ວັນທີ 12 ພະຈິກ 2026, ສູນກາງຊາວໜຸ່ມປະຊາຊົນປະຕິວັດລາວ ຮ່ວມກັບກະຊວງສາທາລະນະສຸກ ຈັດພິທີເປີດຂະບວນການກວດສຸຂະພາບປະຈຳປີ 2026 ພາຍໃຕ້ຄຳຂວັນ “ຊາວໜຸ່ມຍຸກໃໝ່ ໃສ່ໃຈສຸຂະພາບ ກຽມພ້ອມຕະລຸມບອນ” ທີ່ສູນກາງຊາວໜຸ່ມປະຊາຊົນປະຕິວັດລາວ, ໂດຍມີ ທ່ານ ທອງລີ ສີສຸລິດ, ກຳມະການສູນກາງພັກ, ເລຂາຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ ແລະ ທ່ານ ດຣ. ໄພວັນ ແກ້ວປະເສີດ, ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະນຳ ແລະ ພະນັກງານ-ລັດຖະກອນຈາກທັງສອງພາກສ່ວນເຂົ້າຮ່ວມ.
ໃນໂອກາດດັ່ງກ່າວ ທ່ານ ທອງລີ ສີສຸລິດ ໄດ້ຍົກໃຫ້ເຫັນວ່າ ການກວດສຸຂະພາບບໍ່ຄວນລໍຖ້າໃຫ້ມີອາການເຈັບປ່ວຍກ່ອນຈຶ່ງໄປພົບແພດ, ແຕ່ຄວນຮູ້ຈັກກວດກາ ແລະ ເບິ່ງແຍງຕົນເອງຢ່າງສະໝ່ຳສະເໝີ. ເພາະການຮູ້ທັນສະພາບສຸຂະພາບຂອງຕົນ ແມ່ນການປ້ອງກັນບັນຫາທີ່ອາດເກີດຂຶ້ນໃນອະນາຄົດ. ພ້ອມນີ້ ທ່ານໄດ້ຊີ້ນຳໃຫ້ພະນັກງານທຸກຄົນນຳໃຊ້ຜົນການກວດ ແລະ ຄຳແນະນຳຈາກທີມແພດໝໍໄປປັບປຸງການດຳລົງຊີວິດ, ພ້ອມທັງສ້າງວັດທະນະທໍາການໃສ່ໃຈສຸຂະພາບ ແລະ ຊ່ວຍກັນເບິ່ງແຍງສຸຂະພາບພາຍໃນອົງກອນ.
ພ້ອມດຽວກັນ ທ່ານ ດຣ. ໄພວັນ ແກ້ວປະເສີດ ເນັ້ນວ່າ ການກວດສຸຂະພາບປະຈຳປີເປັນມາດຕະການສຳຄັນໃນການປ້ອງກັນພະຍາດ ແລະ ຄົ້ນຫາຄວາມຜິດປົກກະຕິແຕ່ໄລຍະຕົ້ນ ເພາະພະຍາດຫຼາຍຊະນິດອາດບໍ່ສະແດງອາການໃນໄລຍະທຳອິດ. ພ້ອມທັງເຊີນຊວນໃຫ້ພະນັກງານກວດສຸຂະພາບຢ່າງສະໝ່ຳສະເໝີ ຄວບຄູ່ກັບການປັບປຸງວິຖີຊີວິດໃຫ້ດີຕໍ່ສຸຂະພາບ.
ຂະບວນການກວດສຸຂະພາບໃນຄັ້ງນີ້ທັງໝົດ 17 ລາຍການ ຄອບຄຸມການກວດເລືອດ, ນ້ຳຕານ, ໄຂມັນ, ການເຮັດວຽກຂອງໄຕ ແລະ ຕັບ, ຫົວໃຈ, ປອດ, ສາຍຕາ, ຫູ-ດັງ-ຄໍ, ເອັກສະເລ ປອດ ແລະ ທ້ອງ, ພ້ອມທັງສັກວັກຊິນປ້ອງກັນໄຂ້ຫວັດໃຫຍ່ ແລະ ໃຫ້ຄຳແນະນຳສຸຂະພາບເປັນລາຍບຸກຄົນ. ນອກນີ້ ຍັງມີການກວດສາຍຕາ ແລະ ສະໜັບສະໜູນແວ່ນຕາ ໂດຍຮ້ານໃຕ້ຟ້າການແວ່ນ.
ກິດຈະກຳດັ່ງກ່າວເປັນການຜັນຂະຫຍາຍ MOU ລະຫວ່າງກະຊວງສາທາລະນະສຸກ ແລະ ສຊປລ ໄລຍະປີ 2026-2030 ເພື່ອຮ່ວມກັນສົ່ງເສີມສຸຂະພາບໄວໜຸ່ມ-ເຍົາວະຊົນ, ປ້ອງກັນພະຍາດ ແລະ ຂະຫຍາຍການເຂົ້າເຖິງບໍລິການສຸຂະພາບ.
ການກວດສຸຂະພາບຄັ້ງນີ້ ຈຶ່ງບໍ່ພຽງແຕ່ເປັນການກວດຫາພະຍາດ ແຕ່ຍັງເປັນການລົງທຶນໃຫ້ແກ່ຄົນ ແລະ ສ້າງພະນັກງານທີ່ມີສຸຂະພາບດີ ພ້ອມປະຕິບັດພາລະໜ້າທີ່. ສຸຂະພາບດີ ເລີ່ມຈາກການໃສ່ໃຈ ແລະ ປ້ອງກັນແຕ່ມື້ນີ້.


