ໃນວັນທີ 13 ມິຖຸນາ 2026, ທີ່ງານວາງສະແດງເອັກໂປ ຈີນ–ອາຊີໃຕ້ ຄັ້ງທີ 10, ໄດ້ມີການຈັດພິທີລົງນາມໂຄງການດ້ານພະລັງງານ ລວມມູນຄ່າກວ່າ 25,700 ລ້ານຢວນ.
ໃນນັ້ນ, ໜຶ່ງໃນໂຄງການສຳຄັນແມ່ນ ໂຄງການໄຟຟ້າແສງອາທິດ ຂະໜາດ 100 ເມກາວັດ ທີ່ເມືອງຕົ້ນເຜິ້ງ ແຂວງບໍ່ແກ້ວ ສປປ ລາວ, ມູນຄ່າສັນຍາ 400 ລ້ານຢວນ. ໂຄງການດັ່ງກ່າວໄດ້ລົງນາມລະຫວ່າງ ທ່ານນາງ ສາຍສຸດາ ໄຊຍະສອນ, ປະທານບໍລິສັດ Northern Energy Sole Co., Ltd. ແລະ ທ່ານ Li Fei, ຮອງຜູ້ອຳນວຍການໃຫຍ່ ບໍລິສັດ Yunnan Energy Group Co., Ltd.
ພິທີລົງນາມຄັ້ງນີ້ ມີຜູ້ນຳຝ່າຍຈີນເຂົ້າຮ່ວມ ແລະ ເປັນພະຍານ ປະກອບມີ ທ່ານ Liu Yong, ຮອງຜູ້ວ່າການລັດຖະບານປະຊາຊົນແຂວງຢຸນນານ; ທ່ານ Chen Jie, ຫົວໜ້າກົມພະລັງງານແຂວງຢຸນນານ; ແລະ ທ່ານ Tian Hongwei, ຮອງຫົວໜ້າກົມພະລັງງານແຂວງຢຸນນານ.
ສ່ວນພະຍານໃນການລົງນາມປະກອບມີ ທ່ານນາງ ແສງເດືອນ ໄຊຍະສອນ, ຮອງປະທານຜູ້ປະຈຳການ ຄະນະກຳມະການຮ່ວມມືລາວ–ຈີນ; ແລະ ທ່ານ Hu Jun, ເລຂາພັກ ແລະ ປະທານບໍລິສັດ Yunnan Energy Group Co., Ltd.
ໂຄງການດັ່ງກ່າວນັບເປັນຜົນສຳເລັດສຳຄັນຂອງການຮ່ວມມືດ້ານພະລັງງານ ລະຫວ່າງ ສປ ຈີນ ແລະ ສປປ ລາວ ພາຍໃຕ້ຂອບການຮ່ວມມື “ໜຶ່ງແຖບ ໜຶ່ງເສັ້ນທາງ”. ໂຄງການນີ້ຄາດວ່າຈະຊ່ວຍເພີ່ມຂີດຄວາມສາມາດດ້ານການຜະລິດໄຟຟ້າສະອາດຂອງລາວ, ສົ່ງເສີມການປັບປ່ຽນໂຄງສ້າງພະລັງງານໃຫ້ເປັນມິດຕໍ່ສິ່ງແວດລ້ອມ, ຫຼຸດຜ່ອນການປ່ອຍຄາບອນ ແລະ ຊ່ວຍເສີມສ້າງການເຊື່ອມໂຍງດ້ານພະລັງງານລະຫວ່າງ ລາວ–ຈີນ ໃຫ້ແນ່ນແຟ້ນຍິ່ງຂຶ້ນ.
