ກອງປະຊຸມໃຫຍ່ສະໄຫມສາມັນ ສະຫະພັນບານເຕະແຫ່ງຊາດລາວ ( ສຕລ ) ໄດ້ສໍາເລັດຢ່າງເປັນ ທາງການໃນຕອນເຊົ້າຂອງວັນທີ 19 ມັງກອນ 2025 ໃຫ້ກຽດເຂົ້າຮ່ວມໂດຍ ທ່ານ ຮສ. ປອ. ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະ ກີລາ, ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ.
ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ ໄດ້ຂຶ້ນເປີດ ກອງປະຊຸມຢ່າງເປັນທາງການ ວ່າ: ໃນປີ 2024 ທີ່ຜ່ານມາ ສຕລ ໄດ້ຜັນຂະຫຍາຍມະຕິຂອງກອງ ປະຊຸມໃຫຍ່ ປະຈໍາປີ 2023 ໄດ້ສໍາເລັດຫຼາຍປະການ ທີ່ພົ້ນເດັ່ນແມ່ນໃນທ້າຍປີ 2024 ທີ່ຜ່ານມາ, ສະຫະພັນບານເຕະແຫ່ງຊາດ ລາວ ໄດ້ຖືກຮັບເລືອກໃຫ້ເປັນສະຫະພັນບານເຕະດີເດັ່ນ ປະເພດ Ruby ໂດຍສະຫະພັນບານເຕະອາຊີ (AFC) ເຊິ່ງສະແດງໃຫ້ເຫັນເຖິງການຮັບຮູ້ການພັດທະນາ ກິລາບານເຕະໃນປະເທດລາວ ເຊິ່ງນີ້ມັນ ລາງວັນຂອງຄອບຄົວບານເຕະລາວທຸກພາກສ່ວນ. ນອກນັ້ນ ສະຫະພັນບານເຕະແຫ່ງຊາດລາວ ຍັງໄດ້ ຮັບກຽດເປັນເຈົ້າພາບກອງປະຊຸມໃຫຍ່ສະໄຫມ ສາມັນ ຂອງສະຫະພັນບານເຕະອາຊຽນອີກດ້ວຍ. ຄວາມເຊື່ອຫມັ້ນຂອງສາກົນຕໍ່ ສຕລ, FIFA ແລະ AFC ໄດ້ເລືອກໃຫ້ ສປປ ລາວ ເປັນສະຫນາມກາງ ຈັດການແຂ່ງຂັນບານໂລກ ຮອບ ຄັດເລືອກ ໂຊນອາຊີ ຮອຍ 2 ແລະ ຮອບ 3 ຂອງທີມຊາດ ສປປ ເກົາຫຼີ.
ພາຍໃຕ້ໂຄງການ FIFA Forward ສຕລ ສາມາດຍາດແຍ່ງທຶນສືບຕໍ່ຈັດການແຂ່ງຂັນລາວ ລີກ ຍິງ ແລະ ຈັດການແຂ່ງຂັນ ຊິງຂັນທ່ານ ນາຍົກລັດຖະມົນຕີ ແຫ່ງ ສປປ ລາວ ໃນອີກ 4 ລະດູການ ຂ້າງຫນ້າ ມູນຄ່າລວມ 1,100,000 ໂດລາສະຫະລັດ.
ພາຍໃຕ້ໂຄງການ AFC Enhance Programme: Stadium ສຕລ ສາມາດຍາດແຍ່ງ ທຶນ ຮອນມາກໍ່ສ້າງອາຄານຫໍພັກນັກກິລາ ທີ່ສູນຝຶກວ່າປີ-ຈໍາປາ ຫຼັກ 16 ເພື່ອຮອງຮັບການຝຶກຊ້ອມ ຂອງທີມຊາດ ແລະ ສະໂມສອນ ໃຫ້ຫຼາຍຂື້ນ.
ການພັດທະນາບຸກຄະລາກອນພາຍໃນ, ສຕລ ໄດ້ສົ່ງເສີມໃຫ້ບຸກຄະລາກອນໄດ້ຍົກລະດັບ ຄວາມຮູ້, ຄວາມສາມາດ ໃນວຽກງານວິຊາສະເພາະຂອງຕົນ ໂດຍການສົ່ງເຂົ້າຮ່ວມຮຽນຫຼັກສູດຕ່າງໆ ຂອງ FIFA ແລະ AFC. ນອກນັ້ນ ຍັງໄດ້ສົ່ງເສີມໃຫ້ບັນດາຄູຝຶກ ພັດທະນາຂີດຄວາມສາມາດ ຈົນມີ ຜູ້ຝຶກສອນຄົນລາວ ທີ່ສາມາດອົບຮົມຄູຝຶກລະດັບ C ຂອງ AFC ແລະ ສົ່ງເສີມກໍາມະການ ຕັດສິນ ລົງ ຄັດເລືອກເປັນກໍາມະການຕັດສິນລະດັບສູງຂອງ AFC.
ປະທານ ສຕລ ຍັງໄດ້ລາຍງານແຜນການເຄື່ອນໄຫວຕ່າງໆໃນປີ 2025 ໂດຍ ສະເພາະແມ່ນວຽກງານຈັດການແຂ່ງຂັນໃນ ສປປ ລາວ ປະຈໍາປີ 2025 ໄດ້ກໍານົດເອົາ 7 ລາຍການ
ດັ່ງກ່າວນີ້:
1.ການແຂ່ງຂັນ ຟຸດຂໍລີກ 2025 ແຂ່ງຂັນລະຫວ່າງວັນທີ 22 ມີນາ – 21 ມິຖຸນາ 2025
2.ການແຂ່ງຂັນບານເຕະເຍົາວະຊົນ ຮຸ່ນອາຍຸບໍ່ເກີນ 16 ປີ ລະຫວ່າງວັນທີ 2 ກໍລະກົດ – 17 ສິງຫາ 2025
3.ການແຂ່ງຂນບານເຕະເຍົາວະຊົນ ຮຸ່ນອາຍຸບໍເກີນ 19 ປີ ລະຫວ່າງວັນທີ 18 ກໍລະກົດ – 31 ສິງຫາ 2025
4.ການແຂ່ງຂັນບານເຕະ ລາວລີກ ຍິງ 2025 ລະຫວ່າງວັນທີ 10 ພຶດສະພາ – 23 ສິງຫາ 2025
5.ການແຂ່ງຂັນບານເຕະ ເປບຊີ ລາວລີກ 1 ລະດູການ 2025/2026 ລະຫວ່າງວັນທີ 13 ກັນຍາ 2025-8 ມີນາ 2026
6.ການແຂ່ງຂັນບານເຕະ ຊິງຂັນຍາຍົກ ປະຈໍາປີ 205-2026 ລະຫວ່າງວັນທີ 24 ກັນຍາ 2025 – 14 ມີນາ 2026
7.ການແຂ່ງຂັນບານເຕະ ລາວລີກ 2 ລະຫວ່າງເດືອນມີນາ-ຕຸລາ 2025.
