ວັນທີ 17 ສິງຫາ ຂອງທຸກໆປີ ແມ່ນວັນຍົກຍ້ອງແມວດຳ ຫຼື Black Cat Appreciation Day ເຫດຜົນທີ່ຕ້ອງມີວັນນີ້ນັ້ນ ກໍ່ເພື່ອໃຫ້ແມວດຳໄດ້ຮັບຄວາມຮັກຫຼາຍຂຶ້ນ ເພື່ອໃຫ້ທຸກຄົນຮູ້ຈັກຄຸນຄ່າຂອງແມວດຳ ແລະ ໃຫ້ຄວາມຮັກ ຄວາມສຳຄັນກັບແມວດຳ ເຊັ່ນດຽວກັນກັບແມວສີອື່ນໆ.
ເພາະໃນສະໄໝກ່ອນ ຄວາມເຊື່ອຂອງມະນຸດເຮົາ ໄດ້ທຳຮ້າຍສັດໂລກທີ່ໜ້າຮັກຢ່າງນ້ອງແມວດຳ ທີ່ຖືກກ່າວຫາວ່າ ເປັນສິ່ງຊົ່ວຮ້າຍ, ເປັນສັນຍາລັກແຫ່ງຄວາມໂຊກຮ້າຍ ແລະ ກໍແມ່ນມະນຸດອີກຫັ້ນແຫຼະ ທີ່ສ້າງຕົວຕົນອັນແສນຊົ່ວຮ້າຍໃຫ້ກັບແມວດຳ ວ່າເປັນຕົວແທນຂອງແມ່ມົດ ທີ່ຈະນຳພາຄວາມຊົ່ວຮ້າຍມາສູ່ຜູ້ລ້ຽງ, ເຮັດໃຫ້ເປັນເຫດຜົນອີກຢ່າງໜຶ່ງວ່າ ເປັນຫຍັງແມວດຳຈຶ່ງຖືກຖິ້ມຫຼາຍກວ່າແມວສີອື່ນໆ.
ສຳລັບຢູ່ປະເທດລາວເຮົາເອງ ກໍມີຄ່ານິຍົມ ແລະ ຄວາມເຊື່ອດັ້ງເດີມກ່ຽວກັບແມວດຳ (ລວມເຖິງໝາດຳ) ວ່າເປັນສັນຍາລັກຂອງສິ່ງລີ້ລັບ, ຜີສາງນາງໄມ້ ຫຼື ລາງບອກເຫດຮ້າຍ. ແຕ່ໃນຄວາມເປັນຈິງແລ້ວ ຄວາມເຊື່ອເຫຼົ່ານັ້ນ “ບໍ່ມີມູນຄວາມຈິງ ແລະ ບໍ່ມີຫຼັກຖານທາງວິທະຍາສາດໃດໆມາຮອງຮັບ”. ພວກມັນເປັນພຽງສັດລ້ຽງທີ່ມີຊີວິດ, ມີຄວາມຮູ້ສຶກ ແລະ ຕ້ອງການຄວາມຮັກຄວາມອົບອຸ່ນຄືກັນກັບສັດອື່ນໆ.
ໃນບາງວັດທະນະທຳ ເຊັ່ນ: ຍີ່ປຸ່ນ ແລະ ສະກັອດແລນ, ແມວດຳຖືກເບິ່ງວ່າເປັນສັນຍາລັກແຫ່ງຄວາມໂຊກດີ, ການນຳພາໂຊກລາບ ແລະ ຄວາມຮັ່ງມີມາສູ່ເຮືອນ.
ງານວິໄຈຊີ້ໃຫ້ເຫັນວ່າ ເມລານິນ (Melanin) ທີ່ເຮັດໃຫ້ຂົນຂອງພວກມັນເປັນສີດຳ ເຮັດໃຫ້ແມວດຳມີລະບົບພູມຄຸ້ມກັນທີ່ແຂງແຮງ ແລະ ທົນທານຕໍ່ພະຍາດບາງຊະນິດໄດ້ດີ.
ແມວດຳມີນິໄສຂີ້ອ້ອນ, ຊື່ສັດ ແລະ ຂີ້ດື້ບໍ່ຕ່າງຈາກແມວສີອື່ນໆ ເມື່ອທ່ານໄດ້ລອງລ້ຽງ ທ່ານຈະຮູ້ວ່າສີຂົນບໍ່ໄດ້ກຳນົດຄວາມຮັກທີ່ພວກມັນມີໃຫ້ທ່ານ.
ເຖິງເວລາປ່ຽນ “ຄວາມເຊື່ອ” ໃຫ້ເປັນ “ຄວາມຮັກ”ໃນໂອກາດ ວັນຍົກຍ້ອງແມວດຳ ນີ້, ຈົ່ງຮ່ວມກັນທຳລາຍອະຄະຕິ ແລະ ຄວາມເຊື່ອຜິດໆ ດ້ວຍການເປີດອົກເປີດໃຈ, ມອບຄວາມຮັກ, ເບິ່ງແຍງ ແລະ ໃຫ້ກຽດຊີວິດນ້ອຍໆເຫຼົ່ານີ້. ຖ້າທ່ານກຳລັງຊອກຫາສະມາຊິກໃໝ່ເຂົ້າເຮືອນ ລອງເປີດໂອກາດໃຫ້ “ເຈົ້າຂົນດຳ” ໄດ້ເຂົ້າໄປເປັນສ່ວນໜຶ່ງໃນຄອບຄົວຂອງທ່ານ ແລ້ວທ່ານຈະຮູ້ວ່າ ແມວດຳ ບໍ່ໄດ້ນຳມາເຊິ່ງໂຊກຮ້າຍ… ແຕ່ແມ່ນຄວາມຮັກອັນບໍລິສຸດ.
