ບັນຍາກາດບຸນປີໃໝ່ລາວຢູ່ນະຄອນຫຼວງພະບາງ ຍັງສືບຕໍ່ມີຄວາມສັກສິດ ແລະ ຄຶກຄື້ນ. ປັດຈຸບັນ, ຄະນະສົງ ພ້ອມດ້ວຍອົງການຈັດຕັ້ງບ້ານຊຽງທອງ ແລະ ບ້ານຄີລີ ກຳລັງເລັ່ງຫ້າງຫາກະກຽມສະຖານທີ່ ປຸກຜາມບຸນ ແລະ ຫໍສົງນ້ຳ ເພື່ອຕ້ອນຮັບພິທີອາຣາດທະນາອັນເຊີນ “ອົງພຣະເຈົ້າໝ່ານ” ພຣະພຸດທະຮູບສັກສິດຄູ່ບ້ານຄູ່ເມືອງ ລົງໃຫ້ຍາດໂຍມໄດ້ຫົດສົງບູຊາ.
ກຳນົດການສຳຄັນທີ່ຄວນຈົດໄວ້:
ວັນພຸດ, ວັນທີ 22 ເມສາ 2026
• ເວລາ 08:30 ໂມງ: ເລີ່ມພິທີອາຣາດທະນາອັນເຊີນ ອົງພຣະເຈົ້າໝ່ານ ລົງຈາກຫໍພຣະ.
• ກິດຈະກຳ: ແຫ່ອ້ອມສີມ (ອາຮາມ) ວັດຊຽງທອງ 3 ຮອບ ຢ່າງສະຫງ່າງາມ.
• ການປະດິດສະຖານ: ອັນເຊີນຂຶ້ນປະທັບທີ່ຫໍສົງນ້ຳ ເພື່ອໃຫ້ສາສະນິກະຊົນທັງພາຍໃນ ແລະ ຕ່າງປະເທດໄດ້ເຂົ້າຄາຣະວະ ແລະ ຫົດສົງຂໍພອນ.
ໄລຍະເວລາຈັດບຸນ:
• ວັນທີ 22 – 26 ເມສາ 2026: ຍາດໂຍມສາມາດມາຫົດສົງໄດ້ຢ່າງຕໍ່ເນື່ອງ.
• ວັນທີ 26 ເມສາ: ມື້ສຸດທ້າຍຂອງພິທີ ຈະມີການອາຣາດທະນາອັນເຊີນອົງພຣະເຈົ້າໝ່ານ ກັບຄືນປະດິດສະຖານສູ່ຫໍພຣະດັ່ງເດີມ.
ການໄດ້ມາຫົດສົງ ອົງພຣະເຈົ້າໝ່ານ ທີ່ວັດຊຽງທອງ ບໍ່ພຽງແຕ່ເປັນການສ້າງບຸນກຸສົນອັນຍິ່ງໃຫຍ່ເທົ່ານັ້ນ ແຕ່ຍັງເປັນການສຳຜັດກັບບັນຍາກາດອັນສວຍງາມວິຈິດບັນຈົງ ຂອງສະຖາປັດຕະຍະກຳລ້ານຊ້າງທີ່ດີທີ່ສຸດແຫ່ງໜຶ່ງໃນເມືອງມໍລະດົກໂລກ.
ຂໍເຊີນຊວນ ພໍ່ແມ່ພີ່ນ້ອງ ແລະ ນັກທ່ອງທ່ຽວທຸກທ່ານ ມາຮ່ວມສ້າງຄວາມຊຸ່ມເຢັນເປັນສຸກ ແລະ ເກັບກຳພາບຄວາມປະທັບໃຈໃນຮີດຄອງປະເພນີອັນເກົ່າແກ່ນີ້ນຳກັນ.
ຂໍ້ມູນຈາກ: ຂ່າວສານຫລວງພະບາງ
