ອີງຕາມວັດຈະນານຸກົມພາສາລາວ ສະບັບປັບປຸງປີ 2022 ຄົ້ນຄວ້າ ແລະ ຮຽບຮຽງໂດຍ: ປອ. ທອງຄຳ ອ່ອນມະນີສອນ ໄດ້ໃຫ້ນິຍາມຂອງຄໍາວ່າ: “ເລີດ” ມີຄວາມໝາຍວ່າ: ປະເສີດ, ດີ, ດີຍິ່ງ ຫຼື ດີຫຼາຍ.
ອີງຕາມວັດຈະນານຸກົມພາສາລາວ ຄົ້ນຄວ້າ ແລະ ຮຽບຮຽງໂດຍ: ຄະນາຈານ ສູນຄົ້ນຄວ້າພາສາ-ວັດທະນະທຳລາວ ຄະນະອັກສອນສາດ ມະຫາວິທະຍາໄລແຫ່ງຊາດ ສະບັບປີ 2025 ໄດ້ໃຫ້ນິຍາມຂອງຄໍາວ່າ: “ເລີດ” ມີຄວາມໝາຍວ່າ: ເປັນຈອມ, ເປັນຍອດ, ຢ້ຽມ, ປະເສີດ, ດີ, ດີຍິ່ງ.
ນອກຈາກນີ້, ຄໍາວ່າ: “ເລີດ” ຍັງສາມາດປະສົມກັບຄໍາອື່ນ ແລະ ເຮັດໃຫ້ມັນມີຄວາມໝາຍທີ່ໜັກແໜ້ນຂຶ້ນເຊັ່ນ:
1. ເລີດລໍ້າ: ແປວ່າ “ຍອດຍິ່ງ”.
2. ເລີດເລີ: ມີຄວາມໝາຍຄືກັນກັບ“ເລີດລໍ້າ”.
3. ເລີດລອຍ: ແປວ່າ “ໂດດເດັ່ນ”.
4. ອີ່ເລີດ: ຊື່ຜັກຊະນິດໜຶ່ງໃບຄ້າຍຄືໃບພູ ມີກິ່ນຫອມຂີວ ແລະ ເຜັດ ໃຊ້ໃບອ່ອນກິນກັບລາບ ກ້ອຍ ພັນຊີ້ນ ແລະ ໃສ່ຕົ້ມ ໃສ່ແກງກໍໄດ້, ສ່ວນເຄືອ ແລະ ຮາກ ໃຊ້ເປັນຢາດີເຈັບແຂ້ວ ແລະ ອຳມະພາດໄດ້.
ຍົກຕົວຢ່າງບົດກອນລາວທີ່ໃຊ້ຄໍາວ່າ: “ເລີດ” ໃນການຍົກຍ້ອງບຸນຄຸນແມ່ຕອນໜຶ່ງໄດ້ກ່າວວ່າ:
“ພະຄຸນແມ່ນີ້ ເລີດລ້ຳກວ່າສິ່ງໃດ
ປຽບດັ່ງສາຍທາລາ ໄຫຼລໍ່ລ້ຽງຊີວິດລູກ
ແມ່ເປັນທັງຜູ້ສ້າງ ເປັນທັງຜູ້ຖະໜອມຮັກ
ນ້ຳໃຈແມ່ເລີດປະເສີດແທ້ ຫາສິ່ງໃດປຽບປານບໍ່ມີ”
ແລ້ວທ່ານເດ ໃຊ້ຄຳວ່າ: “ເລີດ” ກັບສິ່ງໃດແດ່ ? ລອງສະແດງຄວາມຄິດເຫັນຢ່າງສ້າງສັນໄດ້ເດີ
