ສປປ ລາວ ຈົດທະບຽນພັນພືດໃໝ່ສະບັບທຳອິດເປັນຜົນສຳເລັດ! ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ໃຫ້ກຽດມອບໃບຢັ້ງຢືນການຈົດທະບຽນໃຫ້ແກ່ສາຍພັນ “ມອນເບີລີ ອຸ້ມຮັກ ນໍ້າເບີ 1”, ຢືນຢັນຄວາມສາມາດຂອງນັກປັບປຸງພັນພືດລາວໃນເວທີສາກົນ.
ໃນໂອກາດເຄື່ອນໄຫວເຮັດວຽກຢູ່ແຂວງຫຼວງພະບາງ, ທ່ານ ມະໄລທອງ ກົມມະສິດ ໄດ້ມອບໃບຢັ້ງຢືນການຈົດທະບຽນພັນພືດໃໝ່ໃຫ້ແກ່ ທ່ານ ແກ່ນຈັນ ສົມມາວົງ, ເຈົ້າຂອງ ແລະ ນັກປັບປຸງພັນພືດ “ມອນເບີລີ ອຸ້ມຮັກ ນໍ້າເບີ 1”. ໂດຍມີ ທ່ານ ປອ. ບຸນເຫຼືອ ສິນໄຊວໍລະວົງ, ປະທານຄະນະກຳມະການປົກຄອງແຂວງຫຼວງພະບາງ ພ້ອມດ້ວຍຄະນະນຳຈາກກົມຊັບສິນທາງປັນຍາ ແລະ ພາກສ່ວນກ່ຽວຂ້ອງເຂົ້າຮ່ວມເປັນສັກຄີພິຍານ.
ສາຍພັນມອນນີ້ແມ່ນຜົນສຳເລັດຈາກການຄັດເລືອກໂດຍທຳມະຊາດ ແລະ ການພັດທະນາຂອງຊາວກະສິກອນທ້ອງຖິ່ນ ເຊິ່ງມີຈຸດເດັ່ນທີ່ໜ້າສົນໃຈ:
• ຄວາມທົນທານ: ທົນທານຕໍ່ພະຍາດ, ແມງໄມ້ ແລະ ປັບຕົວເຂົ້າກັບສະພາບແຫ້ງແລ້ງໄດ້ດີ.
• ຄຸນນະພາບຜົນຜະລິດ: ໝາກມີຂະໜາດໃຫຍ່, ສີສັນສວຍງາມ, ມີລົດຊາດຫວານຫອມເປັນເອກະລັກ.
ໂຄງການນີ້ແມ່ນການຮ່ວມມືລະຫວ່າງ ກົມຊັບສິນທາງປັນຍາ (ກະຊວງ ອຄ) ແລະ ສະຖາບັນ NAFRI (ກະຊວງກະສິກຳ ແລະ ສິ່ງແວດລ້ອມ) ເຊິ່ງໄດ້ຜ່ານການທົດລອງປູກຕາມມາດຕະຖານ DUS (ຄວາມແຕກຕ່າງ, ຄວາມສະໝໍ່າສະເໝີ ແລະ ຄວາມຄົງຕົວ) ເປັນເວລາ 18 ເດືອນ ທີ່ສູນຫາດດອກແກ້ວ ເພື່ອປຽບທຽບກັບສາຍພັນພື້ນເມືອງອື່ນໆ ຈົນໄດ້ຮັບການຈົດທະບຽນຢ່າງເປັນທາງການໃນວັນທີ 6 ມີນາ 2026.
ການຈົດທະບຽນພັນພືດໃໝ່ສະບັບທຳອິດນີ້ ຖືເປັນບາດກ້າວສຳຄັນໃນການ:
• ຄຸ້ມຄອງສິດ: ຮັບຮູ້ສິດຂອງນັກປັບປຸງພັນພືດຕາມກົດໝາຍວ່າດ້ວຍຊັບສິນທາງປັນຍາ.
• ສ້າງລາຍຮັບ: ເຈົ້າຂອງພັນສາມາດຜະລິດ, ຈຳໜ່າຍ ຫຼື ໃຫ້ສິດ (Licensing) ແກ່ຜູ້ອື່ນເພື່ອຂະຫຍາຍຜົນທາງທຸລະກິດ.
• ເພີ່ມມູນຄ່າ: ຊ່ວຍສ້າງແບຣນສິນຄ້າ ແລະ ເປີດໂອກາດໃຫ້ສິນຄ້າກະສິກຳລາວແຂ່ງຂັນໄດ້ໃນຕະຫຼາດຕ່າງປະເທດ.
ພາກສ່ວນກ່ຽວຂ້ອງຈະນຳບົດຮຽນຈາກຄວາມສຳເລັດນີ້ ໄປຜັກດັນການຈົດທະບຽນພັນພືດຊະນິດອື່ນໆ ທີ່ມີທ່າແຮງ ເຊັ່ນ: ເຂົ້າພື້ນເມືອງ ແລະ ໝາກໄມ້ພື້ນເມືອງ ເພື່ອອະນຸລັກຊັບພະຍາກອນພັນທຸກຳຂອງຊາດ ແລະ ສົ່ງເສີມນັກຄົ້ນຄວ້າລາວໃຫ້ມີກຳລັງໃຈໃນການພັດທະນາກະສິກຳໃຫ້ທັນສະໄໝ.
ທີ່ມາ: ຂ່າວສານອຸດສາຫະກຳ ແລະ ການຄ້າ
