ລາວ ກຽມເປັນເຈົ້າພາບຈັດການແຂ່ງຂັນດຶງເຊືອກສາກົນ ເປີດກວ້າງລະດັບອາຊຽນ ປະຈຳປີ 2025 ເຊິ່ງມີ: ລາວ ເຈົ້າພາບ, ມາເລເຊຍ, ບຣູໄນ, ໄທ, ຫວຽດນາມ, ຍີ່ປຸ່ນ, ຟິລິບປິນ ແລະ ມຽນມາ ແຈ້ງຈຸດປະສົງເຂົ້າຮ່ວມແຂ່ງຂັນໃນລະຫວ່າງ ວັນທີ 21-22 ກຸມພາ 2025 ທີ່ໂຮງແຮມດອນຈັນພາເລດ, ນະຄອນ ຫລວງວຽງຈັນ.
ວັນທີ 17 ມັງກອນ 2025 ທີ່ຫ້ອງປະຊຸມ ມສ ວຽງຈັນ ໄດ້ມີພິທີຖະແຫຼງຂ່າວກ່ຽວກັບການແຂ່ງຂັນດັ່ງກ່າວ ເຊິ່ງນໍາໂດຍທ່ານ ອາລຸນແກ້ວ ກິດຕິຄຸນ ປະທານສະຫະພັນດຶງເຊືອກແຫ່ງຊາດລາວ.
ທ່ານ ອາລຸນແກ້ວ ກິດຕິຄຸນ ໃຫ້ຮູ້ວ່າ: ການແຂ່ງຂັນຄັ້ງນີ້ຈະມີ 3 ລາຍການ ຄື: ທີມຍິງ, ທີມຊາຍ ແລະ ທີມປະສົມຍິງ-ຊາຍ ເພື່ອໃຫ້ຊາວລາວ ແລະ ຊາວຕ່າງປະເທດໄດ້ເຂົ້າໄປສໍາຜັດກັບການແຂ່ງຂັນໃຫ້ຫຼາຍຂຶ້ນ. ພາຍໃນງານຈະເປີດໃຫ້ເຂົ້າຊົມໂດຍບໍ່ເສຍຄ່າ ແລະ ມີອາຫານວ່າງໃຫ້ຜູ້ຊົມອີກດ້ວຍ.
ທີ່ມາ: Lao National Radio
