ໃນວາລະດຳເນີນກອງປະຊຸມສະໄໝສາມັນ ເທື່ອທີ 10 ຂອງສະພາປະຊາຊົນ ນະຄອນ ຫລວງວຽງຈັນ ຊຸດທີ IV ໃນວັນທີ 16 ທັນວາ 2025 ພາຍໃຕ້ການເປັນປະທານຂອງ ທ່ານ ອານຸພາບ ຕຸນາລົມ ປະທານສະພາປະຊາຊົນ ນະຄອນຫລວງວຽງຈັນ, ທ່ານ ບຸນຍະວັດ ນິຣະໄຊ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ(ນວ) ໄດ້ຊີ້ແຈງຕໍຄໍາຊັກຖາມຂອງສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນວ ແລະ ສະມາຊິກ ສະພາປະຊາຊົນ ນວ ກ່ຽວກັບບັນຫາການຄວບຄຸມນໍ້າໜັກລົດ, ວິທີການແກ້ໄຂບັນຫານໍ້າຖ້ວມຂັງ ແລະ ບັນຫາອື່ນໆ ທີ່ຕິດພັນກັບຂະແໜງ ຍທຂ.
ຕໍ່ບັນຫາດັ່ງກ່າວ, ທ່ານ ບຸນຍະວັດ ນິຣະໄຊ ໄດ້ຊີ້ແຈ້ງວ່າ: ການຈັດຕັ້ງປະຕິບັດໃນໄລຍະຜ່ານມາ, ພະແນກ ຍທຂ ນວ ໄດ້ກວດກາລົດບັນທຸກໜັກ ທີ່ເຂົ້າມາຜ່ານສະຖານີຕິດຊັ່ງນໍ້າໜັກ ແລະ ຈຸດກວດກາສະເພາະກິດ ລົດບັນທຸກທີ່ເຂົ້າມາຕິດຊັ່ງ ຖ້າຫາກພົບເຫັນນໍ້າໜັກເກີນ ກໍໄດ້ປັບໃໝ ແລະ ຄ່ຽນຖ່າຍສິນຄ້າລົງຕາມລະບຽບການ; ການກວດກາການຂົນສົ່ງວັດສະດຸດິນດຳ, ດິນແດງ ແລະ ແຮ່ຊາຍ ເຫັນວ່າຍັງມີນໍ້າໜັກເກີນ ຍ້ອນຜູ້ປະກອບການມີການລົບຫລີກ ບໍ່ໄປຜ່ານສະຖານີຕິດຊັ່ງນໍ້າໜັກ ບວກກັບການຂະຫຍາຍຕາໜ່າງເສັ້ນທາງຫລາຍເສັ້ນ ເຮັດໃຫ້ຜູ້ປະກອບການຂົນສົ່ງ ສາມາດອອກໄດ້ຫລາຍທິດທາງ; ສະຖານີຕິດຊັ່ງນໍ້າໜັກທີ່ມີຢູ່ແລ້ວ ເປັນຕົ້ນ ສະຖານີຕິດຊັ່ງນໍ້າໜັກບ້ານໂຄກສີວິໄລເສັ້ນທາງ 13 ໃຕ້ ກິໂລແມັດທີ 21, ສະຖານີຕິດຊັ່ງນໍ້າໜັກ ບ້ານແຈ້ງສະຫວ່າງ ເສັ້ນທາງ 13 ເໜືອ ກິໂລແມັດທີ 28, ສະຖານີຕິດຊັ່ງນໍ້າໜັກ ບ້ານດົງໂພສີ ເສັ້ນທາງທ່າເດື່ອ ກິໂລແມັດທີ 19 ເຫັນວ່າບໍ່ມີຄວາມເໝາະສົມ ເນື່ອງຈາກວ່າຜູ້ປະກອບການນໍາໃຊ້ເສັ້ນທາງຫລາຍທິດທາງລົບຫລີກ. ນອກຈາກນີ້, ອຸປະກອນເຄື່ອງມືຮັບໃຊ້ ແລະ ບຸກຄະລາກອນ ຍັງມີຂໍ້ຈຳກັດ.
ທີ່ມາ: ຂ່າວສານປະເທດລາວ
