ກົມອາຫານ ແລະ ຢາ, ກະຊວງສາທາລະນະສຸກ ອອກແຈ້ງການເຕືອນຜູ້ປະກອບການ ແລະ ປະຊາຊົນ ເພີ່ມຄວາມລະມັດລະວັງ ພາຍຫຼັງພົບເຫັນການຈຳໜ່າຍ ແລະ ໂຄສະນາຜະລິດຕະພັນເຄື່ອງສຳອາງຮຽນແບບ ຕາມທ້ອງຕະຫຼາດ ແລະ ສື່ສັງຄົມອອນລາຍ ເຊິ່ງບໍ່ໄດ້ຮັບການຈົດແຈ້ງ ແລະ ອາດເປັນອັນຕະລາຍຕໍ່ສຸຂະພາບ.
ລາຍຊື່ຜະລິດຕະພັນທີ່ແຈ້ງເຕືອນ:
1. Vaseilina
2. Care Man
3. Lvx
4. Clsorup
5. Leimiya & Shampoo
ພຶດຕິກຳ ແລະ ຈຸດສັງເກດ:
• ຮຽນແບບແບຣນດັງ: ມີພາຊະນະບັນຈຸ, ສະຫຼາກ, ສີສັນ ແລະ ຊື່ຄ້າຍຄື ຫຼື ຮຽນແບບຜະລິດຕະພັນທີ່ໄດ້ຈົດແຈ້ງຖືກຕ້ອງ.
• ໂຄສະນາຈູງໃຈ: ມັກຈັດໂປຣໂມຊັນລາຄາຕໍ່າຜິດປົກກະຕິ, ຫຼຸດ, ແລກ, ແຈກ ຫຼື ແຖມ.
• ບໍ່ມີການຮັບຮອງ: ຜ່ານການກວດສອບພົບວ່າ ບໍ່ໄດ້ຈົດແຈ້ງກັບກົມອາຫານ ແລະ ຢາ, ບໍ່ສາມາດຮັບຮອງແຫຼ່ງທີ່ມາ, ຄຸນນະພາບ ແລະ ຄວາມປອດໄພໄດ້.
ມາດຕະການ ແລະ ຂໍ້ຫ້າມ:
• ຫ້າມຜູ້ປະກອບການ: ນຳເຂົ້າ, ຈຳໜ່າຍ, ໂຄສະນາ ຫຼື ກະຈາຍຜະລິດຕະພັນດັ່ງກ່າວໂດຍເດັດຂາດ.
• ແນະນຳປະຊາຊົນ: ງົດຊື້ ແລະ ງົດນຳໃຊ້ໂດຍດ່ວນ.
• ການແຈ້ງເບາະແສ: ຖ້າພົບເຫັນການຈຳໜ່າຍ ຫຼື ໂຄສະນາ ໃຫ້ແຈ້ງຕໍ່ກົມອາຫານ ແລະ ຢາ ຫຼື ພະແນກອາຫານ ແລະ ຢາ ແຂວງ/ນະຄອນຫຼວງ ເພື່ອກວດສອບ ແລະ ດຳເນີນຄະດີຕາມລະບຽບກົດໝາຍ.
ຂໍ້ແນະນຳສຳລັບຜູ້ຊົມໃຊ້ກ່ອນຊື້:
• ອ່ານສະຫຼາກຢ່າງລະອຽດກ່ອນຊື້ ແລະ ກ່ອນນຳໃຊ້ທຸກຄັ້ງ.
• ເລືອກຊື້ຈາກແຫຼ່ງຈຳໜ່າຍທີ່ໜ້າເຊື່ອຖື.
• ຕ້ອງມີສະຫຼາກ ພາສາລາວ, ລະບຸຂໍ້ມູນຜູ້ຜະລິດ, ຜູ້ນຳເຂົ້າ ຫຼື ຜູ້ຮັບຜິດຊອບຢ່າງຊັດເຈນ ແລະ ມີເລກທີຈົດແຈ້ງ ຕາມລະບຽບການ.
ແຈ້ງມາເພື່ອໃຫ້ຜູ້ປະກອບການ ແລະ ປະຊາຊົນທົ່ວປະເທດຮັບຊາບ ແລະ ຮ່ວມມືປະຕິບັດຢ່າງເຂັ້ມງວດ ເພື່ອຄວາມປອດໄພ ແລະ ປົກປ້ອງສຸຂະພາບຂອງທຸກຄົນ.
ຂໍ້ມູນ: ກົມອາຫານ ແລະ ຢາ, ກະຊວງສາທາລະນະສຸກ
