາບສັດ;
2. ໃຫ້ພະແນກກະສິກຳ ແລະ ສິ່ງແວດລ້ອມ ນະຄອນຫຼວງວຽງຈັນ, ແຂວງ ແລະ ຫ້ອງການກະສິກຳ ແລະ ສິ່ງແວດລ້ອມ ເມືອງ, ນະຄອນ ສືບຕໍ່ເຜີຍແຜ່ນິຕິກຳ ກ່ຽວກັບການຄວບຄຸມ ແລະ ຕ້ານການລະບາດຂອງພະຍາດສັດໃຫຍ່ ໃຫ້ບັນດາຟາມລ້ຽງສັດ ແລະ ການລ້ຽງສັດແບບຄອບຄົວ ໃນຂອບເຂດຄວາມຮັບຜິດຊອບຂອງຕົນ; ຖ້າເຈົ້າຂອງ ສັດ ຫຼື ຟາມລ້ຽງສັດ ບໍ່ສັກຢາປ້ອງກັນພະຍາດສັດຕົນ ແມ່ນບໍ່ອະນຸຍາດໃຫ້ເຄື່ອນຍ້າຍ ແລະ ຊື້-ຂາຍ ຢ່າງເດັດຂາດ;
3. ໃຫ້ພະແນກກະສິກຳ ແລະ ສິ່ງແວດລ້ອມ ນະຄອນຫຼວງວຽງຈັນ, ແຂວງ ຊີ້ນໍາຂະແໜງລ້ຽງສັດ ແລະ ການປະມົງ, ເຈົ້າໜ້າທີ່ສັດຕະວະແພດປະຈຳດ່ານ ເອົາໃຈໃສ່ຕິດຕາມ ກວດກາ ແລະ ຄຸ້ມຄອງ ການເຄື່ອນຍ້າຍສັດ ແລະ ຜະລິດຕະພັນສັດ ຢູ່ພາຍໃນຂອບເຂດຄວາມຮັບຜິດຊອບຂອງຕົນ. ສັດທຸກໂຕ ທີ່ມີການເຄື່ອນຍ້າຍ ຕ້ອງມີໃບຢັ້ງຢືນການສັກຢາປ້ອງກັນພະຍາດສັດ ແລະ ໃບຢັ້ງຢືນສຸຂະພາບສັດ ຈາກເຈົ້າໜ້າທີ່ສັດຕະວະແພດ ເພື່ອປ້ອງກັນບໍ່ໃຫ້ມີການລະ ບາດຂອງພະຍາດສັດ ແລະ ແພ່ກະຈາຍຂອງເຊື້ອພະຍາດ ຈາກເຂດໜຶ່ງໄປສູ່ເຂດອື່ນ, ຫ້າມບໍ່ໃຫ້ມີການ ອະນຸຍາດນໍາສັດທີ່ປ່ວຍຕິດເຊື້ອ, ສັດທີ່ບໍ່ໄດ້ສັກຢາປ້ອງກັນພະຍາດ ເຂົ້າຂ້າໃນໂຮງຂ້າສັດ, ບ່ອນຂ້າສັດຍ່ອຍ ຫຼື ສະຖານທີ່ຂ້າສັດທຸກຂະໜາດ ເພື່ອປ້ອງກັນການລະບາດພະຍາດສັດ ສູ່ສັດ ແລະ ສັດ ສູ່ຄົນ.
