ນັກກິລາເທັນນິດອະນຸຊົນລາວ ທ້າວ ຄຳປະສົງ ຈັນທະວົງ ຫຼື “ນ້ອງເຄວ້າ” ຈາກສະໂມສອນ ພູຜາ ເທັນນິດ ເຂດບ້ານດອນນົກຂຸ້ມ ເມືອງສີສັດຕະນາກ ນະຄອນຫຼວງວຽງຈັນ ສ້າງຜົນງານໂດດເດັ່ນ ດ້ວຍການຄວ້າແຊ້ມເທັນນິດໃນລາຍການ ຂອນແກ່ນ ສີຊາພັນ ຈູເນຍ 2026 ທີ່ແຂວງຂອນແກ່ນ ປະເທດໄທ.
ໃນຮອບຊີງຊະນະເລີດ “ນ້ອງເຄວ້າ” ສາມາດເອົາຊະນະ ນະພັດ ທັບກະ ນັກກິລາເຈົ້າຖິ່ນຈາກປະເທດໄທ ໄປໄດ້ແບບຂາດລອຍ 2-0 ເກມ ດ້ວຍຄະແນນ 4-0 ແລະ 4-1 ຄວ້າຖ້ວຍແຊ້ມມາຄອງໄດ້ຢ່າງສະຫງ່າງາມ.
ລາຍການແຂ່ງຂັນນີ້ ຈັດຂຶ້ນໂດຍ ພາລາດອນ ສີຊາພັນ ອະດີດນັກເທັນນິດອາຊີບ ແລະ ນັກກິລາທີມຊາດໄທ ເພື່ອສົ່ງເສີມນັກກິລາເຍົາວະຊົນໃນອາຊຽນ ໃຫ້ກ້າວສູ່ເສັ້ນທາງນັກກິລາອາຊີບໃນອະນາຄົດ.
ການແຂ່ງຂັນຈັດຂຶ້ນໃນວັນທີ 13-14 ມິຖຸນາ 2026 ໂດຍໃນຮຸ່ນທີ່ນ້ອງເຄວ້າລົງແຂ່ງຂັນ ມີນັກກິລາຈາກ ລາວ ແລະ ໄທ ເຂົ້າຮ່ວມເກືອບ 30 ຄົນ. ຂະນະທີ່ ສະໂມສອນພູຜາ ເທັນນິດ ກໍໄດ້ສົ່ງນັກກິລາເຂົ້າຮ່ວມຫຼາຍຄົນ ແລະ ສາມາດສ້າງຜົນງານໄດ້ຢ່າງໜ້າປະທັບໃຈ.
ໄຊຊະນະຄັ້ງນີ້ ຖືເປັນອີກໜຶ່ງຄວາມພາກພູມໃຈຂອງວົງການເທັນນິດລາວ ແລະ ສະທ້ອນໃຫ້ເຫັນເຖິງສັກກະຍະພາບຂອງນັກກິລາລາວຮຸ່ນໃໝ່ ທີ່ກຳລັງກ້າວຂຶ້ນສູ່ເວທີສາກົນ.
ທີ່ມາ: Lao Sports Media
