ບັນຫາຢາເສບຕິດໃນປັດຈຸບັນໄດ້ມີການຫັນປ່ຽນຮູບແບບທີ່ອັນຕະລາຍ ແລະ ແນບນຽນຍິ່ງຂຶ້ນ ໂດຍສະເພາະແມ່ນການນໍາໃຊ້ງານລ້ຽງ ແລະ ສື່ສັງຄົມອອນລາຍເປັນເຄື່ອງມືໃນການມົ້ວສຸມ ແລະ ຕົວະຍົວະເຍົາວະຊົນໃຫ້ຕົກເປັນເຫຍື່ອ.
ຢາເສບຕິດຮູບແບບໃໝ່: ອັນຕະລາຍກວ່າທີ່ຄິດ
ປັດຈຸບັນມີການແຜ່ລະບາດຂອງສານເສບຕິດທີ່ຖືກດັດແປງໃຫ້ເບິ່ງຄືເຄື່ອງດື່ມ ຫຼື ສິນຄ້າທົ່ວໄປ ເຊັ່ນ:
• ກາເຟປະສົມສານເສບຕິດ / ຄໍລາເຈນ
• ນໍ້າກະທ້ອມ / ຢາສູບໄຟຟ້າ (Vape)
• ສານໄນຕັດອ໋ອກຊາຍ (ລູກປຸມເປົ້າ) ສິ່ງເຫຼົ່ານີ້ມັກຖືກນຳໄປມົ້ວສຸມຕາມສະຖານທີ່ບັນເທີງ ເຊັ່ນ: ເທັກ, ບາ, ຄາຣາໂອເກະ ລວມໄປເຖິງງານດອງ ແລະ ງານບຸນປະເພນີຕ່າງໆ.
ຢາເສບຕິດຄໍລະເຈນ: ຢາເສບຕິດຊະນິດນີ້ບໍ່ແມ່ນຄໍລະເຈນແທ້, ແຕ່ເປັນການນຳເອົາ ຢາເສບຕິດຫຼາຍຊະນິດມາປະສົມກັນ ແລ້ວບັນຈຸໃສ່ໃນຊອງທີ່ອອກແບບໃຫ້ຄືກັບຊອງຄໍລະເຈນ ຫຼື ເຄື່ອງດື່ມບຳລຸງສຸຂະພາບທົ່ວໄປ ເພື່ອຕົບຕາເຈົ້າໜ້າທີ່ ແລະ ດຶງດູດໄວຮຸ່ນ.
ສ່ວນປະກອບສ່ວນໃຫຍ່ທີ່ກວດພົບ:
• ຢາອີ່ (Ecstasy/MDMA): ເຮັດໃຫ້ເກີດອາການເຄີບເຄີ້ມ, ມ່ວນຊື່ນຜິດປົກກະຕິ.
• ຢາເຄ (Ketamine): ອອກລິດກົດປະສາດ ແລະ ເຮັດໃຫ້ເກີດພາບຫຼອນ.
• ຢານອນຫຼັບ (Nimetazepam): ເພີ່ມລິດການມຶນເມົາ.
• ຄາເຟອີນ (Caffeine): ກະຕຸ້ນໃຫ້ຫົວໃຈເຕັ້ນໄວ ແລະ ຕື່ນຕົວ
ຮູບແບບການເສບ ແລະ ການລະບາດ
• ວິທີການ: ມັກຈະນຳມາປະສົມກັບນ້ຳດື່ມ, ນ້ຳອັດລົມ ຫຼື ເຄື່ອງດື່ມມຶນເມົາ ເພື່ອດື່ມໃນງານສັງສັນ.
• ລັກສະນະ: ເປັນຜົງສີຂາວ ຫຼື ສີບົວອ່ອນ ບັນຈຸໃນຊອງນ້ອຍໆ ທີ່ມີຮູບຊົງທັນສະໄໝ.
• ກຸ່ມເປົ້າໝາຍ: ເນັ້ນໃສ່ໄວຮຸ່ນ ແລະ ນັກທ່ຽວກາງຄືນ ໂດຍການໂຄສະນາຊວນເຊື່ອວ່າ “ກິນແລ້ວມີຄວາມສຸກ, ບໍ່ອັນຕະລາຍ”.
