ວັນທີ 13 ກໍລະກົດ 2026 ທີ່ຜ່ານມາ, ເຈົ້າໜ້າທີ່ວິຊາສະເພາະ ກອງບັນຊາການ ປກສ ເມືອງປາກລາຍ ແຂວງໄຊຍະບູລີ ໄດ້ສົມທົບກັບພາກສ່ວນທີ່ກ່ຽວຂ້ອງ, ລົງກວດຄົ້ນເຄຫະສະຖານ ເຮືອນພັກແຫ່ງໜຶ່ງ ຢູ່ບ້ານຫ້ວຍລາຍນ້ອຍ ເມືອງປາກລາຍ ແຂວງໄຊຍະບູລີ ທີ່ໃຫ້ຄົນຕ່າງປະເທດເຊົ່າ, ເຊິ່ງເປັນເປົ້າໝາຍສົງໄສ ດໍາເນີນການກ່ຽວກັບການສໍ້ໂກງທາງອອນລາຍ (ສະແກມເມີ).
ຜ່ານການກວດກາຄົ້ນສະຖານທີ່ດັ່ງກ່າວ, ສາມາດກັກຕົວເປົ້າໝາຍໄດ້ທັງໝົດ 47 ຄົນ, ຍິງ 10 ຄົນ, ກັກຢູ່ໃນສະຖານທີ່ 41 ຄົນຍິງ 3 ຄົນ, ໃນນີ້:
– ຄົນສັນຊາດອິນໂດເນເຊຍ 38 ຄົນ, ຍິງ 9 ຄົນ
– ສັນຊາດຈີນ 4 ຄົນ,
– ຄົນສັນຊາດລາວ 1 ຄົນ,
– ຄົນສັນຊາດຫວຽດນາມ 1 ຄົນ ເປັນເພດຍິງ
ສາມາດຍຶດຂອງກາງ ໄດ້ມີຄື: ຄອມພີວເຕີໂນດບຸກ 22 ເຄື່ອງ, ໄອແພັດ 1 ໜ່ວຍ, ໂທລະສັບ 228 ໜ່ວຍ, ລົດຈັກໄຟຟ້າ 2 ຄັນ, ບັດປະຕົວຈຳນວນ 39 ບັດ, ປຶ້ມພັດສະປອດ 20 ຫົວ, ປຶ້ມບັນຊີເງິນຝາກທະນາຄານມີ 1 ຫົວ, ໃບທະບຽນອານຸຍາດແຕ່ງດອງມີ 1 ໃບ, ປຶ້ມບັດແຮງງານ 6 ຫົວ, ປຶ້ມພັກເຊົາ 5 ຫົວ, ໝໍ້ເກັບໄຟ 1 ໜ່ວຍ, ສະຕາດິງ 1 ຊຸດ.
ຜ່ານການສືບສວນ-ສອບສວນ ຂອງເຈົ້າໜ້າທີ່ວິຊາສະເພາະ ພວກຜູ້ກ່ຽວໄດ້ໃຫ້ການຮັບສາລະພາບວ່າ: ໃນຕົ້ນເດືອນພຶດສະພາ 2026 ຄົນສັນຊາດຈີນ 7 ຄົນ, ເປັນຜູ້ຊັກຊວນເອົາພວກກ່ຽວຈໍານວນດັ່ງກ່າວ, ເຂົ້າມາສອນເຮັດວຽກ ກ່ຽວກັບການສໍ້ໂກງທາງອອນລາຍ (ສະແກມເມີ) ໂດຍໃຫ້ຄ່າຈ້າງເປັນເດືອນ, ຄົນລະ 600 ໂດລາຕໍ່ຄົນຕໍ່ເດືອນ, ສ່ວນຄົນລາວເປັນນາຍແປພາສາໄດ້ເງິນເດືອນລະ 10,000,000 ກີບ.
ທີ່ມາ: ປກສ ແຂວງໄຊຍະບູລີ
