ອີງຕາມການປະກາດລາງວັນ Travelers’ Choice Awards 2026 (Best Destinations in Asia) ຈາກເວັບໄຊທ່ອງທ່ຽວລະດັບໂລກ TripAdvisor, ນະຄອນຫຼວງຮ່າໂນຍ ປະເທດຫວຽດນາມ ໄດ້ຮັບການຈັດອັນດັບໃຫ້ເປັນ ຈຸດໝາຍປາຍທາງທີ່ດີທີ່ສຸດອັນດັບ 2 ໃນອາຊີ ປະຈຳປີນີ້ (ໂດຍຫຍັບຂຶ້ນມາ 5 ອັນດັບຈາກປີກາຍ).
ຮ່າໂນຍຖືກຍົກຍ້ອງວ່າ ເປັນເມືອງທີ່ມີສະເໜ່ ເພາະສາມາດຮັກສາຄວາມເກົ່າແກ່ຂອງເຂດເມືອງເກົ່າ (Old Quarter), ອະນຸສອນສະຖານ ແລະສະຖາປັດຕະຍະກຳແບບຝຣັ່ງໄວ້ໄດ້ຢ່າງດີ ໃນຂະນະທີ່ກໍ່ມີການພັດທະນາຄວາມທັນສະໄໝໄປພ້ອມໆກັນ.
ສະຖານທີ່ສຳຄັນເຊັ່ນ: ສຸສານປະທານໂຮ່ຈີມິນ ແລະ ຄຸກຮວາໂລ ແມ່ນຈຸດທີ່ນັກທ່ອງທ່ຽວບໍ່ຄວນພາດເພື່ອສຶກສາປະຫວັດສາດ.
ຕົວເມືອງເຕັມໄປດ້ວຍໜອງນ້ຳ, ສວນສາທາລະນະ, ແລະ ມີວັດວາອາຮາມຫຼາຍກວ່າ 600 ແຫ່ງ ເຊິ່ງສ້າງຄວາມປະທັບໃຈໃຫ້ແກ່ນັກທ່ອງທ່ຽວທີ່ມັກການສຳຫຼວດ.
TripAdvisor ລະບຸວ່າຮ່າໂນຍເປັນເມືອງທີ່ທ່ຽວງ່າຍ ແລະ ສາມາດເດີນທາງໄປມາໄດ້ສະດວກດ້ວຍລົດແທັກຊີ່.
5 ອັນດັບ ຈຸດໝາຍປາຍທາງທີ່ດີທີ່ສຸດ ຂອງອາຊີ ປະກອບມີ:
ບາຫຼີ (ອິນໂດເນເຊຍ): ຄອງອັນດັບ 1 ຂອງອາຊີ.
ຮ່າໂນຍ (ຫວຽດນາມ): ອັນດັບ 2 ຂອງອາຊີ.
ບາງກອກ (ໄທ): ອັນດັບ 3 ຂອງອາຊີ.
ໂຕກຽວ (ຍີ່ປຸ່ນ): ອັນດັບ 4 ຂອງອາຊີ.
ໂຊນ (ສ.ເກົາຫຼີ): ອັນດັບ 5 ຂອງອາຊີ.
ນອກຈາກນີ້, ເມືອງຮອຍອັນ ຂອງຫວຽດນາມ ກໍ່ຕິດອັນດັບ 7 ໃນລາຍຊື່ນີ້ (ຂຶ້ນມາ 4 ອັນດັບຈາກປີກາຍ).
ໃນປີ 2025, ຮ່າໂນຍໄດ້ຕ້ອນຮັບນັກທ່ອງທ່ຽວທັງໝົດ ຫຼາຍກວ່າ 33.7 ລ້ານເທື່ອຄົນ (ເພີ່ມຂຶ້ນ 20.8% ຈາກປີ 2024), ໃນນັ້ນເປັນນັກທ່ອງທ່ຽວຕ່າງປະເທດເຖິງ 7.82 ລ້ານຄົນ, ສ້າງລາຍຮັບໃຫ້ແກ່ຂະແໜງທ່ອງທ່ຽວໄດ້ປະມານ 5.1 ຕື້ໂດລາສະຫະລັດ.
ໝາຍເຫດ: ລາງວັນນີ້ຄັດເລືອກຈາກການຕີລາຄາ ແລະ ຄຳຍ້ອງຍໍຕົວຈິງຂອງນັກທ່ອງທ່ຽວທົ່ວໂລກ ໃນໄລຍະ 12 ເດືອນຜ່ານມາ, (1 ຕຸລາ 2024 - 30 ກັນຍາ 2025) ເຊິ່ງສະທ້ອນໃຫ້ເຫັນເຖິງຄຸນນະພາບ ແລະ ຄວາມນິຍົມທີ່ແທ້ຈິງ.
ສ່ວນປະເທດລາວ (ໂດຍສະເພາະແມ່ນ ເມືອງຫຼວງພະບາງ) ບໍ່ໄດ້ຕິດຢູ່ໃນ 10 ອັນດັບທຳອິດຂອງອາຊີໃນປີ 2025, ເຖິງວ່າຫຼວງພະບາງຈະເປັນເມືອງມໍລະດົກໂລກທີ່ໄດ້ຮັບລາງວັນຈາກສື່ສິ່ງພິມອື່ນໆ (ເຊັ່ນ Wanderlust ຫຼື Condé Nast Traveler), ແຕ່ການຈັດອັນດັບຂອງ TripAdvisor ແມ່ນອີງໃສ່ “ປະລິມານການລີວິວ” ແລະ “ຄະແນນຄວາມພໍໃຈ” ຈາກນັກທ່ອງທ່ຽວໃນລະບົບຂອງເຂົາເຈົ້າເປັນຫຼັກ.
ທີ່ມາ: VNexpress
ab in den urlaub
ຮຽບຮຽງໂດຍ Lao Youth Radio FM90MHz
