13 ຕຸລາ ວັນຄຸ້ມຄອງໄພພິບັດແຫ່ງຊາດ, ວັນຄຸ້ມຄອງໄພພິບັດອາຊຽນ ແລະ ວັນຫຼຸດຜ່ອນໄພພິບັດສາກົນ (National Disaster Management Day, ASEAN Day for Disaster Management, International Day for Disaster Risk Reduction).
ປະເທດລາວ ເປັນປະໜຶ່ງທີ່ປະເຊີນກັບຄວາມສ່ຽງຫຼາຍຢ່າງ ໃນແຕ່ລະປີ ເຊັ່ນ: ນ້ຳຖ້ວມ, ພາຍຸ, ໄພແຫ້ງແລ້ງ, ແຜ່ນດິນໄຫວ, ດິນເຈື່ອນ, ໄພພິບັດເຫຼົ່ານີ້ສົ່ງຜົນກະທົບຕໍ່ຊີວິດການເປັນຢູ່, ເສດຖະກິດ, ແລະ ການພັດທະນາຂອງ ສປປ ລາວ.
ລັດຖະບານ ໃຫ້ຄວາມສໍາຄັນຕໍ່ກັບວຽກງານຄຸ້ມຄອງໄພພິບັດ ຄຽງຄູ່ກັບວຽກງານອື່ນໆ ຢ່າງແຂງແຮງ ເນື່ອງຈາກເປັນວຽກງານໜຶ່ງທີ່ນອນຢູ່ໃນແນວທາງນະໂຍບາຍຂອງພັກ ແຜນພັດທະນາເສດຖະກິດ-ສັງຄົມ ຂອງລັດຖະບານທີ່ກໍານົດນະໂຍບາຍຊ່ວຍເຫຼືອດ້ານມະນຸດສະທໍາຕໍ່ປະຊາຊົນລາວບັນດາເຜົ່າ ແລະ ຜູ້ປະສົບເຄາະຮ້າຍຈາກໄພພິບັດ, ຍາດແຍ່ງເອົາການຊ່ວຍເຫຼືອ ຈາກພາກສ່ວນຕ່າງໆ ໃນສັງຄົມ ສະໝັກໃຈເຂົ້າມາມີສ່ວນຮ່ວມໃນວຽກງານຄຸ້ມຄອງໄພພິບັດ ເຮັດໃຫ້ຜູ້ຖືກເຄາະຮ້າຍຈາກໄພທໍາມະຊາດໄດ້ຮັບການຊ່ວຍເຫຼືອຢ່າງເໝາະສົມ ແລະ ສາມາດກັບມາດໍາລົງຊີວິດຢ່າງເປັນປົກກະຕິ.
ດ້ານສະມັດຊາແຫ່ງສະຫະປະຊາຊາດ ກໍໄດ້ກຳນົດໃຫ້ວັນທີ 13 ຕຸລາ ຂອງທຸກໆປີ ເປັນວັນຫຼຸດຜ່ອນໄພພິບັດທຳມະຊາດໂລກ ເຊິ່ງເປັນສ່ວນໜຶ່ງຂອງການປະກາດແຫ່ງການຫຼຸດຄວາມສູນເສຍທາງທຳມະຊາດໃນລະດັບນາໆຊາດ.
ໂດຍມີເປົ້າໝາຍຄືການສ້າງຄວາມຮັບຮູ້ ຄວາມສຳຄັນຂອງການຫຼຸດໄພພິບັດທາງທຳມະຊາດ ຄືກັນກັບການພັດທະນາແບບຍືນຍົງ ໂດຍມີເປົ້າໝາຍເພື່ອຈະຫຼຸດການສູນເສຍໃນດ້ານມະນຸດ ສັງຄົມ ເສດຖະກິດ ແລະ ສິ່ງແວດລ້ອມ ໄປກັບອັນຕະລາຍທາງທຳມະຊາດ ແລະ ສິ່ງແວດລ້ອມ.
