ບ້ານວຽງຄຳ ກາຍເປັນເຂດທີ່ໄດ້ຮັບຜົນກະທົບໜັກໜ່ວງທີ່ສຸດ ຈາກເຫດການພະຍຸລະດູຮ້ອນ ແລະ ໝາກເຫັບຕົກໃນທ້າຍອາທິດຜ່ານມາ ສ້າງຄວາມເສຍຫາຍແກ່ເຮືອນຊານ, ໂຮງຮຽນ, ວັດວາອາຮາມ ແລະ ພາຫະນະ ເປັນບໍລິເວນກວ້າງ ໂດຍຍັງບໍ່ສາມາດປະເມີນມູນຄ່າຄວາມເສຍຫາຍໄດ້.
ທ່ານ ປໍວ່າງ ໄຊຢ້າວວົງ ເລຂາພັກບ້ານ, ນາຍບ້ານວຽງຄຳ ໄດ້ໃຫ້ສຳພາດຕໍ່ທີມຂ່າວສື່ມວນຊົນ ປກສ ໃນວັນທີ 23 ມີນາ 2026 ວ່າ: ເຫດການດັ່ງກ່າວເກີດຂຶ້ນໃນເວລາປະມານ 16:00-17:00 ໂມງ ຂອງວັນທີ 22 ມີນາ 2026. ລົມພະຍຸ ແລະ ໝາກເຫັບທີ່ຕົກລົງມາຢ່າງກະທັນຫັນ ໄດ້ສົ່ງຜົນກະທົບດັ່ງນີ້:
• ເຮືອນປະຊາຊົນ: ເປ່ເພເສຍຫາຍຢ່າງໜັກໜ່ວງລວມທັງໝົດ 1,593 ຫຼັງຄາເຮືອນ.
• ສິ່ງກໍ່ສ້າງສາທາລະນະ: ໂຮງຮຽນ 3 ຫຼັງ, ວັດວາອາຮາມ, ຕະຫຼາດ ແລະ ຮ້ານຄ້າ ໄດ້ຮັບຄວາມເສຍຫາຍ.
• ຜູ້ບາດເຈັບ: ພົບຜູ້ບາດເຈັບເລັກໜ້ອຍ 5 ຄົນ ແລະ ບາດເຈັບສົມຄວນ 3 ຄົນ.
• ຊັບສິນອື່ນໆ: ພາຫະນະ (ລົດໃຫຍ່-ລົດຈັກ), ບ່ອນທຳການຜະລິດ ແລະ ຊັບສິນຕ່າງໆ ຂອງພໍ່ແມ່ປະຊາຊົນທົ່ວບ້ານໄດ້ຮັບຄວາມເສຍຫາຍເປັນຈຳນວນຫຼາຍ.
ນອກຈາກບ້ານວຽງຄຳແລ້ວ, ພະຍຸໝາກເຫັບໃນຄັ້ງນີ້ຍັງໄດ້ແຜ່ຂະຫຍາຍວົງກວ້າງ ໄປຍັງບ້ານອ້ອມຂ້າງທີ່ມີຊາຍແດນຕິດຈອດກັນ ໃນເຂດເມືອງສີໂຄດຕະບອງ ນະຄອນຫຼວງວຽງຈັນ ເຊິ່ງໄດ້ຮັບຜົນກະທົບໜັກເຊັ່ນດຽວກັນ ຄື:
• ບ້ານໜອງແຕ່ງເໜືອ
• ບ້ານຈັນສະຫວ່າງ
• ບ້ານຕາດທອງ
• ບ້ານຈຳປາ
ປັດຈຸບັນ, ອຳນາດການປົກຄອງບ້ານ ແລະ ພາກສ່ວນກ່ຽວຂ້ອງ ພວມເລັ່ງເກັບກຳຂໍ້ມູນລະອຽດ ເພື່ອປະເມີນມູນຄ່າຄວາມເສຍຫາຍທັງໝົດ ແລະ ວາງແຜນການຊ່ວຍເຫຼືອຟື້ນຟູໃນຂັ້ນຕໍ່ໄປ. ພ້ອມກັນນັ້ນ ກໍຂໍໃຫ້ປະຊາຊົນຕິດຕາມການລາຍງານສະພາບອາກາດຢ່າງໃກ້ຊິດ ເພື່ອເຝົ້າລະວັງພະຍຸລະດູຮ້ອນທີ່ອາດເກີດຂຶ້ນໄດ້ອີກໃນໄລຍະນີ້.
ທີ່ມາ: ຄວາມສະຫງົບ
