ໃນວັນທີ 17 ກໍລະກົດ 2026 ທີ່ຜ່ານມາ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດ ໄດ້ນໍາພາຄະນະຜູ້ແທນ ສປປ ລາວ ເຂົ້າຮ່ວມພິທີເປີດ ກອງປະຊຸມປັນຍາປະດິດໂລກ (World Artificial Intelligence Conference – WAIC) ຢ່າງເປັນທາງການ ທີ່ ນະຄອນຊຽງໄຮ, ສປ ຈີນ. 
ກອງປະຊຸມຄັ້ງນີ້ຖືເປັນກອງປະຊຸມປະຖົມມະເລີກ ພາຍຫຼັງການລົງນາມຂໍ້ຕົກລົງສ້າງຕັ້ງ ອົງການປັນຍາປະດິດໂລກ (WAICO) ໃນວັນທີ 16 ກໍລະກົດ 2026 ທີ່ຜ່ານມາ. ໂດຍມີຜູ້ນໍາລະດັບປະມຸກລັດ, ຫົວໜ້າລັດຖະບານ, ເຈົ້າໜ້າທີ່ຂັ້ນສູງຈາກກວ່າ 60 ປະເທດ ພ້ອມດ້ວຍຜູ້ຕາງໜ້າອົງການຈັດຕັ້ງສາກົນ, ຊ່ຽວຊານ ແລະ ຜູ້ນໍາພາກທຸລະກິດຈາກທົ່ວໂລກເຂົ້າຮ່ວມຫຼາຍກວ່າ 1,400 ທ່ານ.
ໃນພິທີເປີດ, ພະນະທ່ານ ສີ ຈິ້ນຜິງ, ເລຂາທິການໃຫຍ່, ປະທານປະເທດແຫ່ງ ສປ ຈີນ ໄດ້ກ່າວປາໄສເນັ້ນໜັກວິໄສທັດການພັດທະນາ ແລະ ຄຸ້ມຄອງ AI ພາຍໃຕ້ 4 ຫຼັກການນໍາພາ:
ຄວາມເປີດເຜີຍ ແລະ ການຮ່ວມມື: ເນັ້ນຜົນປະໂຫຍດຮ່ວມກັນ.
ຄວາມປອດໄພ: AI ຕ້ອງປອດໄພ ແລະ ຄວບຄຸມໄດ້.
ເຄົາລົບຄວາມຫຼາກຫຼາຍ: ສົ່ງເສີມການເປີດກວ້າງ, ບໍ່ທຳລາຍເອກະລັກວັດທະນະທຳຂອງແຕ່ລະຊາດ.
ສາມັກຄີປັບປຸງການປົກຄອງ: ນໍາໃຊ້ບົດບາດຂອງ ສປຊ ເພື່ອສ້າງລະບຽບການປົກຄອງ AI ລະດັບໂລກ.
ພ້ອມນີ້, ປະທານປະເທດ ສປ ຈີນ ຍັງໄດ້ປະກາດຂໍ້ລິເລີ່ມສໍາຄັນ ໄດ້ແກ່:
5,000 ທຶນ: ສະໜອງທຶນຝຶກອົບຮົມວິຊາສະເພາະດ້ານ AI ໃຫ້ປະເທດກຳລັງພັດທະນາ ພາຍໃນ 5 ປີ.
ສູນຮ່ວມມື AI ສາກົນ: ສ້າງສູນຮ່ວມມືໃຫ້ກັບ ອາຊຽນ, ສະຫະພາບອາຟຣິກາ, ບຣິກສ (BRICS) ແລະ ກຸ່ມອື່ນໆ.
ລະບົບ “MAZU”: ຂະຫຍາຍການນຳໃຊ້ລະບົບເຕືອນໄພອັດສະລິຍະດ້ານດິນຟ້າອາກາດ ໃນ 30 ປະເທດຜູ້ຮ່ວມກໍ່ຕັ້ງ WAICO.
ດ້ານ ທ່ານ ອັນໂຕນີໂອ ກູເຕີເຣັສ, ເລຂາທິການໃຫຍ່ອົງການ ສປຊ ໄດ້ເນັ້ນໜັກວ່າ ປະຊາຄົມໂລກຕ້ອງຮ່ວມກັນອອກແບບການຄຸ້ມຄອງ AI ໃຫ້ເປັນນະວັດຕະກໍາທີ່:
“ສ້າງໂດຍມວນມະນຸດ, ໂດຍມີຄວາມເປັນມະນຸດ ແລະ ເພື່ອມວນມະນຸດຊາດທັງໝົດ” (by humanity, with humanity, and for all humanity).
ໃນໂອກາດດັ່ງກ່າວ, ຄະນະຜູ້ແທນ ສປປ ລາວ ໄດ້:
ຢ້ຽມຊົມງານວາງສະແດງ AI: ເບິ່ງຕົ້ນແບບການນຳໃຊ້ AI ເຂົ້າໃນຂະແໜງການແພດ, ອຸດສາຫະກຳ, ຫຸ່ນຍົນຄົວເຮືອນ, ການສຶກສາ, ການຂົນສົ່ງ ແລະ ການພັດທະນາເສດຖະກິດ-ສັງຄົມ.
ເຈລະຈາຄວາມຮ່ວມມື: ສົນທະນາແບບບໍ່ເປັນທາງການກັບຜູ້ຕາງໜ້າລັດຖະບານ, ອົງການສາກົນ ແລະ ພາກເອກະຊົນ ເພື່ອຊອກຫາໂອກາດຖ່າຍທອດເຕັກໂນໂລຊີ, ພັດທະນາຊັບພະຍາກອນມະນຸດ ແລະ ນະວັດຕະກຳດິຈິຕອນ ມາປັບໃຊ້ໃນ ສປປ ລາວ.
ກອງປະຊຸມປັນຍາປະດິດໂລກ (WAIC) ແລະ ກອງປະຊຸມລະດັບສູງວ່າດ້ວຍການຄຸ້ມຄອງ AI ລະດັບໂລກ ແມ່ນດຳເນີນມາຮອດວັນທີ 20 ກໍລະກົດ 2026 ນີ້.
ທີ່ມາ: ກະຊວງການຕ່າງປະເທດ
Lao Youth Radio FM90MHz
