(28 ເມສາ 2026, ທີ່ຫໍປະຊຸມແຫ່ງຊາດ) ໃນກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ XII, ສະຫາຍ ລາວປາວຊົງ ນະວົງໄຊ ກຳມະການສູນກາງພັກ, ຮອງປະທານຜູ້ປະຈຳການສູນກາງແນວລາວສ້າງຊາດ (ສນຊ) ໄດ້ສະເໜີແຜນພັດທະນາອົງການແນວລາວສ້າງຊາດ 5 ປີ (2026-2030) ເຊິ່ງເປັນແຜນຍຸດທະສາດສຳຄັນທີ່ປະກອບດ້ວຍ 6 ແຜນງານ ແລະ 62 ໂຄງການ ເພື່ອສ້າງການຫັນປ່ຽນວຽກງານແນວໂຮມໃຫ້ມີຄວາມເຂັ້ມແຂງ.
ລາຍລະອຽດຂອງ 6 ແຜນງານຫຼັກ ມີດັ່ງນີ້:
1) ແຜນງານເຕົ້າໂຮມ ແລະ ເສີມສ້າງຄວາມສາມັກຄີປອງດອງທົ່ວປວງຊົນລາວ (16 ໂຄງການ): ເນັ້ນການຄົ້ນຄວ້າວິທະຍາສາດວຽກງານແນວໂຮມ, ການອະນຸລັກວັດທະນະທຳບັນດາເຜົ່າ, ສ້າງຄອບຄົວ ແລະ ບ້ານສາມັກຄີປອງດອງ, ພ້ອມທັງສົ່ງເສີມບົດບາດຜູ້ຊົງຄຸນວຸດທິ ແລະ ການພົວພັນກັບພີ່ນ້ອງຄົນລາວຢູ່ຕ່າງປະເທດ.
2) ແຜນງານເຕົ້າໂຮມ ແລະ ເສີມສ້າງຄຸນງາມຄວາມດີ (3 ໂຄງການ): ສຸມໃສ່ການປູກຈິດສຳນຶກຮັກບ້ານເກີດຜ່ານສື່ມວນຊົນ, ປົກປ້ອງເຍົາວະຊົນ-ຊາວໜຸ່ມໃຫ້ຫ່າງໄກຈາກຢາເສບຕິດ ແລະ ຊຸກຍູ້ໃຫ້ກຳມະການແນວໂຮມທັງພາຍໃນ ແລະ ຕ່າງປະເທດ ປະກອບສ່ວນພັດທະນາທ້ອງຖິ່ນ.
3) ແຜນງານເຕົ້າໂຮມ ແລະ ເສີມສ້າງຄຸນວຸດທິ (2 ໂຄງການ): ເນັ້ນການສ້າງຫຼັກສູດບົດບາດຂອງຊັ້ນຄົນໃນສັງຄົມ ແລະ ການຄົ້ນຄວ້າຈັດຕັ້ງສະມາຄົມຊາວກະສິກອນລາວ.
4) ແຜນງານເຕົ້າໂຮມ ແລະ ເສີມສ້າງຄຸນນະທຳ (6 ໂຄງການ): ມຸ່ງເນັ້ນວຽກງານສາສະໜາ ແລະ ການເຊື່ອຖືຂອງບັນດາເຜົ່າ, ຝຶກອົບຮົມການເມືອງ-ແນວຄິດໃຫ້ການຈັດຕັ້ງສາສະໜາ ແລະ ຊຸກຍູ້ການຜະລິດເຄື່ອງຮັບໃຊ້ງານບຸນເພື່ອຫຼຸດຜ່ອນການນຳເຂົ້າ.
5) ແຜນງານສ້າງຄວາມເຂັ້ມແຂງໃຫ້ອົງການແນວລາວສ້າງຊາດແຕ່ລະຂັ້ນ (20 ໂຄງການ): ເປັນແຜນງານທີ່ຮວມເອົາການປັບປຸງນິຕິກຳ, ການຕິດຕາມກວດກາການປະຕິບັດລັດຖະທຳມະນູນ, ການກໍ່ສ້າງບຳລຸງພະນັກງານ, ການຫັນເປັນທັນສະໄໝ ແລະ ການປົກປ້ອງສິດທິແມ່ຍິງ-ເດັກນ້ອຍບັນດາເຜົ່າ.
6) ແຜນງານຮ່ວມມືກັບອົງການພາຄີ ແລະ ສາກົນ (15 ໂຄງການ): ເນັ້ນການຮ່ວມມືກັບອົງການຈັດຕັ້ງມະຫາຊົນ, ການສ້າງຊາຍແດນມິດຕະພາບກັບປະເທດເພື່ອນມິດ (ຫວຽດນາມ, ກຳປູເຈຍ), ການຮ່ວມມືກັບ ສປ ຈີນ ແລະ ໄທ, ພ້ອມທັງຮ່ວມມືກັບພາກທຸລະກິດໃນການພັດທະນາກະສິກຳ ແລະ ພະລັງງານສະອາດ.
ແຜນພັດທະນາດັ່ງກ່າວ ຖືເປັນບາດກ້າວບຸກທະລຸໃນການເສີມຂະຫຍາຍມູນເຊື້ອຄວາມສາມັກຄີ ແລະ ຍົກສູງບົດບາດຂອງອົງການແນວລາວສ້າງຊາດ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະໃໝ່.
ທີ່ມາ: ໜັງສືພິມປະຊາຊົນ (ວັນເພັງ)
