ສຳລັບຄວາມເປັນມາຂອງວັນດັ່ງກ່າວນັ້ນ ເຊື່ອກັນວ່າ ປະເພນີນີ້ ມີມາດົນກວ່າ ສີ່ພັນປີມາແລ້ວ. ການຈັດງານກໍເພື່ອສະເຫຼີມສະຫຼອງ ເທສະການ ລະດູໃບໄມ້ປົ່ງ ແຕ່ກ່ອນບໍ່ໄດ້ເອີ້ນວ່າ ເທສະການກິນກຸດ ແຕ່ມີຊື່ເອີ້ນຕ່າງກັນຕາມຍຸກສະໄໝ ເມື່ອ 2.100 ປີກ່ອນ ຄສ ຈະເອີ້ນວ່າ “ ຊຸ່ຍ” ເຊິ່ງມີຄວາມໝາຍເຖິງ ການໂຄຈອນ ຄົບໜຶ່ງຮອບ ຂອງດາວຈູປິເຕີຣ໌ ຈົນຕໍ່ມາໃນຍຸກ 1.000 ກວ່າປີກ່ອນ ຄສ ເທສະການກຸດຈີນ ຈະຖືກເອີ້ນວ່າ “ ໜຽນ ” ໝາຍເຖິງການເກັບກ່ຽວ ທີ່ໄດ້ຜົນລະປູກອຸດົມສົມບູນ.
ນອກຈາກນີ້ ວັນກຸດຈີນ ຍັງມີຊື່ເອີ້ນ ອີກຢ່າງໜຶ່ງ ວ່າ “ວັນຊຸງເຈ໋ ” ເຊິ່ງໝາຍເຖິງ ເທສະການ ລະດູໃບໄມ້ປົ່ງ ຫຼື ຂຶ້ນປີປູກຝັງໃໝ່ ເພາະໄລຍະກ່ອນກິນກຸດນັ້ນ ກົງກັບລະດູໜາວ ບໍ່ສາມາດເຮັດການປູກຝັງໄດ້ ດັ່ງນັ້ນ ເມື່ອເຂົ້າສູ່ລະດູໃບໄມ້ປົ່ງ ທີ່ມີອາກາດເໝາະສົມແກ່ການປູກຝັງ ຄົນຈີນຈຶ່ງສາມາດເຮັດນາ ເຮັດສວນໄດ້ອີກເທື່ອໜຶ່ງ ຈາກການຜ່ານພົ້ນ ລະດູໜາວໄປ.
ການກະກຽມງານ ເພື່ອສະເຫຼີມສະຫຼອງ ເທສະການກຸດຈີນນັ້ນ ຈະເລີ່ມຂຶ້ນຕັ້ງແຕ່ໜຶ່ງເດືອນກ່ອນວັນກຸດຈີນ ໂດຍຜູ້ຄົນຈະເລີ່ມຊອກຫາຊື້ເຄື່ອງຂອງຕ່າງໆ ເພື່ອປະດັບຕົບແຕ່ງ ເຮືອນຊານ ແລະ ກຽມເຮັດຄວາມ ສະອາດຄັ້ງໃຫຍ່ ຕັ້ງແຕ່ຊັ້ນເທິງລົງຫາຊັ້ນລຸ່ມ ເນື່ອງຈາກມີຄວາມເຊື່ອວ່າ ຈະເປັນການປັດກວາດສິ່ງທີ່ບໍ່ດີອອກໄປ ຈາກພາຍໃນເຮືອນ ທັງປະຕູປ່ອງຢ້ຽມ ກໍ່ປະດັບປະດາໄປດ້ວຍສີແດງ ແລະ ເຈ້ຍສີແດງ ທີ່ມີຄຳອວຍພອນ ໃຫ້ອາຍຸຍືນ, ລ້ຳລວຍ, ຢູ່ດີມີສຸກ ແລະອື່ນໆ.
