ວຽງຈັນ, 9 ພະຈິກ 2026 – ການຫາປາ ແລະ ສັດນ້ຳອື່ນໆ ດ້ວຍລະເບີດ, ຢາເບື່ອ, ທາດເຄມີ ແລະ ໄຟຟ້າຊັອດ ຖືເປັນການກະທຳຜິດທາງອາຍາ ຕາມປະມວນກົດໝາຍອາຍາ ຂອງ ສປປ ລາວ. ຜູ້ກະທຳຜິດອາດຖືກຕັດອິດສະລະພາບສູງສຸດເຖິງ 5 ປີ ແລະ ຖືກປັບໃໝສອງເທົ່າຂອງມູນຄ່າຄວາມເສຍຫາຍ.
ການຫາປາແບບດັບສູນດັ່ງກ່າວ ບໍ່ພຽງແຕ່ທຳລາຍປາຂະໜາດໃຫຍ່ ແຕ່ຍັງເຮັດໃຫ້ລູກປາ, ໄຂ່ປາ ແລະ ສັດນ້ຳນ້ອຍໆ ຕາຍໝົດ, ພ້ອມທັງທຳລາຍແຫຼ່ງອາໄສ ແລະ ແຫຼ່ງວາງໄຂ່ຂອງສັດນ້ຳ. ຜົນທີ່ຕາມມາແມ່ນປະລິມານປາໃນແມ່ນ້ຳ ແລະ ໜອງບຶງ ຫຼຸດລົງຢ່າງຕໍ່ເນື່ອງ, ກະທົບໂດຍກົງຕໍ່ແຫຼ່ງອາຫານ ແລະ ລາຍໄດ້ຂອງປະຊາຊົນ ໂດຍສະເພາະຢູ່ເຂດຊົນນະບົດ.
ອີງຕາມ ມາດຕາ 332 ວ່າດ້ວຍການຫາປາ ຫຼື ສັດນ້ຳອື່ນ ໂດຍບໍ່ຖືກຕ້ອງຕາມກົດໝາຍ, ບຸກຄົນໃດຫາກຫາປາ ຫຼື ສັດນ້ຳອື່ນ ໂດຍບໍ່ຖືກຕ້ອງຕາມລະບຽບການ ເຊັ່ນ: ໃຊ້ລະເບີດ, ຢາເບື່ອ, ທາດເຄມີ ຫຼື ເຄື່ອງມືຕ້ອງຫ້າມອື່ນໆ ຈະຖືກລົງໂທດຕາມລະດັບຄວາມຮ້າຍແຮງ ດັ່ງນີ້:
• ກໍລະນີທົ່ວໄປ: ຕັດອິດສະລະພາບແຕ່ 3 ເດືອນ ຫາ 1 ປີ ແລະ ປັບໃໝແຕ່ 3,000,000 ກີບ ຫາ 10,000,000 ກີບ.
• ກໍລະນີສ້າງຄວາມເສຍຫາຍແຕ່ 1,000,000 ກີບ ຫາ 15,000,000 ກີບ: ຕັດອິດສະລະພາບແຕ່ 3 ເດືອນ ຫາ 2 ປີ ແລະ ປັບໃໝສອງເທົ່າຂອງມູນຄ່າຄວາມເສຍຫາຍ.
• ກໍລະນີກະທຳຜິດເປັນອາຈິນ, ມີການຈັດຕັ້ງເປັນກຸ່ມ ຫຼື ສ້າງຄວາມເສຍຫາຍຫຼວງຫຼາຍ: ຕັດອິດສະລະພາບແຕ່ 2 ປີ ຫາ 5 ປີ ແລະ ປັບໃໝສອງເທົ່າຂອງມູນຄ່າຄວາມເສຍຫາຍ.
ນອກຈາກນີ້, ມາດຕາ 336 ວ່າດ້ວຍການທຳລາຍຊັບພະຍາກອນສັດນ້ຳ ຍັງກຳນົດວ່າ ຜູ້ທີ່ໃຊ້ທາດເບື່ອ, ລະເບີດ, ທາດເຄມີ, ກະແສໄຟຟ້າ ຫຼື ເຄື່ອງມືຕ້ອງຫ້າມ ຈົນສ້າງຄວາມເສຍຫາຍຫຼວງຫຼາຍ ຈະຖືກຕັດອິດສະລະພາບແຕ່ 6 ເດືອນ ຫາ 3 ປີ ຫຼື ສຶກສາອົບຮົມໂດຍບໍ່ຕັດອິດສະລະພາບ ແລະ ປັບໃໝແຕ່ 10,000,000 ກີບ ຫາ 50,000,000 ກີບ.
ທັງນີ້, ຂໍຮຽກຮ້ອງໃຫ້ປະຊາຊົນທຸກຄົນ ຫາປາດ້ວຍເຄື່ອງມືທີ່ຖືກຕ້ອງຕາມລະບຽບການ, ເຄົາລົບລະດູຫ້າມຫາປາ ແລະ ເຂດອະນຸລັກສັດນ້ຳ. ຖ້າພົບເຫັນການຫາປາແບບດັບສູນ ໃຫ້ແຈ້ງຕໍ່ອຳນາດການປົກຄອງບ້ານ, ເຈົ້າໜ້າທີ່ກະສິກຳ ແລະ ປ່າໄມ້ ຫຼື ເຈົ້າໜ້າທີ່ຕຳຫຼວດທີ່ໃກ້ທີ່ສຸດ ເພື່ອຮ່ວມກັນປົກປັກຮັກສາຊັບພະຍາກອນສັດນ້ຳ ໃຫ້ຄົງຢູ່ເຖິງລຸ້ນລູກຫຼານ.
ແຫຼ່ງອ້າງອີງ: ປະມວນກົດໝາຍອາຍາ ສະບັບເລກທີ 26/ສພຊ, ລົງວັນທີ 17 ພຶດສະພາ 2017, ມາດຕາ 332 ແລະ 336.
