ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ກ່າວໃນກອງປະຊຸມສະໄໝວິສາມັນຂອງສະພາແຫ່ງຊາດຊຸດທີ X ໃນເຊົ້າວັນທີ 6 ກໍລະກົດ 2026 ນີ້ວ່າ: ຕໍ່ກັບວຽກງານປ້ອງກັນຊາດ-ປ້ອງກັນຄວາມສະຫງົບ ໃນ 6 ເດືອນຕົ້ນປີ 2026 ເຈົ້າໜ້າທີ່ໄດ້ສຸມໃສ່ວຽກງານກໍ່ສ້າງຮາກຖາມການເມືອງ ຕິດພັນກັບການພັດທະນາຊົນນະບົດຢ່າງມີຈຸດສຸມ ສະກັດກັ້ນ ແລະ ຕ້ານທຸກການເຄື່ອນໄຫວຂອງກຸ່ມຄົນບໍ່ດີ, ສາມາດຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ໂດຍໄດ້ສຸມໃສ່ແກ້ໄຂບັນຫາຢາເສບຕິດ ຊຶ່ງສາມາດມ້າງຄະດີໄດ້ທັງໝົດ 1,786 ເລື່ອງ ຈັບຜູ້ຖືກຫາໄດ້ 4,025 ຄົນ ໃນນັ້ນເປັນຄົນຕ່າງປະເທດ 93 ຄົນ, ຢຶດຂອງກາງຢາເສບຕິດໄດ້ຈຳນວນຫຼາຍ ລວມທັງພາຫະນະຈຳນວນໜຶ່ງ.
ພ້ອມດຽວກັນນີ້ໄດ້ນຳເອົາເປົ້າໝາຍຜູ້ເສບຢາເສບຕິດ ເຂົ້າສູນບຳບັດ-ປິ່ນປົວ, ຟື້ນຟູສຸຂະພາບ 7,046 ຄົນຍິງ 412 ຄົນ ປົວດີ ໄດ້ກັບບ້ານແລ້ວ 2,769 ຄົນຍິງ 217 ຄົນ.
ນອກນັ້ນ, ຍັງສາມາດແກ້ໄຂກຸ້ມແກ້ງສໍ້ໂກງຊັບທາງເອເລັກໂຕຣນິກ ຫຼື ອາຊະຍາກຳທາງໄຊເບີ ໄດ້ທັງໝົດ 44 ຄັ້ງ, ລວມແລ້ວ 4,482 ຄົນ ໃນນັ້ນເປັນຍິງ 1,032 ຄົນ ລວມມີ 25 ສັນຊາດ ໃນນີ້ມີຄົນລາວ 779 ຄົນ ຍິງ 203 ຄົນ.
ທີ່ມາ: ຄວາມສະຫງົບ
Lao Youth Radio FM90MHz
