ວັນທີ 13 ຕຸລາ 2025 ທ່ານ ໂມຫັດ ອາຊຳ ອາຫມັດ ອະທິບໍດີຫົວໜ້າກົມສຶກສາທິການ ຂອງປະເທດມາເລເຊຍ ໄດ້ເປີດເຜີຍວ່າ ມີນັກຮຽນທົ່ວປະເທດປະມານ 6,000 ຄົນ ຕິດເຊື້ອໄຂ້ຫວັດໃຫຍ່ (Influenza) ເຮັດໃຫ້ໂຮງຮຽນຫຼາຍແຫ່ງຈຳເປັນຕ້ອງປິດຊົ່ວຄາວ ເພື່ອປ້ອງກັນການແຜ່ລະບາດໃນກຸ່ມເດັກນ້ອຍ ແລະ ບຸກຄະລາກອນທາງການສຶກສາ ຂະນະທີທາງການໄດ້ກຳນົດແນວທາງຮັບມືໄວ້ແລ້ວ ໂດຍເນັ້ນໃຫ້ໂຮງຮຽນນຳມາດຕະການປ້ອງກັນພະຍາດຕິດເຊື້ອທີ່ເຄີຍໃຊ້ໃນໄລຍະໂຄວິດ-19 ກັບຄືນມາ ເຊັ່ນ ການໃສ່ໜ້າກາກອະນາໄມ ແລະ ການຫຼຸດກິດຈະກຳຮວມກຸ່ມໃຫຍ່ຂອງນັກຮຽນ ທ່ານຍັງກ່າວວ່າ ການລະບາດເກີດຂຶ້ນໃນຫຼາຍພື້ນທີ່ທົ່ວປະເທດ.
ທາງດ້ານກະຊວງສາທາລະນະສຸກຂອງມາເລເຊຍ ໄດ້ເຜີຍວ່າ ໃນອາທິດທີ່ຜ່ານມາ ມີການລາຍງານກ່ອນລະບາດ (cluster) ຂອງໄຂ້ຫວັດໃຫຍ່ເພີ່ມຂຶ້ນເຖິງ 97 ຈຸດ ຈາກ 14 ຈຸດໃນອາທິດກ່ອນໜ້າ ໂດຍສ່ວນໃຫຍ່ພົບໃນໂຮງຮຽນ ແລະ ສູນເດັກນ້ອຍ ໂດຍທີ່ລັດດສະລັງງໍ ມີຈຸດ cluster ຫຼາຍທີ່ສຸດ 43 ຈຸດ ຕາມມາດ້ວຍ ກົວລາລຳເປີ ແລະ ປຸດຣາຈາຢາ 15 ຈຸດ, ປີນັງ 10 ຈຸດ, ຢະໂຮ 9 ຈຸດ ແລະ ເກດະ 5 ຈຸດ.
ພ້ອມກັນນັ້ນ ລັດຖະມົນຕີສາທາລະນະສຸກຂອງມາເລເຊຍ ກ່າວວ່າ ຈະປຶກສາຮ່ວມກັບກະຊວງສຶກສາ ເພື່ອກຳນົດມາດຕະການເພີ່ມເຕີມໃນການຄວບຄຸມການລະບາດໃນສະຖານສຶກສາ ໂດຍເນັ້ນໃຫ້ຄວາມສຳຄັນກັບຄວາມປອດໄພຂອງເດັກນ້ອຍ ແລະ ບຸກຄະລາກອນເປັນຫຼັກ.
ທີ່ມາຈາກ: CNA
