ເມືອງໂຂງ, ແຂວງຈຳປາສັກ — ຈາກສະພາບຝົນຕົກຕິດຕໍ່ກັນຫຼາຍວັນ ເຮັດໃຫ້ລະດັບນ້ຳຂອງເພີ່ມສູງຂຶ້ນຢ່າງໄວວາ ແລະ ກະແສນ້ຳແຮງໄດ້ເຂົ້າກັດເຊາະແຄມຝັ່ງ ຈົນເກີດການເຊາະເຈື່ອນໃນ 2 ບ້ານ ຄື: ບ້ານຫ້ວຍ (ຄຸ້ມຫາງໂຂງ) ແລະ ບ້ານດອນສົມຕາເວັນອອກ.
ໃນຕອນເຊົ້າວັນທີ 10 ສິງຫາ 2026, ທ່ານ ໜູແສງ ຜຸຍບັນດິດ ຮອງປະທານຄະນະກຳມະການປົກຄອງເມືອງໂຂງ ແລະ ເປັນປະທານຄະນະກຳມະການຄຸ້ມຄອງໄພພິບັດຂັ້ນເມືອງ ພ້ອມດ້ວຍຄະນະ ໄດ້ລົງພື້ນທີ່ກວດກາ ແລະ ຕິດຕາມສະພາບຄວາມເສຍຫາຍຕົວຈິງໃນທັງ 2 ບ້ານ.
ບ້ານຫ້ວຍ (ຄຸ້ມຫາງໂຂງ) ມີແຄມຝັ່ງຖືກເຊາະເຈື່ອນ 4 ຈຸດ ໂດຍແຕ່ລະຈຸດມີຄວາມຍາວປະມານ 18 ແມັດ ແລະ ເຊາະເລິກເຂົ້າໄປໃນຝັ່ງປະມານ 5 ແມັດ.
ບ້ານດອນສົມຕາເວັນອອກ ພົບການເຊາະເຈື່ອນແຄມຝັ່ງ ເລີ່ມຈາກບໍລິເວນດ້ານເໜືອຂອງວັດ ຕໍ່ເນື່ອງຜ່ານໜ້າວັດ ແລະ ລຽບຕາມແຄມທົ່ງນາ ລວມຄວາມຍາວປະມານ 800 ແມັດ ແລະ ເຊາະເລິກເຂົ້າຝັ່ງປະມານ 5 ແມັດ.
ທ່ານ ໜູແສງ ຜຸຍບັນດິດ ໄດ້ຮຽກຮ້ອງໃຫ້ອຳນາດການປົກຄອງບ້ານ ແລະ ປະຊາຊົນທັງ 2 ບ້ານ ຮ່ວມມືກັນເລັ່ງແກ້ໄຂສະພາບການໃນເບື້ອງຕົ້ນ ໂດຍໃຫ້ຊ່ວຍກັນຈັດຫາໄມ້ມາປັກເປັນແນວກັ້ນຕາມຈຸດສ່ຽງ.
ຂະນະດຽວກັນ ທາງເມືອງຈະສະໜອງ ດິນ ແລະ ຫີນ ເພື່ອນຳມາຖົມ ແລະ ເສີມແນວແຄມຝັ່ງ. ພ້ອມທັງຈັດຫາເຮືອສຳລັບຂົນສົ່ງຫີນທີ່ກະກຽມໄວ້ ເພື່ອນຳໄປສ້າງແນວປ້ອງກັນແຄມຝັ່ງ ຫຼັງຈາກລະດັບນ້ຳຫຼຸດລົງ.
ພາກສ່ວນກ່ຽວຂ້ອງຈະສືບຕໍ່ຕິດຕາມສະພາບແຄມຝັ່ງຢ່າງໃກ້ຊິດ ແລະ ເລັ່ງປະສານງານແກ້ໄຂ ເພື່ອຫຼຸດຜ່ອນຄວາມເສຍຫາຍ ແລະ ປ້ອງກັນບໍ່ໃຫ້ການເຊາະເຈື່ອນຂະຫຍາຍຕົວເພີ່ມຂຶ້ນ.
ທີ່ມາ: ສະຖານີໂທລະພາບເມືອງໂຂງ