ຈາກນັ້ນຄອບຄົວຈະຮ່ວມກັນກິນເຂົ້າ ທີ່ລ້ວນແຕ່ມີຄວາມໝາຍມຸງຄຸນ ເຊັ່ນ: ກຸ້ງ ຈະໝາຍເຖິງຊີວິດທີ່ຮຸ່ງເຮືອງ ແລະ ຄວາມສຸກ, ຫອຍ ເປົ໋າຮື້ແຫ້ງ, ສາຫລ່າຍ ຈະນຳຄວາມລ້ຳ ລວຍມາໃຫ້ ແລະ ເຂົ້າຕົ້ມ ( Jiaozi ) ໝາຍເຖິງ ບັນພະບູລຸດອວຍພອນ ຫຼັງຈາກກິນອາຫານຄໍ່າແລ້ວ ທຸກຄົນໃນຄອບຄົວ ຈະນັ່ງສັງສັນນຳກັນ ຈົນຮອດຕອນເຊົ້າ ເພື່ອລໍຖ້າວັນໃໝ່ ໂດຍການຫລິ້ນເກມ, ກິດຈະກຳຕ່າງໆຫຼື ເບິ່ງລາຍ ການໂທລະພາບ ທີ່ກ່ຽວກັບ ວັນກຸດຈີນ ແລະ ໃນວັນນີ້ ຈະບໍ່ຮ້າຍ, ບໍ່ດ່າ, ບໍ່ອິດສາ ຫຼື ບໍ່ພໍໃຈກັນ ເພື່ອເປັນສີລິມຸງຄຸນ ທີ່ດີສຳລັບປີໃໝ່ ທີ່ກຳລັງຈະມາເຖິງ.
ນອກຈາກນີ້ ອີກສິ່ງໜຶ່ງ ທີ່ຖືເປັນສັນຍະລັກ ຂອງວັນກຸດຈີນ ຄື “ ອັ່ງເປົ໋າ ” ເຊິ່ງມີຄວາມໝາຍວ່າ “ ກະເປົ໋າແດງ ” ຫຼື ຈະເອີ້ນວ່າ “ ແຕ໋ະອຽງ ” ເຊິ່ງມີຄວາມໝາຍວ່າ “ ຜູກແອວ ” ຈາກຄົນສະໄໝກ່ອນທີ່ມັກຮ້ອຍເງິນ ເປັນພວງຜູກໄວ້ທີ່ແອວ ໂດຍການໃຫ້ອັ່ງເປົ໋ານີ້ ແກ່ຄູ່ແຕ່ງງານ, ໃຫ້ເງິນເດັກນ້ອຍ ແລະ ຜູ້ໃຫຍ່ທີ່ຍັງບໍ່ໄດ້ແຕ່ງງານ ໃສ່ຊອງສີແດງ ຫຼັງຈາກນັ້ນທຸກຄົນໃນຄອບຄົວ ຈະອອກມາຈາກເຮືອນ ເພື່ອກ່າວສະບາຍດີປີໃໝ່ ກັບຍາດຕິພີ່ນ້ອງ ແລະ ໝູ່ເພື່ອນຂ້າງເຮືອນ ເຊິ່ງຄ້າຍກັບ ການທີ່ຄົນຕາເວັນຕົກ ເວົ້າວ່າ : “Let bygones be bygones” ( ແມ່ນຫຍັງ ກໍຕາມທີ່ຜ່ານໄປແລ້ວ ກໍໃຫ້ມັນຜ່ານໄປ ).
ຕາມຄວາມເຊື່ອແລ້ວ ໃນວັນກຸດຈີນ ກໍ່ມີຂໍ້ຫ້າມປະຕິບັດ ດັ່ງຕໍ່ໄປນີ້:
1. ຫ້າມກວາດເຮືອນ: ເພາະຊາວຈີນເຊື່ອວ່າ ການກວດເຮືອນໃນວັນປີໃຫມ່ຈີນ ຈະເປັນການກວາດສິ່ງທີ່ເປັນມຸງຄຸນອອກໄປ.