ອັນຕະລາຍຕໍ່ຮ່າງກາຍ
ຍ້ອນມັນເປັນ “ຢາປະສົມ” (Cocktail Drugs), ຮ່າງກາຍຈຶ່ງໄດ້ຮັບສານເຄມີຫຼາຍຢ່າງພ້ອມກັນ ເຊິ່ງສົ່ງຜົນກະທົບຮຸນແຮງດັ່ງນີ້:
• ລະບົບປະສາດ: ເກີດພາບຫຼອນ, ອາການຫວາດລະແວງ, ເສຍສະຕິ ແລະ ສູນເສຍການຄວບຄຸມຕົນເອງ.
• ລະບົບຫົວໃຈ: ຫົວໃຈເຕັ້ນໄວຜິດຈັງຫວະ, ຄວາມດັນເລືອດສູງຂຶ້ນຢ່າງກະທັນຫັນ.
• ພາວະ Shock: ຫາກຮ່າງກາຍຮັບບໍ່ໄຫວ ອາດເຮັດໃຫ້ລະບົບຫາຍໃຈລົ້ມເຫຼວ ຫຼື ຫົວໃຈວາຍໄດ້.
• ການເສບຕິດ: ອອກລິດຮຸນແຮງກວ່າຢາເສບຕິດຊະນິດດ່ຽວ ເຮັດໃຫ້ຕິດໄດ້ງ່າຍ ແລະ ເລີກຍາກ.
ກົນອຸບາຍທີ່ໜ້າຢ້ານກົວ ສິ່ງທີ່ທ້າທາຍທີ່ສຸດແມ່ນການ “ບັງຄັບ ຫຼື ລັກປະສົມ” ໃສ່ເຄື່ອງດື່ມ ເພື່ອຕົວະຍົວະໃຫ້ຄົນທີ່ບໍ່ຮູ້ເລື່ອງທົດລອງເສບ. ມີໄວໜຸ່ມຈຳນວນບໍ່ໜ້ອຍທີ່ຕົກເປັນເຫຍື່ອໂດຍບໍ່ຮູ້ຕົວ ເຊິ່ງບາງກໍລະນີຮ້າຍແຮງເຖິງຂັ້ນ “ຊ໋ອກ ແລະ ເສຍຊີວິດ” ຢ່າງໜ້າເສຍດາຍ.
ວິທີປ້ອງກັນ ແລະ ແກ້ໄຂ ເພື່ອຮ່ວມກັນກໍາຈັດບັນຫານີ້
• ມີສະຕິ ແລະ ຮອບຄອບ: ບໍ່ຊຸກຍູ້ ຫຼື ສົ່ງເສີມພຶດຕິກຳທີ່ຜິດກົດໝາຍໃນທຸກຮູບແບບ.
• ແຈ້ງເຈົ້າໜ້າທີ່: ເມື່ອເຫັນເຫດການມົ້ວສຸມ ຫຼື ການກະທຳທີ່ບໍ່ເໝາະສົມ ໃຫ້ແຈ້ງອົງການປົກຄອງຂັ້ນຕ່າງໆທັນທີ.
• ເພີ່ມການຕິດຕາມ: ເຈົ້າໜ້າທີ່ຕ້ອງເພີ່ມຄວາມເຂັ້ມງວດໃນການກວດກາ ແລະ ແກ້ໄຂບັນຫາໃຫ້ເດັດຂາດ ແລະ ທັນສະພາບການ.
ຢ່າປ່ອຍໃຫ້ຄວາມມ່ວນຊື່ນຊົ່ວຄາວ ກາຍເປັນຄວາມເສົ້າຕະຫຼອດຊີວິດ. ຮ່ວມກັນຕ້ານຢາເສບຕິດ ເພື່ອສັງຄົມທີ່ປອດໄພ!
ທີ່ມາ: ກົມສື່ມວນຊົມ ປກສ
Lao Youth Radio FM 90.0 MHz
