ພິທີແຖງຂ່າວການຈັດງານ ວາງສະແດງຜະລິດຕະພັນລາວ ປະຈຳປີ 2026 (Made in Laos 2026) ຈັດຂຶ້ນໃນຕອນບ່າຍວັນທີ 1 ກັນຍາ 2026 ທີ່ ສຄອຊ ໂດຍມີ ທ່ານ ນາງ ຈັນທະຈອນ ວົງໄຊ ຮອງປະທານ ສຄອຊ ເປັນປະທານ ພ້ອມດ້ວຍບັນດາຜູ້ຕາງໜ້າພາກລັດ, ພາກທຸລະກິດ ແລະ ແຂກຖືກເຊີນເຂົ້າຮ່ວມ.
ງານ Made in Laos 2026 ຈະຈັດຂຶ້ນໃນວັນທີ 3–11 ຕຸລາ 2026 ລວມ 9 ວັນ ທີ່ ສູນວາງສະແດງສິນຄ້າ ລາວ-ໄອເຕັກ, ນະຄອນຫຼວງວຽງຈັນ. ໂຄງການນີ້ເລີ່ມຈັດຂຶ້ນມາຕັ້ງແຕ່ປີ 2011 ແລະ ໃນປີ 2026 ສຄອຊ ແຂວງຫົວພັນ ໄດ້ຮັບກຽດເປັນເຈົ້າພາບຮ່ວມ.
ພາຍໃນງານຈະມີ 204 ຫ້ອງສະແດງສິນຄ້າ ຈາກ 17 ແຂວງ ແລະ 160 ຫົວໜ່ວຍບໍລິສັດ ເຂົ້າຮ່ວມ ໂດຍຄອບຄຸມ 8 ຂະແໜງສຳຄັນ ໄດ້ແກ່:
1. ຜະລິດຕະພັນທີ່ຕິດກາໝາຍ Made in Laos
2. ຜະລິດຕະພັນ ໜຶ່ງເມືອງ ໜຶ່ງຜະລິດຕະພັນ (ODOP)
3. ຫັດຖະກຳແຜ່ນແພ, ຜ້າຝ້າຍ, ຜ້າໄໝ ແລະ ຫັດຖະກຳເຄື່ອງເງິນ
4. ເຟີນີເຈີ ແລະ ເຄື່ອງຕົກແຕ່ງພາຍໃນເຮືອນ
5. ຜະລິດຕະພັນ ແລະ ປຸງແຕ່ງກະສິກຳ
6. ອາຫານ ແລະ ເຄື່ອງດື່ມ
7. ອຸດສາຫະກຳໜັກ-ເບົາ
8. ທ່ອງທ່ຽວ, ບໍລິການ ແລະ ຂົນສົ່ງ
ສຳລັບແຂວງຫົວພັນ ໃນຖານະເຈົ້າພາບຮ່ວມ ຈະມີການອອກແບບ ແລະ ຕົກແຕ່ງ Booth Pavilion ເປັນພິເສດ ເພື່ອນຳສະເໜີວິຖີຊີວິດ, ຮີດຄອງປະເພນີ, ວັດທະນະທຳ, ອາຫານການກິນ ແລະ ແຫຼ່ງທ່ອງທ່ຽວເດັ່ນຂອງແຂວງ.
ເປົ້າໝາຍສຳຄັນ ຂອງງານ ແມ່ນສົ່ງເສີມໃຫ້ຄົນລາວຫັນມາຊົມໃຊ້ສິນຄ້າລາວຫຼາຍຂຶ້ນ, ຊຸກຍູ້ການຜະລິດພາຍໃນ, ສ້າງລາຍຮັບໃຫ້ຄອບຄົວ ແລະ ຍົກລະດັບ SME ໃຫ້ສາມາດຜະລິດສິນຄ້າມີຄຸນນະພາບ-ມາດຕະຖານ ສາມາດແຂ່ງຂັນໄດ້ທັງຕະຫຼາດພາຍໃນ ແລະ ຕະຫຼາດສົ່ງອອກ.
ພາຍໃນງານຍັງຈະມີການແລກປ່ຽນຄວາມຮູ້-ເຕັກນິກວິຊາການ, ການພົບປະທຸລະກິດ, ການເປີດຕົວສິນຄ້າ-ບໍລິການ, ການໂຄສະນາການທ່ອງທ່ຽວ-ການລົງທຶນ, ການແຈກຂອງລາງວັນ ແລະ ການສະແດງບັນເທີງຕະຫຼອດ 9 ວັນ.
ໃນພິທີແຖງຂ່າວ ຍັງໄດ້ມີການເຊັນ MOU ການເປັນຄູ່ຮ່ວມຍຸດທະສາດ ໃນການຈັດງານ Made in Laos ລະຫວ່າງ ສຄອຊ ແລະ ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ.
ພາຍໃຕ້ MOU ດັ່ງກ່າວ ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ ຕົກລົງສະໜັບສະໜູນງານ Made in Laos ຢ່າງຕໍ່ເນື່ອງ 3 ປີ (2027–2029) ລວມມູນຄ່າ 900 ລ້ານກີບ.
ທີ່ມາ: ຂ່າວເສດຖະກິດແລະສັງຄົມ
