ອົງການອາຫານ ແລະ ການກະເສດ ແຫ່ງສະຫະປະຊາຊາດ (FAO) ໄດ້ເປີດເຜີຍລາຍງານສະຖິຕິການບໍລິໂພກຊີ້ນໝູຕໍ່ຫົວຄົນຕໍ່ປີ ຂອງບັນດາປະເທດໃນອາຊຽນ (ຂໍ້ມູນປີ 2020) ເຊິ່ງຕົວເລກດັ່ງກ່າວໄດ້ສະທ້ອນໃຫ້ເຫັນເຖິງຄວາມນິຍົມ, ວັດທະນະທຳການກິນ ລວມເຖິງປັດໄຈດ້ານສາສະໜາທີ່ແຕກຕ່າງກັນໃນແຕ່ລະທ້ອງຖິ່ນຢ່າງຊັດເຈນ.
ຈາກການຈັດອັນດັບປະເທດທີ່ມີອັດຕາການບໍລິໂພກຊີ້ນໝູ ຈາກສູງສຸດໄປຫາຕ່ຳສຸດ ມີລາຍລະອຽດດັ່ງນີ້:
ກຸ່ມທີ່ມີອັດຕາການບໍລິໂພກສູງສຸດ (ອັນດັບ 1 – 3):
ອັນດັບ 1 ຫວຽດນາມ: ເປັນປະເທດທີ່ຄອງແຊ້ມການບໍລິໂພກຊີ້ນໝູສູງທີ່ສຸດໃນອາຊຽນ ໂດຍມີຕົວເລກສູງເຖິງ 38.2 ກິໂລກຣາມ ຕໍ່ຄົນ/ປີ ເຊິ່ງຖືວ່າເປັນອາຫານຫຼັກໃນຊີວິດປະຈຳວັນຂອງປະຊາຊົນ.
ອັນດັບ 2 ສິງກະໂປ: ດ້ວຍຕົວເລກ 22 ກິໂລກຣາມ ຕໍ່ຄົນ/ປີ ເນື່ອງຈາກເປັນປະເທດທີ່ມີຄວາມຫຼາກຫຼາຍທາງວັດທະນະທຳ ແລະ ມີຊາວສິງກະໂປເຊື້ອສາຍຈີນເປັນປະຊາກອນສ່ວນໃຫຍ່.
ອັນດັບ 3 ມຽນມາ: ໂດຍມີອັດຕາການບໍລິໂພກຢູ່ທີ່ 20.1 ກິໂລກຣາມ ຕໍ່ຄົນ/ປີ.
ກຸ່ມທີ່ມີອັດຕາການບໍລິໂພກປານກາງ (ອັນດັບ 4 – 7):
ອັນດັບ 4 ຟີລິບປິນ: ມີຕົວເລກການບໍລິໂພກຢູ່ທີ່ 14.5 ກິໂລກຣາມ ຕໍ່ຄົນ/ປີ ເຊິ່ງຊີ້ນໝູຖືເປັນສ່ວນປະກອບສຳຄັນໃນເມນູອາຫານພື້ນເມືອງຍອດນິຍົມຫຼາກຫຼາຍຊະນິດ.
ອັນດັບ 5 ສປປ ລາວ: ປະເທດຂອງພວກເຮົາຖືກຈັດຢູ່ໃນອັນດັບທີ 5 ຂອງພາກພື້ນ ໂດຍມີອັດຕາການບໍລິໂພກສະເລ່ຍຢູ່ທີ່ 13.5 ກິໂລກຣາມ ຕໍ່ຄົນ/ປີ ເຊິ່ງຖືວ່າເປັນແຫຼ່ງໂປຣຕີນທີ່ໄດ້ຮັບຄວາມນິຍົມສູງໃນຄົວເຮືອນ.
ອັນດັບ 6 ໄທ: ມີຕົວເລກການບໍລິໂພກໃກ້ຄຽງກັບ ສປປ ລາວ ໂດຍຢູ່ທີ່ 13.1 ກິໂລກຣາມ ຕໍ່ຄົນ/ປີ.
ອັນດັບ 7 ຕີມໍ-ເລສເຕ: ມີອັດຕາການບໍລິໂພກຢູ່ທີ່ 11.5 ກິໂລກຣາມ ຕໍ່ຄົນ/ປີ.
ກຸ່ມທີ່ມີອັດຕາການບໍລິໂພກຕ່ຳສຸດ (ອັນດັບ 8 – 10):
ອັນດັບ 8 ມາເລເຊຍ: ມີຕົວເລກການບໍລິໂພກຢູ່ທີ່ 7.4 ກິໂລກຣາມ ຕໍ່ຄົນ/ປີ.
ອັນດັບ 9 ກຳປູເຈຍ: ມີອັດຕາການບໍລິໂພກຢູ່ທີ່ 5.9 ກິໂລກຣາມ ຕໍ່ຄົນ/ປີ.
ອັນດັບ 10 ອິນໂດເນເຊຍ: ເປັນປະເທດທີ່ມີອັດຕາການບໍລິໂພກຊີ້ນໝູຕ່ຳທີ່ສຸດໃນພາກພື້ນ ໂດຍມີຕົວເລກພຽງແຕ່ 0.9 ກິໂລກຣາມ ຕໍ່ຄົນ/ປີ ເທົ່ານັ້ນ.
ສາເຫດຫຼັກທີ່ເຮັດໃຫ້ ອິນໂດເນເຊຍ ແລະ ມາເລເຊຍ ຕົກໄປຢູ່ທ້າຍຕາຕະລາງ ໂດຍມີຕົວເລກການບໍລິໂພກທີ່ຂ້ອນຂ້າງຕ່ຳນັ້ນ ແມ່ນເນື່ອງມາຈາກຂໍ້ຫ້າມທາງດ້ານສາສະໜາ (ອາຫານຮາລານ) ເພາະທັງສອງປະເທດນີ້ມີປະຊາກອນສ່ວນໃຫຍ່ເປັນຊາວມຸດສະລິມ ເຊິ່ງບໍ່ບໍລິໂພກຊີ້ນໝູ. ໃນຂະນະທີ່ປະເທດອື່ນໆໃນອາຊຽນ ທີ່ມີຕົວເລກສູງ ແມ່ນໄດ້ຮັບອິດທິພົນມາຈາກວັດທະນະທຳການກິນຂອງຊາວເອເຊຍຕາເວັນອອກ ແລະ ຄວາມນິຍົມໃນການປະກອບອາຫານທ້ອງຖິ່ນນັ້ນເອງ.
ທີ່ມາ: Seasia Stats
Lao Youth Radio FM90MHz
