ຂ່າວສານຊີອາໄອລາຍງານວ່າ: ໃນວັນທີ 30 ຕຸລານີ້ ຢູ່ນະຄອນບູຊານຂອງ ສ ເກົາຫຼີ, ທ່ານ ສີຈິ້ນຜິງ ປະທານປະເທດຈີນ ໄດ້ພົບປະກັບທ່ານ ໂດໂນ ທຣໍາ ປະທານາທິບໍດີ ສະຫະລັດ ອາເມຣິກາ.
ໂອກາດດັ່ງກ່າວ, ທ່ານ ສີຈິ້ນຜິງ ກ່າວເນັ້ນໜັກວ່າ: ຈີນ ແລະ ສະຫະລັດ ອາເມຣິກາ ມີສະພາບຕົວຈິງຂອງປະເທດຕົນທີ່ແຕກຕ່າງກັນ ຊຶ່ງປາສະຈາກບໍ່ໄດ້ທີ່ຈະມີຂໍ້ຂັດແຍ້ງກັນຈໍານວນໜຶ່ງ. ແຕ່ການພັດທະນາໃຫ້ຈະເລີນຮຸ່ງເຮືອງຂອງຈີນ ກັບເປົ້າໝາຍ “ເຮັດໃຫ້ ສະຫະລັດ ອາເມຣິກາ ກັບມາຍິ່ງໃຫຍ່ອີກຄັ້ງ” ທີ່ທ່ານປະທານາທິບໍດີ ທຣໍາ ຢາກບັນລຸເປັນຈິງນັ້ນ ແມ່ນໄດ້ດໍາເນີນໄປຢ່າງພ້ອມພຽງກັນ ແລະ ບໍ່ຂັດແຍ້ງກັນ, ຈີນ ແລະ ສະຫະລັດ ອາເມຣິກາ ສາມາດຊ່ວຍຊູຍູ້ໜູນກັນ ແລະ ບັນລຸຄວາມຈະເລີນຮຸ່ງເຮືອງຮ່ວມກັນ. ຈີນ ແລະ ສະຫະລັດ ອາເມຣິກາ ຄວນເປັນຄູ່ຮ່ວມມື ແລະ ເປັນໝູ່ເພື່ອນ, ນີ້ເປັນບົດຮຽນປະຫວັດສາດ, ທັງເປັນຄວາມຕ້ອງການຕົວຈິງ. ຂ້າພະເຈົ້າຍິນດີສືບຕໍ່ສຸມຄວາມພະຍາຍາມຮ່ວມກັບທ່ານປະທານາທິບໍດີ ທຣໍາ, ສ້າງພື້ນຖານອັນໜັກແໜ້ນໃຫ້ແກ່ການພົວພັນລະຫວ່າງຈີນ – ສະຫະລັດ ອາເມຣິກາ, ພ້ອມທັງສ້າງສະພາບແວດລ້ອມທີ່ດີໃຫ້ແກ່ການພັດທະນາຂອງປະເທດໃຜລາວ.
ທ່ານ ສີຈິ້ນຜິງ ຊີ້ໃຫ້ເຫັນວ່າ: ປັດຈຸບັນ, ໂລກຜະເຊີນໜ້າກັບຄວາມຫຍຸ້ງຍາກຫຼາຍຢ່າງ, ຈີນ ແລະ ສະຫະລັດ ອາເມຣິກາ ສາມາດຮ່ວມກັນສະແດງໃຫ້ເຫັນເຖິງຄວາມຮັບຜິດຊອບຂອງປະເທດໃຫຍ່, ຮ່ວມມືກັນເຮັດວຽກສໍາຄັນ, ວຽກງານຕົວຈິງ ແລະ ວຽກງານທີ່ດີຕໍ່ສອງປະເທດ ກໍຄື ຕໍ່ໂລກໃຫ້ຫຼາຍຂຶ້ນກວ່າເກົ່າ.
ດ້ານປະທານາທິບໍດີ ໂດໂນ ທຣຳ ກ່າວວ່າ ການພົບກັນ ລະຫວ່າງເພິ່ນກັບຜູ້ນຳຈີນ ສີ ຈິ້ນຜິງ ໃນວັນພະຫັດ ໄດ້ຮັບຜົນສຳເລັດຢ່າງຈົບງາມ, ໂດຍເພິ່ນກ່າວວ່າ ເພິ່ນຈະຫຼຸດພາສີສິນຄ້ານຳເຂົ້າຈາກຈີນ, ໃນຂະນະທີ່ປັກກິ່ງຕົກລົງຈະອະນຸຍາດໃຫ້ສົ່ງອອກແຮ່ທາດຫາຍາກ ແລະ ເລີ່ມຊື້ຖົ່ວເຫຼືອງຈາກສະຫະລັດອາເມຣິກາ.
ປະທານາທິບໍດີກ່າວຕໍ່ຜູ້ສື່ຂ່າວເທິງເຄື່ອງບິນແອຣ ຟອຣສ ວັນ ວ່າ: ສະຫະລັດອາເມຣິກາຈະຫຼຸດຜ່ອນພາສີສິນຄ້ານຳເຂົ້າທີ່ໄດ້ບັງຄັບໃຊ້ໃນຕົ້ນປີນີ້ ເພື່ອລົງໂທດຈີນ ໃນການຂາຍສານເຄມີທີ່ໃຊ້ຜະລິດຢາ ເຟນທານິລ ຈາກ 20% ເຫຼືອ 10%, ເຮັດໃຫ້ອັດຕາພາສີສິນຄ້ານຳເຂົ້າທັງໝົດຕໍ່ຈີນຫຼຸດລົງຈາກ 57% ເຫຼືອ 47%.
“ທຣຳ ກ່າວວ່າ ຖ້າໃຫ້ຄະແນນ ຈາກລະດັບ 0 ຫາ 10 ໂດຍ 10 ແມ່ນດີທີ່ສຸດ, ຂ້າພະເຈົ້າຄົງໃຫ້ຄະແນນການປະຊຸມຄັ້ງນີ້ 12 ຄະແນນ,”
ທຣຳ ກ່າວອີກວ່າ ເພິ່ນຈະເດີນທາງໄປປະເທດຈີນໃນເດືອນເມສາ, ແລະ ສີ ຈິ້ນຜິງ ຈະເດີນທາງມາຢ້ຽມຢາມສະຫະລັດອາເມຣິກາ “ຫຼັງຈາກນັ້ນໄລຍະໜຶ່ງ”.
ປະທານາທິບໍດີ ທຣຳ ຍັງໄດ້ກ່າວອີກວ່າ ພວກເພິ່ນຍັງໄດ້ປຶກສາຫາລືກ່ຽວກັບການສົ່ງອອກ ຊິບຄອມພິວເຕີທີ່ມີຄວາມກ້າວໜ້າຫຼາຍຂຶ້ນ ໄປຍັງປະເທດຈີນ, ແລະ ກ່າວວ່າບໍລິສັດ Nvidia ກໍາລັງຢູ່ໃນລະຫວ່າງການເຈລະຈາກັບເຈົ້າໜ້າທີ່ຈີນ.
ທີ່ມາ: ໜສພ ປະຊາຊົນ, AP News
ພາບ: AP News
