ເພື່ອສຸມໃສ່ການກະກຽມ ຂະບວນການປູກຕົ້ນໄມ້ ໃນວັນປູກຕົ້ນໄມ້ແຫ່ງຊາດ ວັນທີ່ 1 ມິຖຸນາ ແລະ ສະເຫຼີມສະຫຼອງ ວັນສີ່ງແວດລ້ອມໂລກ-ວັນສິ່ງແວດລ້ອມແຫ່ງຊາດ ວັນທີ 5 ມິຖຸນາ, ໃນປີນີ້ ໃຫ້ຟົດຟື້ນ ກວ້າງຂວາງ ຄະນະນຳພະແນກກະສິກຳ ແລະ ສິ່ງແວດລ້ອມ ແຂວງຫຼວງພະບາງ ໄດ້ສົມທົບກັບບັນດາເມືອງ ສຳຫຼວດພື້ນທີ່ປູກຕົ້ນໄມ້, ມາຮອດປັດຈຸບັນມີຄວາມພ້ອມແລ້ວທຸກເມືອງ ຄາດວ່າຈະປູກຕົ້ນໄມ້ຟື້ນຟູໃຫ້ໄດ້ 1.000.000 ເບ້ຍ ໃນເນື້ອທີ່ 300 ກວ່າເຮັກຕ່າ.
ທ່ານ ສົມແວວເພັດ ດວງປະສິດ ຫົວໜ້າພະແນກກະສິກຳ ແລະ ສິ່ງແວດລ້ອມ ໄດ້ໃຫ້ສຳພາດວ່າ: ສຳລັບພິທີປູກຕົ້ນໄມ້ ໃນວັນປູກຕົ້ນໄມ້ແຫ່ງຊາດ, ຂະບວນການໃຫຍ່ຂອງແຂວງ ໄດ້ກະກຽມສະຖານທີ່ປູກ ຢູ່ເຂດປ່າປ້ອງກັນພູພືງ ບ້ານດອນກາງ ນະຄອນ ຫຼວງພະບາງ, ໂດຍຈະປູກເບ້ຍໄມ້ຮັກສາແຫຼ່ງນ້ຳ ເຊັ່ນ: ໄມ້ສົ້ມຝາດ, ໄມ້ແຕ້ຂ່າ, ໄມ້ຕິ້ວ ແລະອື່ນໆ.
ປັດຈຸບັນກໍາລັງກະກຽມຄວາມພ້ອມແຕ່ລະດ້ານ ໃນການຈັດພິທີ ຄາດວ່າ ຈະຈັດພິທີຕົວຈິງໃນວັນທີ 1 ມິຖຸນາ 2026, ສ່ວນບັນດາເມືອງທີ່ມີເງື່ອນໄຂ ອາດຈະຈັດກ່ອນ ຫຼື ຫຼັງວັນທີ່ 1 ເພື່ອໃຫ້ຄົບຕາມເນື້ອທີ່ ທີ່ໄດ້ກໍານົດ 300 ກວ່າເຮັກຕ່າ. ນອກນັ້ນ, ຈະມີບັນດາບໍລິສັດ ແລະ ໂຄງການສົ່ງເສີມການປູກຕົ້ນໄມ້ຢູ່ບັນດາເມືອງ ລວມທັງປະຊາຊົນບັນດາເຜົ່າ ຈະຈັດພິທີປູກຕົ້ນໄມ້ ຢູ່ພື້ນທີ່ຂອງຕົນຈົນກວ່າຈະສິ້ນສຸດລະດູຝົນ ຕື່ມອີກ. ສ່ວນການສະເຫຼີມສະຫຼອງວັນສິ່ງແວດລ້ອມໂລກ ແລະ ວັນສິ່ງແວດລ້ອມແຫ່ງຊາດ ໃນປີນີ້ ແຂວງຫຼວງພະບາງ ໄດ້ຮັບກຽດເປັນເຈົ້າພາບຈັດຂະບວນການໃຫຍ່ໃນທົ່ວປະເທດ ເຊິ່ງຈະມີການຈັດພິທີປູກຕົ້ນໄມ້ ຢູ່ບໍລິເວນສະຖານີລົດໄຟ, ທັງຈະມີການວາງສະແດງຮູບພາບ ແລະ ຜະລິດຕະພັນທີ່ປະດິດຈາກສິ່ງເສດເຫຼືອ ໂດຍມອບໃຫ້ຄະນະກຳມະການປົກຄອງ ນະຄອນ ຫຼວງພະບາງ ເປັນເຈົ້າການຮ່ວມກັບພາກສ່ວນກ່ຽວຂ້ອງ ພ້ອມກັນຈັດຕັ້ງປະຕິບັດ ໃຫ້ໄດ້ຮັບຜົນດີ.
ຫົວໜ້າພະແນກກະສິກຳ ແລະ ສິ່ງແວດລ້ອມ ແຂວງຫຼວງພະບາງ ໃຫ້ຮູ້ຕື່ມວ່າ: ໃນໄລຍະຜ່ານມາ, ຄະນະນຳພະແນກກະສິກຳ ແລະ ສິ່ງແວດລ້ອມແຂວງ ໄດ້ຊີ້ນຳໃຫ້ທຸກພາກສ່ວນ, ພ້ອມກັນປົກປັກຮັກສາ ແລະບົວລະບັດຕົ້ນໄມ້ທີ່ປູກໄປແລ້ວ ໃຫ້ມີການຈະເລີນເຕີບໂຕ ແລະ ກວດກາຄືນ ບັນດາຕົ້ນໄມ້ທີ່ຕາຍ ແລະ ເສຍຫາຍ ເພື່ອຈັດຕັ້ງການປູກທົດແທນຄືນ, ພ້ອມນັ້ນ ທ່ານໄດ້ຮຽກຮ້ອງໃຫ້ທຸກພາກສ່ວນ ນັບທັງພາກລັດ, ພາກທຸລະກິດ-ເອກະຊົນ, ລວມທັງປະຊາຊົນບັນດາເຜົ່າ ພ້ອມກັນປະກອບສ່ວນ ແລະ ເຂົ້າຮ່ວມຂະບວນການປູກຕົ້ນໄມ້ ໂອກາດແຂວງຫຼວງພະບາງ ຈັດຂະບວນການປູກຕົ້ນໄມ້ ໃນວັນປູກຕົ້ນໄມ້ແຫ່ງຊາດ ແລະສະເຫຼີມສະຫຼອງ ວັນສິ່ງແວດລ້ອມໂລກ-ວັນສິ່ງແວດລ້ອມແຫ່ງຊາດ ໃນປີນີ້, ເພື່ອເຮັດໃຫ້ອັດຕາສ່ວນການປົກຫຸ້ມຂອງປ່າໄມ້ ບັນລຸຕາມແຜນການທີ່ລັດຖະບານ ກໍຄືອົງການປົກຄອງທ້ອງຖີ່ນວາງອອກ.
ທີ່ມາ: ໂທລະພາບແຂວງຫລວງພະບາງ
