ຫົວໜ້າສະກັດກັ້ນ ແລະ ປາບປາມຢາເສບຕິດ ຂອງໄທ ໄດ້ອອກມາເຕືອນພໍ່ແມ່ຜູ້ປົກຄອງໃຫ້ລະວັງຢາເສບຕິດຊະນິດໃໝ່ ທີ່ມີການລາຍງານວ່າ ກຳລັງແຜ່ລາມໃນໝູ່ເດັກນັກຮຽນ ແລະ ໄວໜຸ່ມ. ຢາເສບຕິດເຫຼົ່ານີ້ຖືກອອກແບບໃຫ້ມີລັກສະນະຄ້າຍຄືກັບຂອງຫຼິ້ນ, ຂອງກິນ, ແລະເຄື່ອງດື່ມໝາກໄມ້ທົ່ວໄປ ເພື່ອຫຼອກລວງໃຫ້ເດັກນ້ອຍຄິດວ່າບໍ່ມີອັນຕະລາຍ.
ຢາເສບຕິດຊະນິດໃໝ່ທີ່ ພົບເຫັນ ປະກອບມີ:
1. ຢາສູບໄຟຟ້າ GEN 6 – ຮູບແບບຢາດົມ
• ມີລັກສະນະຄ້າຍແທ່ງຢາດົມທົ່ວໄປ
• ສາມາດສູບໄດ້ທັງທາງດັງ ແລະ ທາງປາກ
• ຂາຍຜ່ານອອນລາຍດ້ວຍລາຄາ ປະມານ 100 ບາດ ຫຼື 60,000 ກີບເທົ່ານັ້ນ
2. ພອດກັນຊາໄຟຟ້າ – ຄ້າຍຂອງຫຼິ້ນ
• ອອກແບບໃຫ້ຄ້າຍຂອງຫຼິ້ນ, ຂອງກິນ, ຫຼືໝາກໄມ້
• ງ່າຍຕໍ່ການຫຼອກລວງເດັກນ້ອຍ
• ສາມາດຊື້ໄດ້ງ່າຍໆຜ່ານອິນເຕີເນັດ
3. Lean (ລີນ) – ນ້ຳສີມ້ວງ
• ເປັນນ້ຳສີມ້ວງທີ່ປະສົມກັບນ້ຳອັດລົມ
• ເສບແລ້ວເຮັດໃຫ້ມຶນເມົາ
• ມີຄວາມສ່ຽງຕໍ່ການຢຸດເຕັ້ນຂອງຫົວໃຈ
4. ຢາອີແບບໃໝ່ (Molly) – ຄ້າຍຄືລູກອົມ
• ມີລັກສະນະຄ້າຍລູກອົມ
• ເປັນເມັດສີພາສເທລ ມີຮູບແບບດາວ, ຫົວໃຈ, ຕຸ໊ກຕາ
• ກະຕຸ້ນແລະຫຼອນປະສາດ ອັນຕະລາຍຕໍ່ຊີວິດ
ຄຳແນະນຳສຳລັບພໍ່ແມ່ຜູ້ປົກຄອງ:
1. ໃຫ້ໝັ່ນສອດສ່ອງເບິ່ງພຶດຕິກຳ – ເອົາໃຈໃສ່ການປ່ຽນແປງຂອງພຶດຕິກຳ ຂອງລູກຫຼານ
2. ສື່ສານເປີດໃຈ – ສ້າງສະພາບແວດລ້ອມທີ່ລູກຫຼານ ສາມາດເວົ້າ ໂອລົມ ໄດ້ ແບບຕໍ່ໜ້າ
3. ໃຫ້ຄວາມຮູ້ – ອະທິບາຍ ອັນຕະລາຍຂອງຢາເສບຕິດ ເຫຼົ່ານີ້
4. ກວດກາຂອງໃຊ້ – ກວດເບິ່ງ ເຄື່ອງຂອງທີ່ລູກຫຼານ ຊື້ ຫຼື ນຳກັບມາ ເຮືອນ
ສັນຍານເຕືອນ:
• ມີຂອງແປກໆທີ່ບໍ່ເຄີຍເຫັນມາກ່ອນ
• ພຶດຕິກຳປ່ຽນແປງກະທັນຫັນ
• ຕາແດງ, ເຫງົານອນ, ຫຼື ກະຕືລືລົ້ນຜິດປົກກະຕິ
• ມີກິ່ນແປກໆ ຢູ່ໃນຮ່າງກາຍຫຼືເສື້ອຜ້າ ຂອງລູກຫຼານ
ຢ່າປ່ອຍໃຫ້ໜ້າຕາທີ່ເບິ່ງຄືບໍ່ມີພິດໄພ ພາໃຫ້ເດັກນ້ອຍຕົກເປັນເຫຍື່ອ! ຫາກພົບເຫັນການຂາຍຫຼືການນຳໃຊ້ຢາເສບຕິດເຫຼົ່ານີ້ ໃຫ້ແຈ້ງໃຫ້ເຈົ້າໜ້າທີ່ທີ່ກ່ຽວຂ້ອງຊາບໂດຍທັນທີ.
ຫມາຍເຫດ: ບົດຄວາມນີ້ແປແລະດັດແປງຈາກ ຂ່າວສົດ ພາກພາສາໄທ ເພື່ອເຜີຍແຜ່ຂໍ້ມູນສຳຄັນກ່ຽວກັບການປ້ອງກັນຢາເສບ ຕິດໃນໝູ່ໄວໜຸ່ມລາວ.
