ວັນທີ 18 ມິຖຸນາ 2026, ກົມພາສີ ກະຊວງການເງິນ ໄດ້ຈັດກອງປະຊຸມ ປຶກສາຫາລື ກ່ຽວກັບການແກ້ໄຂຍານພາຫະນະນຳເຂົ້າທີ່ບໍ່ຖືກຕ້ອງ ແລະ ນຳໃຊ້ບໍ່ຖືກເປົ້າໝາຍ ໂດຍການເປັນປະທານ ຂອງທ່ານ ພູເຂົາຄຳ ວັນນະວົງໄຊ ຫົວໜ້າກົມພາສີ, ມີຄະນະກົມ ມີຫົວໜ້າພະແນກ, ຮອງຫົວໜ້າພະແນກ ອ້ອມຂ້າງກົມພາສີ, ຫົວໜ້າ, ຮອງຫົວໜ້າພາສີປະຈໍາແຂວງ, ຫົວໜ້າດ່ານພາສີສາກົນທົ່ວປະເທດເຂົ້າຮ່ວມ.
ທ່ານ ພູເຂົາຄຳ ວັນນະວົງໄຊ ໄດ້ມີຄຳເຫັນວ່າ: ໄລຍະຜ່ານມາ ລັດຖະ ບານໄດ້ອອກ ແຈ້ງການສະບັບເລກທີ 1553/ຫສນຍ ແລະ ສະບັບເລກທີ 175/ຫສນຍ ເຊິ່ງເລີ່ມຈັດຕັ້ງປະຕິບັດນັບແຕ່ວັນທີ 15 ກັນຍາ 2025 ເຖິງ ວັນທີ 08 ພຶດສະພາ 2026 ຜ່ານການຈັດຕັ້ງປະຕິບັດ ສາມາດແກ້ໄຂຄະດີໄດ້ທັງໝົດ ຈໍານວນ 32.457 ຄັນ (ລົດໃຫຍ່ 31.612 ຄັນ, ລົດຈັກ 845 ຄັນ) ຈັດເກັບລາຍຮັບໄດ້ທັງໝົດ ຈໍານວນ 1.509,33 ຕື້ກີບ ໃນຂອບເຂດທົ່ວປະເທດ, ແຕ່ສະພາບການລັກລອບນຳເຂົ້າ, ການແລກປ່ຽນຊື້-ຂາຍ, ການນໍາໃຊ້ ຍານພາຫະນະນຳເຂົ້າບໍ່ຖືກຕ້ອງ ແລະ ບໍ່ທັນໄດ້ເສຍພາສີ-ອາກອນ, ຍັງມີລັກສະນະແຜ່ລາມຫຼາຍ ເປັນຕົ້ນ ການນໍາໃຊ້ປ້າຍ, ໃບທະບຽນບໍ່ຖືກຕ້ອງ, ການແລກປ່ຽນຊື້-ຂາຍ ຍານພາຫະນະນຳເຂົ້າບໍ່ຖືກຕ້ອງ ທີ່ມີໄວ້ໃນຄອບຄອງ, ແລະ ນໍາໃຊ້ ມາຮອດປັດຈຸບັນ ລັດຖະບານກໍ່ໄດ້ອອກແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 712/ຫສນຍ, ລົງວັນທີ 28 ພຶດສະພາ 2026 ກ່ຽວກັບທິດຊີ້ນໍາຜົນການຈັດຕັ້ງປະຕິບັດການແກ້ໄຂຍານພາຫະນະນໍາເຂົ້າບໍ່ຖືກຕ້ອງ ແລະ ນໍາໃຊ້ບໍ່ຖືກເປົ້າໝາຍ.
ການຈັດກອງປະຊຸມໃນຄັ້ງນີ້ ກໍ່ແມ່ນເພື່ອສະຫຼຸບຕີລາຄາສະພາບການຈັດຕັ້ງປະຕິບັດ ຕາມແຈ້ງການ ສະບັບເລກທີ 1553/ຫສນຍ, ລົງວັນທີ 15 ກັນຍາ 2025 ແລະ 175/ຫສນຍ, ລົງວັນທີ 09 ກຸມພາ 2026 ແລະ ບັນຫາຫາງສຽງຂອງສັງຄົມ ແລະ ຢ່າງໜຶ່ງກໍ່ເພື່ອເຜີຍແຜ່ ແຈ້ງການຂອງຫ້ອງວ່າການສໍານັກງານນາຍົກລັດ ຖະມົນຕີ ສະບັບເລກທີ 712/ຫສນຍ, ລົງວັນທີ 28 ພຶດສະພາ 2026 ກ່ຽວກັບທິດຊີ້ນໍາຜົນການຈັດຕັ້ງປະຕິບັດການແກ້ໄຂຍານພາຫະນະນໍາເຂົ້າບໍ່ຖືກຕ້ອງ ແລະ ນໍາໃຊ້ບໍ່ຖືກເປົ້າໝາຍ ແລະ ເພື່ອປຶກສາຫາລືກ່ຽວກັບກົນໄກ ແລະ ວິທີການຈັດຕັ້ງປະຕິບັດ.
ທີ່ມາ: ກະຊວງການເງິນ