2. ຫ້າມໃຫ້ຢືມເງິນ: ຖ້າບໍ່ດັ່ງນັ້ນຈະຖືກໃຫ້ຢືມເງິນຕະຫຼອດປີ ຫຼືຖ້າໄປຢືມຄົນອື່ນກໍ່ຈະເປັນໜີ້ຕະຫຼອດປີເຊັ່ນກັນ.
3. ຫ້າມຊັກເຄື່ອງ: ເພາະເຊື່ອວ່າ ວັນກຸດຈີນເປັນວັນເກີດຂອງເທບພະເຈົ້າແຫ່ງນ້ຳ ຖ້າຊັກເຄື່ອງຈະເປັນການລົບລູ່ທ່ານ.
4. ຫ້າມເຂົ້າຫ້ອງນອນຄົນອື່ນເພາະເຊື່ອວ່າ ຈະເຮັດໃຫ້ໂຊກຮ້າຍ.
5. ຫ້າມໃຊ້ຂອງມີຄົມ ເພາະເຊື່ອວ່າຈະເປັນການຕັດຄວາມໂຊກດີຖີ້ມໄປ.
6. ຫ້າມເວົ້າຄຳຫຍາບ ເພາະຈະນຳຄວາມເດືອນຮ້ອນເຂົ້າສູ້ຕົນເອງ.
7. ຫ້າມໄຫ້ ເພາະເຊື່ອວ່າ ຈະໄຫ້ຕະຫຼອດປີ.
8. ຫ້າມໃສ່ຊຸດດຳ ໃຫ້ໃສ່ຊຸດແດງ ຫລື ສີທີ່ສົດໃສໃນມື້ກຸດຈີນ.
9. ຫ້າມຂ້າສັດ, ບໍ່ໃຫ້ກິນຊີ້ນ ແລະ ໃຫ້ກິນເຈ ຫລື ມັງສາວີລັດແທນ.
10. ຫ້າມເຮັດເຄື່ອງແຕກ ເຊັ່ນ: ຖ້ວຍ, ຈອກ ອື່ນໆ ເພາະເຊື່ອວ່າເປັນລາງບໍ່ດີ, ຖ້າເຮັດແຕກໂດຍບໍ່ຕັ້ງໃຈກໍ່ໃຫ້ແກ້ເຄັດດ້ວຍການເວົ້າວ່າ: “Luo di ka hue” ທີ່ແປວ່າ: ດອກໄມ້ຈະເບັ່ງບານເມື່ອຕົກລົງສູ່ພື້ນ.
11. ຫ້າມຊື້ເກີບໃໝ່ ຄົນຈີນຈະບໍ່ຊື້ເກີບໃໝ່ໃນເດືອນທຳອິດຂອງກຸດຈີນ ເພາະຄຳວ່າ ເກີບໃນພາສາຈີນອອກສຽງວ່າ Hai ມີສຽງຄ້າຍຄືກັບການຖອນຫາຍໃຈ ຈຶ່ງເຊື່ອວ່າ ເປັນສັນຍານຂອງການເລີ່ມຕົ້ນປີໃໝ່ທີ່ບໍ່ດີ.
12. ຫ້າມໃສ່ຊຸດຂາວດຳ ເສື້ອຜ້າທີ່ເປັນສີຂາວດຳ ເປັນສັນຍະລັກຂອງຄວາມຕາຍ, ຄວາມໂຊກຮ້າຍ ສະນັ້ນຕ້ອງໃສ່ຊຸດສີແດງເທົ່ານັ້ນ ເພາະເຊື່ອວ່າ ສີແດງຄືສີແຫ່ງຄວາມໂຊກດີ.
13. ຫ້າມໃສ່ເງິນໃນຊອງເປັນເລກຄີກ ໂດຍສະເພາະເລກ 4, 7 ເຊື່ອກັນວ່າເປັນເລກບໍ່ມຸງຄຸນ ໃຫ້ໃສ່ຈຳນວນເປັນເລກ 8 ແທນ.
ຂໍ້ມູນຈາກ: targetlaos, sanook
ຮຽບຮຽງໂດຍ Lao Youth Radio FM90MHz