4. ໃຫ້ພະແນກກະສິກຳ ແລະ ສິ່ງແວດລ້ອມ ນະຄອນຫຼວງວຽງຈັນ, ແຂວງ ຊີ້ນຳເຈົ້າໜ້າທີ່ສັດຕະວະແພດ ປະຈຳດ່ານ ເອົາໃຈໃສ່ຕິດຕາມກວດກາ ການນໍາເຂົ້າ, ສົ່ງຜ່ານ ແລະ ສົ່ງອອກສັດທີ່ມີຊີວິດ ແມ່ນຕ້ອງມີໃບຢັ້ງຢືນການສັກຢາປ້ອງ ກັນພະຍາດສັດ ຈາກປະເທດຕົ້ນທາງ, ຖ້າບໍ່ມີໃບຢັ້ງຢືນການສັກຢາປ້ອງກັນພະຍາດສັດ ແມ່ນບໍ່ອະນຸ ຍາດໃຫ້ນໍາເຂົ້າ ແລະ ໃຫ້ນໍາສັດໄປກັກກັນ ເພື່ອຕິດຕາມ ແລະ ກວດກາພະຍາດຕ່າງໆ ພ້ອມທັງສັກຢາປ້ອງກັນພະຍາດຕາມເຕັກນິກ ແລະ ໃນແຕ່ລະດ່ານສາກົນທີ່ມີການນໍາເຂົ້າ, ສົ່ງຜ່ານ ແລະ ສົ່ງອອກສັດເປັນ ເມື່ອຜົນກວດກາກັກກັນຜ່ານຕາມເງື່ອນໄຂແລ້ວ ຈຶ່ງສາມາດນໍາເຂົ້າໄປສົ່ງເສີມໃຫ້ປະຊາຊົນ, ຜູ້ປະກອບການ ນໍາໄປລ້ຽງ ຫຼື ຂະຫຍາຍພັນ;
5. ມອບໃຫ້ກົມລ້ຽງສັດ ແລະ ການປະມົງ ປະສານສົມທົບກັບ ບໍລິສັດ ລັດລວມສູນຜະລິດຕະພັນສິນຄ້າ ກະສິກຳລາວ ແລະ ການຂົນສົ່ງສາກົນຈຳກັດ ຄົ້ນຄວ້າໂຄງປະກອບລາຄາໃນການບໍລິການ ສັກວັກຊີນ ແລະ ຂຶ້ນທະບຽນພິມສັດ ໃຫ້ສອດຄ່ອງກັບກົດໝາຍ ແລະ ລະບຽບການ;
6. ໃຫ້ພະແນກກະສິກຳ ແລະ ສິ່ງແວດລ້ອມ ນະຄອນຫຼວງວຽງຈັນ, ແຂວງ ຄົ້ນຄວ້າແຕ່ງຕັ້ງຜູ້ຊີ້ນໍາໂຄງການ ຂັ້ນຄະນະພະແນກ (ຜູ້ຊີ້ນໍາວຽກງານລ້ຽງສັດ ແລະ ການປະມົງ), ຜູ້ປະສານໂຄງການຂັ້ນແຂວງ ແລະ ຜູ້ປະສານງານໂຄງການຂັ້ນເມືອງ ເພື່ອຮັບປະກັນການຈັດຕັ້ງປະຕິບັດໂຄງການຄວບຄຸມ ແລະ ຕ້ານການລະບາດພະຍາດສັດໃຫຍ່ ຢູ່ ສປປ ລາວ ມີປະສິດທິພາບ;
7. ໃຫ້ກົມລ້ຽງສັດ ແລະ ການປະມົງ, ພະແນກກະສິກຳ ແລະ ສິ່ງແວດລ້ອມ ນະຄອນຫຼວງວຽງຈັນ, ແຂວງ ແລະ ຫ້ອງການກະສິກຳ ແລະ ສິ່ງແວດລ້ອມເມືອງ, ນະຄອນ ແລະ ທຸກພາກສ່ວນທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ ປະສານສົມທົບກັນ ເພື່ອເປັນເຈົ້າການຊຸກຍູ້, ຕິດຕາມ ກວດກາ ແລະ ຈັດຕັ້ງປະຕິບັດແຈ້ງການສະບັບນີ້ ໃຫ້ໄດ້ຮັບຜົນດີ ພ້ອມທັງມີການສະຫຼຸບລາຍງານ ແລະ ຖອດຖອນບົດຮຽນ ໃນການຈັດຕັ້ງປະຕິບັດໃຫ້ຂັ້ນເທິງຂອງຕົນ ເປັນແຕ່ລະໄລຍະ ເພື່ອຮູ້ໄດ້ເຖິງຂໍ້ສະດວກ, ຫຍຸ້ງຍາກ ແລະ ບັນຫາໃນການຈັດຕັ້ງປະຕິບັດ ເພື່ອປັບປຸງ ແລະ ແກ້ໄຂໃຫ້ທັນເວລາ.
ດັ່ງນັ້ນ, ຈຶ່ງແຈ້ງມາຍັງທ່ານ ເພື່ອຊາບ ແລະ ຈັດຕັ້ງປະຕິບັດ ຕາມເນື້ອໃນແຈ້ງການສະບັບນີ້ຢ່າງເຂັ້ມງວດ.
ລາຍລະອຽດຂອງແຈ້ງການອ່ານໄດ້ໃນຄອມເມັ້ນ
