ມາເລເຊຍ 2026 ກຽມຕ້ອນຮັບຄົນລາວ ດ້ວຍຄວາມງົດງາມທາງທໍາມະຊາດ ທະເລ ພູເຂົາ ວັດທະນະທຳ ພ້ອມດ້ວຍອາຫານທີ່ລ້ຳເລີດ ແລະ ການເພີດເພີນຈັບຈ່າຍຊື້ເຄື່ອງ ທີ່ທ່ານບໍ່ຄວນພາດ ! ມາທ່ອງທ່ຽວ ມາເລເຊຍ ປີ 2025 ຫາປີ 2026 ຈະເປັນປີທີ່ດີທີ່ສຸດ ແລະ ຖືກທີ່ສຸດ ທີ່ຄົນລາວຄວນຂຶ້ນແຜນໄວ້ ເພາະມີຫຼາຍກິດຈະກໍາ ທີ່ໜ້າສົນໃຈ ຈັດສັນໄວ້ ເພື່ອສ້າງປະສົບການ ທີ່ບໍ່ມີວັນລືມຂອງທ່ານ. ທັງໝົດນີ້ ໄດ້ຮັບການເປີດເຜີຍ ໃນງານ ເປີດປີການທ່ອງທ່ຽວ ມາເລເຊຍ ຫຼື Visit Malaysia 2026 ຢູ່ລັດ ຈໍຫໍ ປະເທດ ມາເລເຊຍ ໃນວັນເສົາ 18 ມັງກອນ 2025 ທີ່ຜ່ານມາ.
ຈຸດເດັ່ນ ຂອງການທ່ອງທ່ຽວມາເລເຊຍ 2026 ຍັງຄົງຮັກສາໄວ້ ຄໍາຂວັນ ຂອງການທ່ອງທ່ຽວ ມາເລເຊຍ ໃນຫຼາຍໆປີຜ່ານມາ, ໂດຍທາງມາເລເຊຍ ເຄີຍມີຄວາມພະຍາຍາມ ໃນການປ່ຽນຊື່ ມາຫຼາຍຮອບ ແຕ່ກໍ່ຍັງບໍ່ມີຄໍາໃດ ທີ່ເໝາະສົມ ເທົ່າກັບ Malaysia, Truly Asia ຊຶ່ງເປັນຄໍາຂວັນ ທີ່ສະແດງໃຫ້ເຫັນ ການປະສົມປະສານ ຄວາມເປັນອາຊີ ຢ່າງແທ້ຈິງ. ສ່ວນສິ່ງທີ່ຈະແຕກຕ່າງ ຈາກການໂປຮໂມດການທ່ອງທ່ຽວ ທີ່ຜ່ານມາ ແມ່ນການສຸມໃສ ການທ່ອງທ່ຽວ ທີ່ມີຄວາມຍືນຍົງ ແລະ ວັດທະນາທໍາ ທີ່ຫຼາກຫຼາຍ. ວາງຍຸດທະສາດ ການທ່ອງທ່ຽວ ເພື່ອໃຫ້ນັກທ່ອງທ່ຽວ ໃຊ້ເວລາ ທ່ອງທ່ຽວ ຢູ່ມາເລເຊຍ ໃຫ້ໄດ້ຫຼາຍມື້ຂຶ້ນຕື່ມ, ເນັ້ນດຶງດູດ ນັກທ່ອງທ່ຽວ ຄຸນນະພາບ, ແລະ ໃຫ້ທຸກລັດ ໃນມາເລເຊຍ ມີສ່ວນຮ່ວມ ໃນການຕ້ອນຮັບ ນັກທ່ອງທ່ຽວ.
ຄາດການໄວ້ວ່າ ໃນປີ 2026, ຈະໃຫ້ສາມາດດຶງດູດນັກທ່ອງທ່ຽວ ໃຫ້ໄດ້ຫຼາຍກ່ວາ 35.6 ລ້ານຄົນ ຂອງນັກທ່ອງທ່ຽວຕ່າງປະເທດ, ສ້າງລາຍຮັບໃຫ້ປະເທດ ປະມານ 36 ຕື້ ໂດລາສະຫະລັດ. ລັດຖະບານມາເລເຊຍ ຍັງໄດ້ສຸມໃສ່ ການພັດທະນາພື້ນຖານໂຄງລ່າງ ພື້ນຖານ ແລະ ການໂຄສະນາ ການທ່ອງທ່ຽວ ໃນຫຼາຍຮູບແບບ. ມີສາຍການບິນ ທີ່ບິນກົງມາ ມາເລເຊຍ ຫຼາຍກ່ວາ 3,100 ຖ້ຽວ, ຈຶ່ງເຮັດໃຫ້ ມາເລເຊຍ ຢູ່ໃນຈຸດຍຸດທະສາດ ຂອງການທ່ອງທ່ຽວ ຂອງຄົນຈາກທົ່ວໂລກ. ຈຸດໝາຍປາຍທາງ ການທ່ອງທ່ຽວ ທີ່ສໍາຄັນຂອງ ມາເລເຊຍ ປະກອບມີ: ກົວລາລໍາເປີ, ປີນັງ, ມາລັກກາ, ສະລາວັກ, ລັງກາວີ, ເຊັລັງງໍ, ຈໍຫໍ, ຊາບາ, ໂຄທາບາລູ ແລະ ອື່ນໆ.
ປະຈຸບັນ ຄົນລາວ ສາມາດເດີນທາງ ມາທ່ຽວ ປະເທດ ມາເລເຊຍ ໄດ້ຢ່າງ ສະດວກສະບາຍ, ບໍ່ວ່າ ຈະເປັນ ການເດີນທາງ ໂດຍການບິນກົງ ນໍາ ສາຍການບິນ ແອເອເຊຍ ຈາກ ນະຄອນຫຼວງວຽງຈັນ ຫາ ກົວລາລໍາເປີ ໄດ້ທຸກໆ ວັນຈັນ ແລະ ວັນສຸກ. ລາຄາເລີ່ມຕົ້ນພຽງ 67 ໂດລາ ສະຫະລັດເທົ່ານັ້ນ. ນອກຈາກນີ້ ທ່ານຍັງສາມາດ ບິນນໍາ ແອເອເຊຍ ຜ່ານໄທ ໄປລົງ ມາເລເຊຍ ໄດ້ໃນທຸກໆມື້ເຊັ່ນກັນ. ສ່ວນແພັກເກດການໄປທົວ ມາເລເຊຍ ແມ່ນມີຫຼາຍຮູບແບບ ໂດຍທ່ານສາມາດ ໄປທ່ຽວມາເລເຊຍ ໄດ້ໃນລາຄາເລີ່ມຕົ້ນພຽງ 9 ລ້ານກວ່າກີບ ລວມປີ້ຍົນໄປກັບ ອາຫານ ທີ່ພັກ ການໄປທ່ຽວ ຈໍານວນ 4 ວັນ 3 ຄືນ !
