ກະຊວງສຶກສາທິການ ແລະ ກິລາ (ສສກ) ແຫ່ງ ສປປ ລາວ ໂດຍການສະໜັບສະໜູນຈາກ ລັດຖະບານອົດສະຕຣາລີ ຜ່ານແຜນງານບີຄວາ (BEQUAL) ໄດ້ຈັດກອງປະຊຸມເປີດຕົວ ໂຄງການແມ່ຍິງໃນການເປັນຜູ້ນຳ (Women in Leadership) ຢ່າງເປັນທາງການ ໃນລະຫວ່າງວັນທີ 18-20 ພຶດສະພາ 2026 ນີ້ ທີ່ຫ້ອງປະຊຸມນາປາກກວາງ, ເມືອງທຸລະຄົມ, ແຂວງວຽງຈັນ.
ກອງປະຊຸມຄັ້ງນີ້ ໃຫ້ກຽດເປັນປະທານໂດຍ ທ່ານ ປອ ຕຸລາວັນ ໜໍ່ເມືອງເສດ, ຫົວໜ້າກົມຈັດຕັ້ງ ແລະ ພະນັກງານ, ກະຊວງສຶກສາທິການ ແລະ ກິລາ, ໂດຍມີຜູ້ບໍລິຫານ, ຄະນະສະຫະພັນແມ່ຍິງ ແລະ ພະນັກງານວິຊາການເຂົ້າຮ່ວມທັງໝົດ 30 ທ່ານ.
ໂຄງການດັ່ງກ່າວຖືກອອກແບບມາເພື່ອຂັບເຄື່ອນ ແລະ ສົ່ງເສີມການປ່ຽນແປງ ທັງໃນລະດັບບຸກຄົນ ແລະ ສະຖາບັນ ໂດຍຜ່ານ 3 ອົງປະກອບສຳຄັນ ຄື:
1. ການສ້າງຄວາມສາມາດໃນການເປັນຜູ້ນຳ (Leadership Capacity Building): ເນັ້ນການພັດທະນາທັກສະສ່ວນບຸກຄົນ, ການສື່ສານ, ການຮຽນຮູ້ຕະຫຼອດຊີວິດ ແລະ ຄວາມເຂົ້າໃຈກ່ຽວກັບຄວາມສະເໝີພາບຍິງ-ຊາຍ. ພ້ອມທັງສ້າງພື້ນທີ່ແລກປ່ຽນບົດຮຽນ ແລະ ວາງແຜນປະຕິບັດງານເພື່ອສົ່ງເສີມການສຶກສາຮຽນຮ່ວມ (Inclusive Education).
2. ການສ້າງຄູຝຶກເພື່ອການເຊື່ອມໂຍງ (Training of Trainers): ສົ່ງເສີມການນຳເອົາຄວາມສະເໝີພາບຍິງ-ຊາຍ ແລະ ການສະໜັບສະໜູນຜູ້ພິການເຂົ້າສູ່ບ່ອນເຮັດວຽກ. ຜູ້ເຂົ້າຮ່ວມຈະໄດ້ຝຶກຝົນເປັນຜູ້ອຳນວຍຄວາມສະດວກ ເພື່ອຈັດກອງປະຊຸມອົບຮົມຮ່ວມກັບຜູ້ນຳອາວຸໂສ ແລະ ພະນັກງານພາຍໃນກະຊວງ.
3. ການສ້າງຄວາມເຂັ້ມແຂງໃຫ້ແກ່ສະຖາບັນ (Institutional Strengthening): ເນັ້ນການຫັນປ່ຽນທິດສະດີໄປສູ່ການປະຕິບັດຕົວຈິງ ໂດຍການທົດລອງນຳໃຊ້ ເຄື່ອງມືປະເມີນຕົນເອງດ້ານການຄຸ້ມຄອງຄວາມສະເໝີພາບຍິງ-ຊາຍ (GEM) ໃນບ່ອນເຮັດວຽກ ເພື່ອປັບປຸງນະໂຍບາຍ ແລະ ສ້າງສະພາບແວດລ້ອມທີ່ເອື້ອອຳນວຍຕໍ່ຄວາມກ້າວໜ້າຂອງແມ່ຍິງ.
ການມີສ່ວນຮ່ວມ ແລະ ກຸ່ມເປົ້າໝາຍ:
ກຸ່ມຫຼັກ: ຄະນະບໍລິຫານງານສະຫະພັນແມ່ຍິງລາວ ຂອງກະຊວງ ສສກ ຈຳນວນ 19 ທ່ານ ທີ່ຈະເຂົ້າຮ່ວມກິດຈະກຳຢ່າງເຂັ້ມຂຸ້ນໃນທັງ 3 ອົງປະກອບ.
ກຸ່ມສະໜັບສະໜູນ: ສະມາຊິກອີກ 75 ທ່ານ ທີ່ຈະຮ່ວມຊຸກຍູ້ການພັດທະນາວິຊາຊີບ, ສ້າງຈິດສຳນຶກ ແລະ ເຂົ້າຮ່ວມການຝຶກອົບຮົມທີ່ກ່ຽວຂ້ອງ.
ໂຄງການນີ້ ຖືເປັນກ້າວເດີນຄັ້ງສຳຄັນໃນການຍົກລະດັບບົດບາດຍິງ-ຊາຍ ແລະ ສ້າງໂອກາດທີ່ເທົ່າທຽມໃນຂະແໜງການສຶກສາ ແລະ ກິລາ ໃຫ້ມີຄວາມເຂັ້ມແຂງຍິ່ງໆຂຶ້ນໄປ. 
Lao Youth Radio FM90MHz
