ຄະນະຜູ້ແທນຂອງ ກະຊວງໂຍທາທິການ ແລະ ຂົນສົ່ງ ສປປ ລາວ ໄດ້ເຂົ້າຮ່ວມກອງປະຊຸມລັດຖະມົນຕີ ອົງການຮ່ວມມືລະຫວ່າງທາງລົດໄຟ (OSJD) ຄັ້ງທີ 53 ທີ່ນະຄອນດູຊານເບ ປະເທດທາຈິກິສຖານ ໃນວັນທີ 11-12 ມິຖຸນາ 2026 ຜ່ານມາ.
ຄະນະຜູ້ແທນລາວ ນຳໂດຍ ທ່ານ ງາມປະສົງ ເມືອງມະນີ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ພ້ອມດ້ວຍຜູ້ຕາງໜ້າຈາກກົມທາງລົດໄຟ, ລັດວິສາຫະກິດລົດໄຟແຫ່ງຊາດລາວ ແລະ ຄະນະກຳມະການປະຈຳການຂອງ ສປປ ລາວ ປະຈຳອົງການ OSJD ເຂົ້າຮ່ວມການປຶກສາຫາລືກ່ຽວກັບການພັດທະນາລະບົບຂົນສົ່ງທາງລົດໄຟ ແລະ ການເຊື່ອມໂຍງເຄືອຂ່າຍລົດໄຟລະຫວ່າງປະເທດສະມາຊິກ.
ລາວເຂົ້າຮ່ວມ Corridor 2 ຢ່າງເປັນທາງການ
ຜົນສຳເລັດສຳຄັນຂອງການປະຊຸມຄັ້ງນີ້ ແມ່ນການລົງນາມໃນບົດບັນທຶກການຮ່ວມມື ເພື່ອໃຫ້ ສປປ ລາວ ເຂົ້າຮ່ວມເປັນສະມາຊິກຂອງ ແລວທາງລົດໄຟໝາຍເລກ 2 (Corridor 2) ຂອງອົງການ OSJD ຢ່າງເປັນທາງການ.
ແລວທາງລົດໄຟ Corridor 2 ເປັນເສັ້ນທາງຂົນສົ່ງສາກົນທີ່ເຊື່ອມຕໍ່ 6 ປະເທດ ປະກອບມີ:
ສປປ ລາວ
ສສ ຫວຽດນາມ
ສປ ຈີນ
ກາຊັກສະຖານ
ສະຫະພັນຣັດເຊຍ
ເອສໂຕນີ
ກ້າວສຳຄັນຂອງລະບົບລົດໄຟລາວ
ການເຂົ້າຮ່ວມ Corridor 2 ຄັ້ງນີ້ ຖືເປັນອີກໜຶ່ງຂີດໝາຍສຳຄັນໃນປະຫວັດສາດການຄົມມະນາຄົມຂອງ ສປປ ລາວ ໂດຍຈະຊ່ວຍເພີ່ມທ່າແຮງການຂົນສົ່ງສິນຄ້າ ແລະ ຜູ້ໂດຍສານ ລະຫວ່າງລາວ ກັບບັນດາປະເທດໃນພາກພື້ນ ແລະ ນອກພາກພື້ນ.
ນອກຈາກນັ້ນ ຍັງເປັນການເຊື່ອມຕໍ່ເຄືອຂ່າຍລົດໄຟຂອງລາວ ເຂົ້າສູ່ລະບົບຂົນສົ່ງສາກົນ ຊ່ວຍສົ່ງເສີມບົດບາດຂອງປະເທດໃນການເປັນສູນກາງເຊື່ອມໂຍງດ້ານການຄົມມະນາຄົມ ແລະ ໂລຈິສຕິກ ລະຫວ່າງອາຊີ ແລະ ເອີຣົບ ໃນອະນາຄົດ.
ທີ່ມາ: ກະຊວງໂຍທາທິການ ແລະ ຂົນສົ່ງ
