ໃນວັນທີ 4 ມີນາ 2026 ນີ້, ທີ່ສຳນັກງານປົກຄອງແຂວງຜົ້ງສາລີ ໄດ້ມີພິທີເຊັນສັນຍາຮັບທຶນຊ່ວຍເຫຼືອລ້າ ເພື່ອກໍ່ສ້າງລະບົບນ້ຳລິນ ຢູ່ບ້ານມູຕຶນ ເມືອງບູນໃຕ້.
ໂຄງການດັ່ງກ່າວ ເປັນສ່ວນໜຶ່ງຂອງ “ໂຄງການເສີມສ້າງຄວາມໝັ້ນຄົງຂອງມະນຸດຂັ້ນພື້ນຖານ (GGP)” ຈາກລັດຖະບານຍີ່ປຸ່ນ.
ພິທີດັ່ງກ່າວໄດ້ຈັດຂຶ້ນຢ່າງເປັນທາງການ ໂດຍການເຂົ້າຮ່ວມເປັນສັກຂີພິຍານຂອງ ທ່ານ ສັນຕິ ແກ້ວຍະສານ ຮອງເລຂາພັກແຂວງ, ປະທານຄະນະກຳມະການປົກຄອງແຂວງຜົ້ງສາລີ. ຜູ້ຮ່ວມລົງນາມໃນສັນຍາປະກອບມີ:
ຝ່າຍຍີ່ປຸ່ນ: ທ່ານ ໂຄອິຊຶມິ ຊຶໂຕມຸ, ເອກອັກຄະຣາຊະທູດວິສາມັນຜູ້ມີອຳນາດເຕັມ ແຫ່ງ ຍີ່ປຸ່ນ ປະຈຳ ສປປ ລາວ.
ຝ່າຍລາວ: ທ່ານ ນາງ ແປງ ສຸກລາສີ, ຫົວໜ້າຫ້ອງການສາທາລະນະສຸກເມືອງບູນໃຕ້.
ລັດຖະບານຍີ່ປຸ່ນ ໄດ້ຕົກລົງມອບທຶນຊ່ວຍເຫຼືອລ້າໃນຄັ້ງນີ້ ເປັນມູນຄ່າທັງໝົດ 17,400 ໂດລາສະຫະລັດ ຫຼື ປະມານ 370ກວ່າລ້ານກີບ.
ການກໍ່ສ້າງລະບົບນ້ຳລິນໃນຄັ້ງນີ້ ແມ່ນແນໃສ່ຍົກລະດັບຄຸນນະພາບຊີວິດ ແລະ ສຸຂະອະນາໄມຂອງປະຊາຊົນໃນເຂດຫ່າງໄກສອກຫຼີກ ໃຫ້ສາມາດເຂົ້າເຖິງແຫຼ່ງນ້ຳທີ່ສະອາດ ແລະ ພຽງພໍຕໍ່ການຊົມໃຊ້ໃນຊີວິດປະຈຳວັນ.
ທີ່ມາ: ຂ່າວສານແຂວງຜົ້ງສາລີ
