ຫ້ອງວ່າການກະຊວງປ້ອງກັນຄວາມສະຫງົບ (ປກສ) ອອກແຈ້ງການສຳຄັນກ່ຽວກັບການປະຕິຮູບລະບົບຄຸ້ມຄອງພົນລະເມືອງ ໂດຍການຢຸດອອກປຶ້ມສໍາມະໂນຄົວແບບເຈ້ຍ (ແບບເກົ່າ) ແລະ ຫັນມານໍາໃຊ້ລະບົບທັນສະໄໝ ເພື່ອອຳນວຍຄວາມສະດວກໃນການເຮັດທຸລະກຳຕ່າງໆ.
1. ຢຸດການອອກປຶ້ມແບບເກົ່າ:
ກະຊວງ ປກສ ໄດ້ຢຸດເຊົາການອອກປຶ້ມສຳມະໂນຄົວແບບເກົ່າໃຫ້ພົນລະເມືອງລາວ ແລະ ຫັນມາໃຊ້ “ໜັງສືຢັ້ງຢືນຂໍ້ມູນສຳມະໂນຄົວ” (ແບບຟອມ ສຄ07) ທີ່ອອກຈາກລະບົບເອເລັກໂຕຣນິກທີ່ທັນສະໄໝແທນ.
2. ປຶ້ມເກົ່າຍັງໃຊ້ໄດ້:
ສຳລັບບຸກຄົນ ຫຼື ຄອບຄົວທີ່ມີປຶ້ມສຳມະໂນຄົວແບບເກົ່າຢູ່ແລ້ວ ແມ່ນຍັງສາມາດນຳໃຊ້ໄດ້ຕາມປົກກະຕິ ຈົນກວ່າຈະມີແຈ້ງການລົບລ້າງໃນອະນາຄົດ. ແຕ່ສຳລັບຜູ້ທີ່ມີຂໍ້ມູນໃນລະບົບເອເລັກໂຕຣນິກແລ້ວ ແມ່ນໃຫ້ໃຊ້ໜັງສືຢັ້ງຢືນ (ສຄ07) ແທນ.
3. ການນຳໃຊ້ບັດປະຈຳຕົວ ດິຈິຕອນ: 
ພົນລະເມືອງຜູ້ທີ່ມີ ບັດປະຈຳຕົວ ດິຈິຕອນ ແລ້ວ ສາມາດນຳໃຊ້ບັດດັ່ງກ່າວເພື່ອຢັ້ງຢືນຕົວຕົນໃນການປະກອບທຸລະກຳຕ່າງໆ ໄດ້ທັນທີ ເຊິ່ງມີຄຸນຄ່າທາງກົດໝາຍເຊັ່ນດຽວກັນ.
4. ພາກສ່ວນທີ່ສາມາດອອກໜັງສືຢັ້ງຢືນ (ສຄ07):
ປະຊາຊົນສາມາດຕິດຕໍ່ພາກສ່ວນກ່ຽວຂ້ອງເພື່ອຂໍໜັງສືຢັ້ງຢືນໄດ້ຢູ່ 3 ຈຸດຫຼັກ ຄື:
• ກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ.
• ກອງບັນຊາການ ປກສ ນະຄອນຫຼວງວຽງຈັນ ແລະ ປກສ ແຂວງ ທົ່ວປະເທດ.
• ກອງບັນຊາການ ປກສ ເມືອງ ແລະ ປກສ ນະຄອນ ໃນຂອບເຂດທົ່ວປະເທດ.
5. ການອຳນວຍຄວາມສະດວກ:
ຂໍໃຫ້ບັນດາກະຊວງ, ອົງການທຽບເທົ່າ, ອົງການປົກຄອງທ້ອງຖິ່ນ ແລະ ຜູ້ປະກອບການທຸກພາກສ່ວນ ຮັບຊາບ ແລະ ອຳນວຍຄວາມສະດວກໃຫ້ແກ່ພົນລະເມືອງໃນການນຳໃຊ້ເອກະສານແບບໃໝ່ນີ້ ເພື່ອເຮັດທຸລະກຳຕ່າງໆໃຫ້ມີຄວາມຄ່ອງຕົວ.
ການຫັນປ່ຽນຄັ້ງນີ້ ແມ່ນເພື່ອຍົກລະດັບການບໍລິຫານລັດໃຫ້ມີຄວາມວ່ອງໄວ, ປອດໄພ ແລະ ສອດຄ່ອງກັບທິດທາງການພັດທະນາເສດຖະກິດ-ສັງຄົມດິຈິຕອນຂອງຊາດ.
