ກະຊວງສາທາລະນະສຸກຂອງຫວຽດນາມ ໄດ້ອອກມາດຕະການໃໝ່ເພື່ອຍົກລະດັບຄວາມປອດໄພຂອງອາຫານຂ້າງທາງ ໃນທົ່ວປະເທດ. ໃຜທີ່ເປັນສາຍທ່ຽວ ຫຼື ມັກກິນອາຫານຕາມແຄມທາງຢູ່ຫວຽດນາມ ຕ້ອງຮູ້ໄວ້!
ຂໍ້ກຳນົດ ແລະ ຄ່າປັບໃໝທີ່ຄວນຮູ້:
ມາດຕະການໃໝ່ນີ້ເນັ້ນໃສ່ຄວາມສະອາດ ແລະ ສຸຂະອະນາໄມເປັນຫຼັກ ໂດຍມີບົດລົງໂທດປັບໃໝແຕ່ 500,000 ດົງ ຫາ 3 ລ້ານດົງ:
ລະດັບປັບໃໝ 5 ແສນ – 1 ລ້ານດົງ: ສໍາລັບຮ້ານທີ່ບໍ່ມີໂຕະ ຫຼື ຊັ້ນວາງອາຫານທີ່ສະອາດ, ບໍ່ມີຜ້າປິດກັນຝຸ່ນ ແລະ ແມງໄມ້, ຫຼື ຜູ້ຂາຍບໍ່ໃສ່ຖົງມືໃນເວລາຈັບບາຍອາຫານທີ່ປຸງແຕ່ງແລ້ວ.
ລະດັບປັບໃໝ 1 ລ້ານ – 3 ລ້ານດົງ: ສໍາລັບຄວາມຜິດທີ່ຮ້າຍແຮງກວ່າ ເຊັ່ນ: ນຳໃຊ້ພາຊະນະທີ່ບໍ່ປອດໄພ, ຜູ້ປຸງແຕ່ງອາຫານມີພະຍາດຕິດຕໍ່, ນຳໃຊ້ວັດຖຸເຈືອປົນອາຫານທີ່ບໍ່ຖືກຕ້ອງ, ຫຼື ໃຊ້ນ້ຳທີ່ບໍ່ໄດ້ມາດຕະຖານໃນການປຸງແຕ່ງ.
ເປັນຫຍັງຕ້ອງເຂັ້ມງວດ?
ເນື່ອງຈາກໄລຍະຜ່ານມາ ມີລາຍງານກໍລະນີອາຫານເປັນພິດເພີ່ມຂຶ້ນ ໂດຍສະເພາະໃນເຂດທ່ອງທ່ຽວ ແລະ ງານບຸນຕ່າງໆ.
ລັດຖະບານຫວຽດນາມ ຈຶ່ງຕ້ອງການສ້າງຄວາມໝັ້ນໃຈໃຫ້ແກ່ນັກທ່ອງທ່ຽວ ແລະ ປົກປ້ອງສຸຂະພາບຂອງປະຊາຊົນ.
ສິ່ງທີ່ຮ້ານຄ້າຕ້ອງເຮັດ:
– ຕ້ອງຜ່ານການອົບຮົມດ້ານຄວາມປອດໄພຂອງອາຫານ.
– ຜູ້ຂາຍຕ້ອງມີສຸຂະພາບແຂງແຮງ, ບໍ່ມີພະຍາດຕິດຕໍ່.
– ສະຖານທີ່ຂາຍຕ້ອງຫ່າງໄກຈາກແຫຼ່ງມົນລະພິດ ແລະ ມີການປົກປິດອາຫານຢ່າງມິດຊິດ.
ສະຫຼຸບ: ການໄປກິນ Street Food ຢູ່ຫວຽດນາມໃນຕໍ່ໜ້າຈະມີຄວາມປອດໄພ ແລະ ສະອາດຂຶ້ນກວ່າເກົ່າ!
ຖືວ່າເປັນຂ່າວດີສຳລັບນັກຊິມທັງຫຼາຍເລີຍແມ່ນບໍ່? ແລະ ທ່ານຢາກໃຫ້ປະເທດລາວ ມີມາດຕະການແບບນີ້ບໍ່?
ທີ່ມາ: tuoi tre news
ຮຽບຮຽງໂດຍ Lao Youth Radio FM90MHz
