ກາຍເປັນກະແສຮືຮາໃນປະເທດອິນເດຍ ເມື່ອເຈົ້າໜ້າທີ່ໄດ້ກວດພົບວ່າ ຊາຍຂໍທານຄົນໜຶ່ງໃນເມືອງ ອິນດໍ ປະເທດອິນເດຍ ແທ້ຈິງແລ້ວແມ່ນມະຫາເສດຖີ ທີ່ມີມີຊັບສິນຫຼາຍແຫ່ງ ແລະ ທຸລະກິດປ່ອຍເງິນ ທີ່ມີດອກເບ້ຍສູງ.
ຊາຍຜູ້ນີ້ຊື່ວ່າ: ມັງກີລານ, ອາຍຸ 50 ປີ, ເປັນຄົນພິການ ແລະ ມັກນັ່ງຂໍທານຢູ່ເຂດຕະຫຼາດ ຊາຣາຟາ ບາຊາ ໃນເມືອງອິນດໍ, ລາຍໄດ້ຕໍ່ມື້ຈາກການຂໍທານ 400 ຫາ 500 ຣູປີ (ປະມານ 4-5 ໂດລາ).
ເຈົ້າໜ້າທີ່ຈາກພະແນກພັດທະນາແມ່ຍິງ ແລະ ເດັກ ໄດ້ພົບລາວໃນລະຫວ່າງການລົງກວດກາໂຄງການ “ເມືອງປອດຂໍທານ”. ໃນຕອນທໍາອິດ ເຈົ້າໜ້າທີ່ຄິດວ່າ ລາວເປັນຜູ້ປ່ວຍພະຍາດຂີ້ທູດທີ່ຕ້ອງການຄວາມຊ່ວຍເຫຼືອ.
ຈາກການສືບສວນຂອງເຈົ້າໜ້າທີ່ ພົບວ່າ ມັງກີລານ ບໍ່ໄດ້ທຸກຍາກດັ່ງທີ່ເຫັນ:
ລາວເປັນເຈົ້າຂອງເຮືອນ 3 ຫຼັງ ໃນເຂດທີ່ມີທີ່ດິນລາຄາແພງ ຂອງເມືອງ ອິນດໍ (ລວມທັງຕຶກ 3 ຊັ້ນ 1 ຫຼັງ).
ລົດສາມລໍ້ (Auto-rickshaws)ປ່ອຍໃຫ້ເຊົ່າລາຍວັນ 3 ຄັນ.
ລົດເກັງ Maruti Suzuki Dzire 1 ຄັນ (ປ່ອຍໃຫ້ເຊົ່າ) .
ທຸລະກິດປ່ອຍເງິນກູ້: ລາວນຳເງິນທີ່ໄດ້ຈາກການຂໍທານໄປປ່ອຍກູ້ດອກເບ້ຍສູງ ໃຫ້ກັບບັນດາພໍ່ຄ້າແມ່ຄ້າໃນຕະຫຼາດໃນໄລຍະສັ້ນ (ປະມານ 1 ມື້ ຫຼື 1 ອາທິດ) ແລະ ເກັບດອກເບ້ຍທຸກແລງ, ລາວປ່ອຍເງິນກູ້ໄປແລ້ວ 4-5 ແສນຣູປີ ໂດຍມີລາຍໄດ້ລວມດອກເບ້ຍ 1,000 ຫາ 2,000 ຣູປີຕໍ່ມື້.
ປະຈຸບັນ ເຈົ້າໜ້າທີ່ກຳລັງຂະຫຍາຍຜົນສືບສວນບັນຊີທະນາຄານ ແລະ ແຫຼ່ງທີ່ມາຂອງຊັບສິນທັງໝົດຢ່າງລະອຽດ ເພື່ອດຳເນີນການຕາມລະບຽບກົດໝາຍຕໍ່ໄປ.
ທີ່ມາ: VN express
ຮຽບຮຽງໂດຍ Lao Youth Radio FM 90 MHz
