ກະຊວງສຶກສາທິການ ແລະ ກີລາ (ສສກ) ຮ່ວມກັບ ລັດຖະບານອົດສະຕຣາລີ ຜ່ານແຜນງານບີຄວາ (BEQUAL) ເລັ່ງຍົກລະດັບຂີດຄວາມສາມາດຂອງຄູ ໃນການສັງເກດ ແລະ ຊ່ວຍເຫຼືອນັກຮຽນທີ່ມີຄວາມພິການ ຫຼື ມີຄວາມຫຍຸ້ງຍາກໃນການຮຽນຮູ້ ເພື່ອຮັບປະກັນວ່າ “ເດັກທຸກຄົນຕ້ອງໄດ້ຮຽນໜັງສື”.
ໃນລະຫວ່າງວັນທີ 16 ຫາ 20 ມີນາ 2026, ໄດ້ມີການຈັດກອງປະຊຸມຂຽນບົດວິດີໂອສຳລັບການພັດທະນາຄູ ຕອນທີ 29 ເພື່ອປະກອບເສີມເຂົ້າໃນ ຊຸດອຸປະກອນຊ່ວຍເຫຼືອຄູ ສະບັບທີ 14 “ການຊ່ວຍເຫຼືອນັກຮຽນພິການໃນຫ້ອງຮຽນ”.
ຈຸດເດັ່ນຂອງເຄື່ອງມືໃໝ່ນີ້ແມ່ນ:
• ແບບຟອມປະເມີນພຶດຕິກຳ: ເປັນເຄື່ອງມືທີ່ນຳໃຊ້ໄດ້ງ່າຍ ເພື່ອໃຫ້ຄູສາມາດລະບຸຄວາມຫຍຸ້ງຍາກຂອງເດັກ ບໍ່ວ່າຈະເປັນດ້ານສະມາທິ, ການສື່ສານ, ຄວາມຈື່ຈຳ, ການເຄື່ອນໄຫວ, ສາຍຕາ ຫຼື ການໄດ້ຍິນ.
• ການສັງເກດຕົວຈິງ: ວິດີໂອຈະແນະນຳໃຫ້ຄູຮູ້ຈັກວິທີສັງເກດພຶດຕິກຳນັກຮຽນ ເພື່ອດັດປັບການສອນໃຫ້ແທດເໝາະກັບຄວາມຕ້ອງການລາຍບຸກຄົນ.
ທ່ານ ນາງ ມະໂນລີ ດົງວັນ, ຮອງຜູ້ອຳນວຍການ ສະຖາບັນຄົ້ນຄວ້າວິທະຍາສາດການສຶກສາ (ສວສ) ເນັ້ນຢ້ຳວ່າ: “ເດັກທຸກຄົນມີສິດໄດ້ຮັບການສຶກສາ ບໍ່ວ່າເຂົາເຈົ້າຈະມີຄວາມສາມາດລະດັບໃດກໍ່ຕາມ. ຖ້າຄູບໍ່ຮູ້ວິທີດັດປັບການສອນ, ເດັກພິການອາດຈະເສຍໂອກາດ ຫຼື ຕ້ອງອອກໂຮງຮຽນ. ເຄື່ອງມືນີ້ຈະມາແກ້ໄຂສິ່ງທ້າທາຍດັ່ງກ່າວ.”
ດ້ານ ທ່ານ ໄມໂຄ ຄາຣີ, ເລຂາເອກ ສະຖານທູດອົດສະຕຣາລີ ປະຈຳລາວ ກ່າວສະແດງຄວາມພູມໃຈໃນການຮ່ວມມືຄັ້ງນີ້: “ລັດຖະບານອົດສະຕຣາລີ ມຸ່ງໝັ້ນຊ່ວຍໃຫ້ຄູມີເຄື່ອງມືທີ່ຊັດເຈນ ແລະ ໃຊ້ໄດ້ຈິງ ເພື່ອຊ່ວຍໃຫ້ນັກຮຽນທຸກຄົນ ບໍ່ວ່າຈະມີຂໍ້ຈຳກັດດ້ານໃດ ກໍ່ສາມາດປະສົບຜົນສຳເລັດໃນການຮຽນໄດ້.”
ແຜນງານບີຄວາ ມີແຜນການຈັດຕັ້ງປະຕິບັດດັ່ງນີ້:
• ໄຂສົກຮຽນໃໝ່ 2026-2027: ຈະເລີ່ມແຈກຢາຍຊຸດອຸປະກອນ ແລະ ອອກອາກາດວິດີໂອ ຕອນທີ 29 ໃນ 30 ເມືອງເປົ້າໝາຍ.
• ການທົດລອງ: ຈະມີການທົດລອງນຳໃຊ້ເຄື່ອງມືດັ່ງກ່າວຢູ່ 18 ໂຮງຮຽນ ໃນແຂວງຊຽງຂວາງ ເພື່ອຕິດຕາມປະສິດທິຜົນກ່ອນຂະຫຍາຍຕົວ.
•
ການຮ່ວມມືລະຫວ່າງວິຊາການຈາກ ສວສ, ວິທະຍາໄລຄູ, ກົມສ້າງຄູ ແລະ ສູນສົ່ງເສີມການສຶກສາຮຽນຮ່ວມ ໃນຄັ້ງນີ້ ຖືເປັນບາດກ້າວສຳຄັນໃນການສ້າງສັງຄົມແຫ່ງການຮຽນຮູ້ທີ່ບໍ່ປ່ອຍໃຫ້ໃຜໄວ້ຂ້າງຫຼັງ.
ທີ່ມາ: ວຽງຈັນໃໝ່
